विवादमा योगेश भट्टराईको बोली, माधव नेपालका कार्यकर्ताले दिए चेतावनी

A+ A A-

नेकपा एकीकृत समाजवादी पार्टीको विद्यार्थी संगठन अनेरास्ववियुले एमाले सचिव योगेश भट्टराईले आफ्नो मातृ पार्टीका बारेमा दिएको अभिव्यक्तिप्रति आपत्ति जनाएको छ ।

शुक्रबार विज्ञप्ति जारी गरी अध्यक्ष सुदेश पराजुलीले आफ्नो पार्टीप्रति भट्टराईले दिएको अभिव्यक्तिले उनको आफ्नै राजनीतिक कद घटाएको बताएका छन् । उनले भट्टराईको अभिव्यक्ति कुण्ठाको अभिव्यक्ति भएको पनि अरोप लगाएको छ । आफ्नो पार्टीको कार्यालय बागमती किनारमा रहेको भन्दै भट्टराईलाई अनेरास्ववियुले प्रश्न सोधेको छ, ‘तपाईंको प्रतिगामी पार्टी एमालेको पार्टी कार्यालय कहाँ छ ?’

भट्टराईले बुधबार आयोजित पत्रकार सम्मेलनमा नेकपा एकीकृत समाजवादी पार्टीलाई अवैध सम्बन्धबाट जन्मिएको पार्टीको संज्ञा दिएका थिए । उनले भनेका थिए–एकीकृत समाजवादीलाई अवैध सम्बन्धबाट जन्मिएको पार्टी हो । हाम्रो १०औँ राष्ट्रिय महाधिवेशनमा प्रमुख राजनीतिक दलहरूलाई मात्र बोलाउने हो । अवैध सम्बन्ध र गर्भाधारणबाट जन्मिएको एकीकृत समाजवादी पार्टीलाई बोलाइरहनु पर्दैन । उनले एकीकृत समाजवादीलाई पहिचान र ठेगाना नभएको पार्टी भएको पनि टिप्पणी गरेका थिए ।

अनेरास्ववियुले सीसीको घरमा बसेर ढंगा नहान्न पनि भट्टराईलाई चेतावनी दिएको छ । ‘करोडौं राजस्व छल्नेहरूले दानमा दिएको घरमा पार्टी कार्यालय राख्नेहरूले सीसाको घरमा बसेर ढंगा हानेको कत्ति पनि सुहाएन,’ विज्ञप्तिमा भनिएको छ ।

उसले भट्टराईलाई जनताको व्यवस्थालाई कमजोर बनाएर ‘बा’ प्रवृत्तिलाई खुसी बनाउँदै नवप्रतिगामीको खरानी कति दिनसम्म घसिरहने भन्ने प्रश्न पनि गरेको छ । ‘जनताको व्यवस्थालाई कमजोर बनाएर ‘बा’ प्रवृत्तिलाई खुसी बनाउँदै नवप्रतिगामीको खरानी कति दिनसम्म घसिरहने हो ? हिजो आफैँले ओली प्रतिगमनविरुद्ध देशभर गरेको घन्काएको नारा याद छ कि छैन ?,’ विज्ञप्तिमा भनिएको छ ।

अनेरास्ववियुले कति चाँडै प्रतिगामीको मतियार बन्ने भूत जागृत भएको हो भन्ने प्रश्न पनि भट्टराईलाई गरेको छ । ‘प्रतिगमनको सेवकका रुपमा हामी क्रान्तिकारीहरूसँग जोरी नखोज्न चेतावनी पनि दिन चाहन्छौँ । कसको ठेगाना कहाँ हो ? आगामी निर्वाचनमा सार्वभौम नेपाली नागरिकले देखाइदिनेछन्,’ विज्ञप्तिमा भनिएको छ । अनेरास्ववियुले आफ्ना कुण्ठा मिश्रित अभिव्यक्ति तत्काल फिर्ता लिन भट्टराईलाई आग्रह पनि गरेको छ ।

हेर्नुस् विज्ञप्ति :