पोखराका दुई तेल डिपोलाई तिराइयो एक लाख रुपैयाँ जरिवाना

A+ A A-

खाने तेल उद्योगको पोखरास्थित दुई डिपोलाई कारबाही गरिएको छ ।

गण्डकी प्रदेश बजार अनुगमन टोलीले मंगलबार खाने तेल उद्योगको पोखरास्थित तीनवटा डिपोमा अनुगमन गरेको थियो । तीमध्ये दुई डिपोलाई ५०-५० हजार रुपैयाँ जरिवाना तिराइएको हो ।

पोखरा-५, पर्स्याङस्थित नारायणी रिफाइनरी उद्योग र पोखरा–५ कै शिवशक्ति घ्यू उद्योगको डिपोलाई जरिवाना तिराइएको अनुगमन टोलीका संयोजक नारयण आचार्यले जानकारी दिए । नारायणीले मूल्यसूची नराखेको र शिवशक्तिले शाखा सञ्चालनको अनुमति नलिएकाले जरिवाना गरिएको हो ।

‘शिवशक्तिको उद्योग दर्ता बारामा छ तर यहाँ शाखा खोल्दा अनुमति लिनुपर्ने हो । तर, व्यवसाय गर्न कतैबाट अनुमति लिएको पाइएन,’ टोली सदस्य कपिलनाथ कोइरालाले भने । एक हप्ताभित्र शाखा दर्ता प्रक्रिया पूरा गर्न शिवशक्तिलाई निर्देशन दिइएको छ । पोखरा–८ सिमलचौस्थित दुगड ग्रुपको तेल डिपोमा भने कारबाही गर्नुपर्ने कुनै कैफियत नदेखिएको समितिले जनाएको छ ।
खाद्य, प्रविधि तथा गुण नियन्त्रण डिभिजन कार्यालय पोखरा, गुणस्तर तथा नापतौल कार्यालय पोखरा, जिल्ला प्रहरी कार्यालय कास्की, उपभोक्ता मञ्च गण्डकीका प्रतिनिधि अनुगमनमा पुगेका थिए । यसअघि केही कैफियत देखिए सम्झाइबुझाइ गरिँदै आएकोमा यसपटक जरिवाना नै तिराइएको हो ।

दुई उद्योगको डिपोलाई गरिएको कारबाही प्रदेश सरकारको संयन्त्रले गरेको पहिलो ठूलो आर्थिक कारबाही हो । २०७६ साल असोजमा प्रदेश बजार अनुगमन नियमावली २०७६ बनेपछि प्रदेश सरकारको संरचनाले नै बजार अनुगमन गर्दै आएको छ । उद्योग, वाणिज्य तथा उपभोक्त हित संरक्षण निर्देशनालयको निर्देशकका संयोजकत्वमा अनुगमन टोली रहने व्यवस्था छ ।

खाने तेलको मूल्य बढेको गुनासो आएपछि मंगलबार अनुगमन गरिएको हो । तर, खरिद र बिक्री बिल हेर्दा मूल्य बढेको नदेखिएको अनुगमन टोली सदस्य कोइरालाले बताए । ‘खुद्रा बिक्रेतालाई लिटरमै ३० रुपैयाँ फाइदा हुने गरेर एमआरपी राखेको देखियो । मूल्य १५ दिनअघि र अहिलेको उहीँ छ,’ उनले भने, ‘लिटरमै ३० रुपैयाँ बढी भयो । यसरी एमआरपीमै भारी अन्तर राख्नुको कारण सोध्न सम्बन्धित उद्योगलाई पत्रचार गर्ने तयारी छ ।’

प्रकाशित मिति: मंगलबार, भदौ १५, २०७८ १७:४२