प्रदीप पौडेलको वडामा कांग्रेसको निर्वाचन प्रभावित, भण्डारी पक्षले गर्‍यो निर्वाचन सामग्री जफत

प्रदीप पौडेलको वडामा कांग्रेसको निर्वाचन प्रभावित, भण्डारी पक्षले गर्‍यो निर्वाचन सामग्री जफत

A+ A A-

तनहुँको शुक्लागण्डकी नगरपालिका- ८ मा शंकर भण्डारी पक्षले अवरोध पुर्‍याएपछि नेपाली कांग्रेसको वडा अधिवेशन रोकिएको छ । सो क्षेत्र कांग्रेस महामन्त्रीमा उम्मेदवारी घोषणा प्रदीप पौडेलको वडा हो ।

कांग्रेसको महाधिवेशन कार्यतालिका अनुसार गत १८ भदौमा नै त्यहाँ अधिवेशन भैसक्नुपर्ने हो । ढिलो गरेर हुन लागेको वडा अधिवेशन पनि भण्डारी समूहका ऋषिराम महतको टोलीले निर्वाचन कार्यालयबाटै निर्वाचन सामग्री जफत गरेपछि सम्पन्न हुन सकेन ।

सो वडामा दिपेन्द्र सिंह ठकुरी र ऋषिराम महत प्रतिस्पर्धामा छन् । दिपेन्द्र सिंह प्रदीप पौडेल निकटका हुन् भने ऋषिराम महत शंकर भण्डारीनिकटका हुन् । यता भण्डारी भने खुमबहादुर खड्काको निधनअघि उनकै निकटका रूपमा चिनिन्थे ।

ऋषिराम महत समूहले हार्ने पक्का भएपछि महाधिवेशनलाई प्रभावित गर्नेगरी कागजपत्र जफत गरेको वडा समापति कृष्णप्रसाद रेग्मीको दाबी छ । महतको टोली १८ गते राति नै कागजपत्र जफत गर्न कार्यालय पुगेको थियो ।

‘निर्वाचन हुने भनिएको दिन मतदान प्रक्रियामै अवरोध पुर्‍याउने काम भयो । विपक्षीले जित्ने निश्चित देखेपछि उनीहरूले षड्यन्त्र रचे,' रेग्मीले भने, ‘नत्र सोही दिन निर्वाचन सक्ने तयारीमा हामी थियौँ । आखिर प्रतिनिधि छान्ने हक मतदातालाई नै छ नि ।'

यद्यपि महत समूहले २० भदौमा पार्टी कार्यलयमा पुगेर माफी मागिसकेको जनाएको छ । अब सहमतिबाटै प्रतिनिधिहरू चुन्ने प्रयास भइरहेको जिल्ला पार्टी सभापति जितप्रसाद आलेले शिलापत्रलाई बताए । ‘उहाँहरूले माफि मागिसक्नुभएको छ । अब सहमतिबाटै नामावली सार्वजनिक गर्ने हाम्रो तयारी छ,' उनले भने ।

३७३ जना क्रियाशील सदस्य रहेको यस वडाबाट ३५ जना क्षेत्रीय प्रतिनिधि चुनिने व्यवस्था छ । त्यहाँ प्रदीप पौडेलको समूह बलियो देखिन्छ । तनहुँका अन्य वडाहरूमा भने सोही दिन अधिवेशन सम्पन्न भइसकेको छ ।

प्रकाशित मिति: आइतबार, भदौ २७, २०७८ १५:३८