नेकपा सचिवालय सुरु, ओलीकाे प्रतिवेदनमाथि प्रचण्ड पक्षले जवाफ दिँदै

A+ A A-

नेकपाको सचिवालय बैठक प्रधानमन्त्री निवास बालुवाटारमा सुरु भएको छ । तीन दिनअघि अध्यक्ष तथा प्रधानमन्त्री केपी शर्मा ओलीले ३८ पृष्ठ लामो प्रतिवेदन पेस गरेपछि पहिलो पटक आज बैठक बस्न लागेको हो ।

बैठक पार्टी कार्यालय धुम्बाराहीमा बस्ने भनिए पनि सुरक्षाको कारण देखाउँदै प्रधानमन्त्री निवास बालुवाटारमै बसेको हो । सचिवालय बैठकमा प्रधानमन्त्री ओलीले १३ मंसिरमा ३८ पृष्ठ लामो जवाफी प्रतिवेदन पेस गरेका थिए ।

२८ कात्तिकमा अध्यक्ष प्रचण्डले १९ पृष्ठ लामो राजनीतिक प्रतिवेदन सचिवालय बैठकमा पेस गरेका थिए । साे प्रतिवेदनमा ओलीको कार्यशैलीमाथि कडा टिप्पणी गरिएका कारण त्यसको प्रतिवादमा अध्यक्ष ओलीले १३ मंसिरमा ३८ पृष्ठको जवाफी प्रतिवेदन पेश गरेका हुन् ।

आज ती दुवै प्रतिवेदनमाथि छलफल हुनेछ । साथै, अध्यक्ष प्रचण्डसहित ५ जना सचिवालय सदस्यले ओलीको प्रतिवेदनको जवाफमा अर्को प्रतिवेदन पेश गर्ने बताइएको छ । ओलीले पार्टी एकताभन्दा पहिलाका घटना र सन्दर्भ निकालेर अध्यक्ष प्रचण्डमाथि प्रश्न उठाएपछि त्यसको जवाफ दिने निष्र्कषमा प्रचण्ड-माधव नेपाल समूह पुगेको हो । र, यो समूह ती सबै प्रतिवेदन र अध्यक्षद्धय प्रचण्ड र ओलीबीच आदानप्रदान भएका पत्रहरूसमेत स्थायी समितिको बैठकमा छलफल गर्न लैजानुपर्ने पक्षमा छन् ।

पछिल्ला दिनमा यो समूह अध्यक्ष ओलीलाई अध्यक्ष र प्रधानमन्त्री एक पदबाट हटाउने रणनीतिमा छन् । सचिवालय, स्थायी समिति, केन्द्रीय समिति र संसदीय दलमा समेत बहुमत रहेको दाबी गर्दै प्रचण्ड-माधव समूह ओलीमाथि दबाब बढाइरहेका छन् ।

तर, ओली ती प्रतिवेदनहरू स्थायी समितिको बैठकमा नलैजाने र सकेसम्म बैठक पनि ढिलाइ गर्ने मनस्थितिमा छन् ।

आजको सचिवालय बैठकले १८ मंसिरबाट बस्ने स्थायी समितिका लागि बैठकको एजेण्डा तय गर्ने सम्भावना रहेको बताइएको छ । नेकपाको चर्किदो घरझगडाबीच भइरहेको सचिवालय बैठकलाई महत्वका साथ हेरिएको छ ।

प्रकाशित मिति: मंगलबार, मंसिर १६, २०७७ १३:२५