नरबाणेको भ्रमणले नेपाल-भारतको सम्बन्धमा सकारात्मक ऊर्जा प्रदान : सुरक्षाविज्ञ

नरबाणेको भ्रमणले नेपाल-भारतको सम्बन्धमा सकारात्मक ऊर्जा प्रदान : सुरक्षाविज्ञ

तस्वीर : नेपाली सेना

A+ A A-

भारतीय स्थल सेनाध्यक्ष मनोज मुकुन्द नरवणेको नेपाल भ्रमणले दुई देशबीचको सम्बन्धलाई सकारात्मक ऊर्जा प्रदान गरेको सुरक्षाविज्ञ उमेश भट्टराईले बताएका छन् ।

संवाद हिनताको अवस्थामा रहेको कूटनीतिलाई नरवणेको भ्रमणले केही हदसम्म सकारात्मक बनाउन सहयोग पुगेको सुरक्षाविज्ञ भट्टराईले बताए । शनिबार सुरक्षा विज्ञ भट्टराईले नरवणेको भ्रमणले नेपाल र भारतबीचको कूटनीतिक सम्बन्धलाई केही हदसम्म भए पनि गतिशिल बनाउने विश्वास जगाएको बताए ।सार्वभौम सत्ता सम्पन्न राष्ट्रको हिसाबले दुई देशबीचको सम्बन्धलाई बढाउन चाहने भए पनि एक वर्षदेखि रोकिएको प्रक्रियामा यो भ्रमणले कूटनीतिक सुरुवात भएको छ भन्ने सन्देश दिएकोले सकारात्मक रूपमा लिनुपर्ने बताए ।

‘मुख्य गरेर संवाद हिनताको अवस्थामा रहेको हाम्रो कूटनीतिलाई यसले केही हदसम्म अवस्थालाई चिर्नेकाम गर्छकी भन्ने हाम्रो अनुमान र विश्वास जगाउँछ नै । किनभने जुन किसिमले प्रधानमन्त्रीले पनि हिजो वार्ता गर्दाखेरी कुरा गर्नुभयो हाम्रो सम्बन्ध इतिहास देखिको भिन्दै किसिमको हो र एउटा सार्वभौंम सत्ता सम्पन्न राष्ट्रको हिसाबले हामी दुई देशको बीचको सम्बन्धलाई बढाउन चाहन्छौँ,' उनले भने, 'यसमा एकवर्षदेखि रोकिएको प्रक्रिया छ । त्यो कूटनीकिक पहलबाट यसको सुरुवात होस भन्ने किसिमको सन्देश दिनुभएको छ भारतीय संस्थापनलाई वा भारतको सरकारलाई । त्यसले सकारात्मक भुमिका नै खेल्छ भन्ने लाग्छ ।’

दुई देशबीचको सेनाको सम्बन्ध ब्रिटिस आर्मी रहँदा देखिकै भएकोले पनि सैन्य कूटनीतिलाई भिन्दै किसिमले व्याख्या गर्नुपर्ने आवश्यकता नरहेको उनले बताए । कूटनीति सैन्य भए पनि वा गैरसैन्य भए पनि अन्ततगत्व मुलुकलाई निकास दिन मद्दत पुग्ने पनि भट्टराईको भनाइ छ ।

‘सेनाको सम्बन्धको कुरा ब्रिटिस आर्मीको बेलादेखिकै निरन्तरता हो । यसमा भिन्दै किसिमले कूटनीति, सैन्य कूटनीतिको व्याख्या कतिपयले गरेको मैले नी सुनेको छु । तर यो होइन । कूटनीति भनेको कूटनीति नै हो । त्यो सैन्य होस वा गैरसैनिक होस,' उनले भने, 'त्यसले अन्ततगत्व मुलुकलाई एक किसिमको निकास दिनको निम्ति मद्दत गर्ने हो । त्यो हिसाबले हेर्‍यो भने सैन्य कूटनीतिलाई छुट्टै मान्नु आवश्यक छैन ।’

इतिहास देखिकै सम्बन्धका कारण नेपाली सेनाले भारतीय सेनासँग कुटनीतिक सम्बन्ध विकास गर्न खोज्नुलाई अन्यथा ठान्न नहुने पनि भट्टराईले बताए । तर स्वतन्त्र मुलुकको हिसाबले कुनै पनि स्थितिमा पछाडि हट्न नहुने र अहिलेको भ्रमणले कूटनीतिक वातावरण सकारात्मक बनाएको स्पष्ट हुने पनि उनले बताए ।

प्रकाशित मिति: शनिबार, कात्तिक २२, २०७७ १४:५४