दसैं-तिहारमा कर्णालीमा सवारी दुर्घटनाबाट ६० जनाको मृत्यु

मुगुमा भएको बस दुर्घटना। फाइल तस्वीर ।

A+ A A-

दसैं-तिहारको समयमा कर्णाली प्रदेशमा सवारी दुर्घटनामा परी ६० जनाको मृत्यु भएको छ ।

प्रदेशका विभिन्न जिल्लामा छुट्टा–छुट्टै दुर्घटनामा परी ६० जनाको मृत्यु भएको हो । कर्णाली प्रदेश प्रहरी कार्यालयका अनुसार यो अवधिमा दुर्घटनामा परी १ सय २८ जना घाइते भएका छन् ।

कालिकोट, डोल्पा, र हुम्ला जिल्लामा भने यो अवधिमा सवारी दुर्घटना नभएको प्रहरीले जनाएको छ । तीबाहेक सात जिल्लाका विभिन्न ठाउँमा साना–ठूला दुर्घटना भएका थिए । दुर्घटनामा सबैभन्दा धेरै मुगुमा ३३ जनाको मृत्यु भएको छ भने २१ जना घाइते भएका छन् ।

यस्तै सुर्खेतमा ७, सल्यान १३, जाजरकोटमा ५, दैलेख, रुकुम पश्चिम र जुम्लामा एक–एक जनाको मृत्यु भएको प्रदेश प्रहरी प्रवक्ता एसपी माधव प्रसाद श्रेष्ठले जानकारी दिए । क्षमताभन्दा बढी यात्रु राख्ने र मदिरा सेवन गरी सवारी चलाउनु नै अधिकांश दुर्घटनाको कारण भएको प्रहरीको प्रारम्भिक अनुसन्धानले देखाएको छ । दसैं–तिहारकै अवधिमा प्रदेशभर ५४ वटा आपराधिक घटना भएका छन् ।

यो प्रहरीका विभिन्न कार्यालयमा दर्ता भएका घटनाको आँकडा हो । त्यसमध्ये सार्वजनिक हित, स्वास्थ्य, सुरक्षा, सुविधा र नैतिकताविरुद्धको कसुर सम्बन्धी ८, कर्तव्य ज्यान सम्बन्धी ५, ज्यान मार्ने उद्योेग सम्बन्धी २, भवितव्य ज्यान सम्बन्धी ७, आत्महत्या ८, साधारण चोरी, जुवा खेल्न वा सट्टाबाजी गर्न नहुने सम्बन्धीका २–२ वटा घटना प्रहरीमा दर्ता भएको प्रवक्ता श्रेष्ठले जानकारी दिए ।

उनका अनुसार ठगी, आपराधिक विश्वासघात तथा आपराधिक लाभ (एक्सटर्सन) सम्बन्धी कसुर र हातहतियार खरखजना सम्बन्धिका १÷१ वटा, बहुविवाह ४, जबर्जस्तीकरणी २, जबर्जस्ती करणी उद्योगका र यौन दुर्व्यवहारका १÷१, सवारी ज्यान सम्बन्धी ८ वटा गरी ५४ वटा घटना प्रहरीमा दर्ता भएका छन् ।

प्रकाशित मिति: शुक्रबार, कात्तिक २६, २०७८ १५:४९