युरोकप २०२० : यस कारण रोचक छन् समूह ‘एफ’ अन्तर्गत आज हुने खेल

A+ A A-

युरोकप २०२० अन्तर्गत ग्रुप अप डेथका रूपमा हेरिएको समूह ‘एफ’ का खेललाई निकै चासोका साथ लिइँदै आएको छ । यो समूहमा विश्व विजेता फ्रान्स, युरोकपको साविक विजेता पोर्चुगल र सन् २०१४ को विश्वकप विजेता जर्मनी छन् । यही समूहमा रहेको हंगेरी पनि सशक्त टिमका रूपमा उदाइरहेको छ ।

यो समूहअन्तर्गत फ्रान्सले जर्मनी र हंगेरीको सामना गरिसकेको छ । समूह चरणको खेलमा जर्मनीविरुद्ध जित निकालेको फ्रान्स हंगेरीसँग भने बराबरीमा रोकिएको थियो ।

यता जर्मनीले पोर्चुगललाई ४-२ गोल अन्तरले पराजित गर्‍यो । समूह चरणको पहिलो खेलमा पोर्चुगलले हंगेरीलाई हराएको थियो ।

समूह ‘एफ’मा अहिले फ्रान्स ४ अंकसहित शीर्ष स्थानमा छ । ३ अंक जोडेको जर्मनी दोस्रो स्थानमा छ भने समान ३ अंकसहित पोर्चुगल तेस्रो स्थानमा छ । १ अंक जोडेको हंगेरी समूहको अन्तिम स्थानमा छ ।

आज (बुधबार) राति पौने १ बजे फ्रान्सले पोर्चुगलको सामना गर्ने छ । पोर्चुगललाई हराएमा फ्रान्स समूह विजेता बन्नेछ ।

यता क्रिस्टियानो रोनाल्डोको टिम पोर्चुगल पनि जितको खोजीमा हुनेछ । जित निकाल्न नसके पोर्चुगल तेस्रो स्थानमा सीमित रहनेछ । त्यस्तो भएमा पोर्चुगल नकआउट चरणको सिधा छनोटमा पर्ने छैन । त्यसका लागि अन्य समूहको खेलको नतिजा कुर्नुपर्ने हुन्छ ।

फ्रान्सलाई हराउन सकेमा भने पोर्चुगलको ६ अंक हुनेछ । त्यसपछि समूह विजेता बन्न पोर्चुगलले जर्मनी र हंगेरीको नतिजा कुर्नुपर्ने हुन्छ ।

जर्मनीले हंगेरीलाई र पोर्चुगलले फ्रान्सलई हराएमा जर्मनी समूह विजेता र पोर्चुगल उपविजेता बन्नेछन् ।

फ्रान्सविरुद्ध पोर्चुगल प्रतिस्पर्धा गरिरहेकै समयमा जर्मनी हंगेरीविरुद्ध खेलिरहेको हुनेछ । जर्मनीसँग पराजित भए हंगेरी समूह चरणबाटै बाहिरिनेछ । तर, जर्मनीलाई हराउँदै हंगेरी नकआउट चरणमा प्रवेश गर्ने प्रयासमा हुनेछ ।

हंगेरीले जर्मनीलाई पराजित गर्‍यो भनेचाहिँ उसको ४ अंक पुग्नेछ र नकआउट चरणमा पुग्ने सम्भावना रहनेछ ।

त्यस्तै, पोर्चुगल फ्रान्ससँग र जर्मनी हंगेरीसँग पराजित भएमा पोर्चुगल समूह चरणबाटै बाहिरिनेछ । त्यसो भएमा हंगेरी समूहको उपविजेता बन्नेछ । त्यस्तो अवस्थामा नकआउटका लागि जर्मनीले अरु समूहको नतिजा पर्खनुपर्ने हुन्छ ।

प्रकाशित मिति: बुधबार, असार ९, २०७८ १४:०३