प्रदेश १ को प्रदेशसभा बैठक बस्दै, मुख्यमन्त्री राईविरुद्धको अविश्वासको प्रस्ताव टेबुल हुने सम्भावना

प्रदेश १ को प्रदेशसभा बैठक बस्दै, मुख्यमन्त्री राईविरुद्धको अविश्वासको प्रस्ताव टेबुल हुने सम्भावना

A+ A A-

प्रदेश १ को प्रदेशसभा बैठक आइतबार (आज) दिउँसो २ बजे बस्ने भएको छ । आज बस्ने बैठकमा मुख्यमन्त्री शेरधन राईविरुद्धको अविश्वासको प्रस्ताव टेबुल हुने सम्भावना छ ।

नेकपा प्रचण्ड–माधव समूह मुख्यमन्त्री राईविरुद्धको अविश्वासको प्रस्ताव टेबुल गरेर अघि बढ्ने तयारीमा छ भने ओली समूह भने त्यसलाई रोक्ने रणनीतिमा छ ।

मुख्यमन्त्रीविरुद्धको अविश्वासको प्रस्ताव प्रक्रियागत रूपमा अघि बढाउने प्रचण्ड–माधव पक्षको तयारी छ । त्यस्तै, नेपाली कांग्रेस पनि प्रदेशसभा बैठक स्थगित गर्न नहुने पक्षमा छ ।

माघ ७ गते सुरु भएको प्रदेश १ को प्रदेशसभा बैठक १९ दिनपछि बस्न लागेको हो । आजको प्रदेशसभा बैठक बस्नुअघि कार्यव्यवस्था परामर्श समितिको बैठक बस्दै छ । त्यसका लागि बिहान ११ बजे समितिको बैठक बोलाइएको छ ।

उक्त बैठकमा मुख्यमन्त्री राईविरुद्धको अविश्वासको प्रस्ताव टेबुल गर्नेबारेमा छलफल हुनेछ ।

७ माघमा ३ मिनेट बसेर अनिश्चितकालका लागि स्थगित भएको बैठक अविश्वास प्रस्ताव दर्ता गराएको नेकपा प्रचण्ड-माधव समूहका भीम आचार्य पक्ष र प्रमुख प्रतिपक्षी दल नेपाली कांग्रेसको चर्को दबाबपछि आज सुरु हुन लागेको हो ।

प्रदेशसभा बैठक सञ्चालन गरी अविश्वास प्रस्ताव प्रक्रियामा लैजान दबाब दिएपछि सभामुख प्रदीप कुमार भण्डारीले प्रदेशसभा बैठक आज दिउँसो २ बजेका लागि डाकेका हुन् । बैठक आज बस्ने भए पनि अहिलेसम्म बैठकको कार्यसूची तय नभएको प्रदेशसभा सचिवालयले जनाएको छ ।

प्रदेशसभा सचिव गोपाल पराजुलीले प्रदेशसभा बैठकअघि बिहान ११ बजेपछि बस्ने कार्य व्यवस्था परामर्श समितिको बैठकले कार्यसूची तय गर्ने र सोहीअनुसार बैठक अघि बढ्ने जानकारी दिए ।

बैठकमा अविश्वास प्रस्ताव प्रस्ताव अघि बढ्ने वा नबढ्ने विषय अझै अन्योलमै छ l मुख्यमन्त्री राई पक्ष अविश्वासको प्रस्ताव प्रक्रियामा लैजान नदिने रणनीतिमा छ । अविश्वासको प्रस्ताव प्रक्रियामा लग्न खोजे संसद् बैठक अवरुद्ध गरिने नेकपा प्रमुख सचेतक बुद्धिकुमर राजभण्डारीले बताए ।

अविश्वासको प्रस्ताव दर्ता गराएको भीम आचार्य पक्षले भने लोकतान्त्रिक विधिअनुसार दर्ता भएको अविश्वास प्रस्ताव प्रक्रियामा लगी छिनोफानो हुने जनाएको छ । आचार्यले अविश्वास प्रस्ताव अघि बढ्ने दाबी गरे ।

प्रकाशित मिति: आइतबार, माघ २५, २०७७ ०८:१८