बझाङमा मन्त्री ठगुन्नालाई कालो झण्डा देखाउने तयारी, पारियो सुरक्षा व्यवस्था कडा

बझाङमा मन्त्री ठगुन्नालाई कालो झण्डा देखाउने तयारी, पारियो सुरक्षा व्यवस्था कडा

A+ A A-

संघीय मामिला तथा सामान्य प्रशासन मन्त्री गणेश ठगुन्ना बझाङ आइपुगेका छन् । जिल्ला सदरमुकाम चैनपुरमा नेकपा बझाङको आयोजनामा हुन लागेको बृहत आमसभालाई सम्बोधन गर्न मन्त्री ठगुन्ना बझाङ पुगेका हुन् ।

नेकपामा विभाजन देखिएपछि नेकपाको ओली समूहले बझाङमा शक्ति प्रदर्शनसहित आमसभा गर्न लागेको हो । आमसभामा सहभागी हुन जिल्लाका विभिन्न ठाउँबाट कार्यकर्ता सदरमुकाम आइरहेका छन् । बझाङमा नेकपाका ओली र प्रचण्ड-माधव समूहले गुटगत कार्यक्रम गर्दै आएका छन् ।

मन्त्रीको आगमनलाई लक्षित गरेर जिल्ला सदरमुकाम चैनपुरको सुरक्षा व्यवस्था कडा पारिएको छ । चैनपुरको लोकतान्त्रिक चोकमा ठूलो संख्यामा नेपाल प्रहरी, सशस्त्र प्रहरी र नेपाली सेना परिचालन गरिएको छ । नेकपा प्रचण्ड-माधव समूहका कार्यकर्ताले विरोध र कालो झण्डा देखाउन सक्ने भएकाले सुरक्षा व्यवस्था कडा पारिएको हो । मन्त्री ठगुन्ना बझाङ पुग्नुअघि प्रचण्ड-माधव समूहका कार्यकर्ताले प्रधानमन्त्री केपी शर्मा ओलीविरुद्ध नाराबाजी गर्नुका साथै टायर बालेका थिए ।

नेकपाभित्रको विवाद उत्कर्षमा पुगेको बेला शान्ति व्यवस्थामा खलल पुग्ने र दुई समूहबीच झडपको स्थिति सिर्जना हुने भन्दै सुरक्षा व्यवस्था कडा पारिएको जिल्ला सुरक्षा समितिले जनाएको छ । प्रचण्ड-माधव समूहले मन्त्री ठगुन्नालाई कालो झण्डा देखाउने कार्यक्रम गरेपछि दुवै पक्षका कार्यकर्ताबीच झडपको स्थिति आउने सक्ने भन्दै सतर्कता अपनाउन सुरक्षा व्यवस्था कडा पारिएको प्रमुख जिल्ला अधिकारी कमलराज भण्डारीले बताए ।

प्रधानमन्त्री ओलीको संसद् विघटनको विरोधमा प्रचण्ड-माधव समूह आन्दोलनमा छ । सुदूरपश्चिममा कमजोर देखिएको ओली समूहले शक्ति प्रदर्शन गर्न लागेको हो । बझाङमा पनि पूर्ववनमन्त्री भानुभक्त जोशी सुदूरपश्चिम प्रदेशका सभामुख अर्जुन थापा, जिल्ला अध्यक्ष मीनबहादुर थापालगायतको समूह प्रचण्ड-माधव समूहमा देखिएका छन् ।