मनोज गजुरेल, बीसौँ तीजसम्म निराहार व्रत बसेकी छु, तिमी निकाे भएर फर्किनुपर्छ- मीना ढकाल

मनोज गजुरेल, बीसौँ तीजसम्म निराहार व्रत बसेकी छु, तिमी निकाे भएर फर्किनुपर्छ- मीना ढकाल

A+ A A-

काेराेना संक्रमणबाट सिकिस्त बनेका हास्यकलाकार मनाेज गजुरेल सशस्त्र प्रहरीको बलम्बुस्थित अस्पतालकाे आइसीयूमा उपचाररत छन् । शुभचिन्तकहरू उनको स्वास्थ्यलाई लिएर चिन्तित छन् ।

यसैबीच उनकी पूर्वपत्नी मीना ढकालले शुक्रबार सामाजिक सञ्जाल फेसबुकमा भावुक स्टाटस सेयर गर्दै गजुरेलकाे स्वास्थ्यलाभकाे कामना गरेकी छन् ।

गजुरेलप्रति सम्मान र माया उत्तिकै रहेको भन्दै उनले आईसीयूमा उपचाररत रहेको समाचारले आफूलाई विक्षिप्त तुल्याएकाे बताएकी छन् । 'जतिसुकै मनमुटाव भएको भए पनि तिमी सिकिस्त भएको म सहन नसक्ने नै रहेछु, आज महसुस भइरहेछ', उनले लेखेकी छन् ।

फेसबुकमा उनले लेखेकी छन्ः

जिन्दगीले जुनसुकै मोड अख्तियार गरेको भए पनि तिमी कुनै समयको मेरो प्रेमी थियौ । मेरो आफ्नै जन्मदातालाई भन्दा बढी प्रेम तिमीलाई गरेरै तिमीसँग एकाकार भएकी थिएँ । हामी एक भएका थियौँ र म परम्पराअनुसार तिम्रो सिन्दूरको ऋणी भएकी थिएँ ।

तिम्रो सेवालाई मेरो परम धर्म ठानेर तिमीसँग मैले जीवनका बीसौँ वर्ष पार गरेकी छु । तिम्रो र मेरो आत्मीयताका साक्षी दुई प्राण छोरा र छोरी जन्माएकी छु। केही अपवादलाई बाहिर राखेर, मेरा केही खुसीहरूको गला रेटेरै पनि मैले तिमीलाई मेरो सिंगो जिन्दगी अर्पण गरेकी थिएँ ।

भलै समयले तिम्रो र मेरो बीचमा दूरी ल्यायो होला, फेरि पनि मेरा दुई सन्तानको जन्मदाताको रूपमा आज पनि म तिमीलाई उत्तिकै सम्मान गर्छु र माया गर्छु। आज तिमी आईसीयूमा उपचाररत छौ भन्ने समाचारले मलाई वि़क्षिप्त बनायो । जतिसुकै मनमुटाव भएको भए पनि तिमी सिकिस्त भएको म सहन नसक्ने नै रहेछु, आज महसुस भइरहेछ।

म तिम्रो सुस्वास्थ्यको लागि भगवानसँग प्रार्थना गर्दछु । तिम्रो जीवनसँग मेरा दुई सन्तान पनि जोडिएका छन् । तिमी ठीक छौ र त उनीहरू ढुक्क छन्, सुरक्षित छन् । छुट्टै भए पनि, टाढै भए पनि तिम्रो सलामतीले मात्रै मेरा सन्तान सलामत छन् -म यो रियलाइज गरिरहेछु ।

मेरो प्रार्थना सुन्छन् भगवानले, तिमी छिट्टै अस्पतालबाट डिस्चार्ज हुनेछौ र बाबुनानीको सामीप्यतामा पुग्नेछौ भन्ने आशामा छु । मनोज गजुरेल, तिमी छिट्टै हार मान्ने मान्छे होइनौ- मैले बीसौँ तीजका निराहार व्रत बसेकी छु तिम्रा लागि । आज पनि तिम्रो दिर्घायूको कामना गर्न छोडेकी छैन । छोराछोरी तिम्रो प्रति़क्षामा छन्..। तिमी र मबीच जस्तासुकै व्यवहारिक बेमेल भए पनि तिम्रो जीवन मेरो लागि महत्त्वपूर्ण छ । हार नमानिदेऊ । छिट्टै रिकभर भएर घर पुगेको देख्न पाऊँ !

-उही तिमीलाई आयुष्मान भएको देख्न चाहने तिम्री पूर्वअर्धाङ्गीनी !!

हास्यकलाकार मनाेज र फेसन डिजाइनर मीनाले २०७४ सालमा आपसी सहमतिमा सम्बन्ध बिच्छेद गरेका थिए । २०५३ सालमा प्रेम विवाह गरेको यो जोडी ११ पुस २०७४ देखि भक्तपुर अदालतबाट कानुनी प्रक्रिया पूरा गरेर अलग बस्न थालेको हाे । सम्बन्ध बिच्छेदपछि गजुरेल बालकोटस्थित घरमा छोरासँग र मीना नयाँ बानेश्वरमा छोरीसँग बस्दै आएका छन् ।

गजुरेललाई गत ११ कात्तिकमा कोरोना संक्रमण पुष्टि भएको थियो । कोरोना संक्रमणपछि सुरुमा होम आइसोलेसनमा रहेका उनलाई स्वास्थ्यमा थप समस्या देखिएपछि बुधबार अस्पताल भर्ना गरिएको थियो । स्वास्थ्य अवस्था जटिल बन्दै गएपछि शुक्रबार बिहान अस्पतालको आईसीयूमा सारिएको छ । चिकित्सकहरूका अनुसार उनकाे स्वास्थ्य अवस्था सुधाराेन्मुख छ । 'उहाँको स्वास्थ्य बिहानको जस्तै छ । आइसीयूमा राखेर उपचार गरिरहेका छौँ', अस्पताल स्रोतले भन्यो, 'उहाँ बोल्न सक्नुहुन्छ ।'

प्रकाशित मिति: शुक्रबार, कात्तिक २१, २०७७ २१:४८