काष्ठमण्डपको १२ वैशाखमा उद्घाटन हुने

A+ A A-

एतिहासिक काष्ठमण्डप १२ वैशाख २०७८ उद्घाटन हुने भएको छ । १२ वैशाख २०७२ गएको शक्तिशाली भूकम्पले क्षतिग्रस्त भएको काष्ठमण्डप सोही दिन उद्घाटन गर्ने तयारी भएको हो ।

परराष्ट्रमन्त्री प्रदीप ज्ञवालीले काष्ठमण्डप ध्वस्त भएकै मितिमा उद्घाटन गरिने जानकारी दिए । आज दिउँसो शहरी विकासमन्त्री कृष्णगोपाल श्रेष्ठसँग काष्ठमण्डप पुनर्निर्माणको प्रगतिका बारेमा जानकारी लिन वसन्तपुर दरबारक्षेत्र पुगेका मन्त्री ज्ञवालीले १२ वैशाखमा उद्घाटन गर्ने जानकारी गराएका हुन् ।

काष्ठमण्डप पुनर्निर्माणको अवस्थाबारे जानकारी लिँदै परराष्ट्रमन्त्री ज्ञवालीले हालसम्मको प्रगतिको प्रशंसा गरे । ‘काष्ठमण्डपको पुनर्निर्माणको अवस्था देख्दा स्थानीय जनतासहितको सहभगितामा सम्पदा निर्माणमा नमुना स्थापित भएको देखेको छु' उनले भने, 'मौलिक परम्परालाई जोगाएर तीब्रताका साथ काम भएको देख्दा सरकारका तर्फबाट मैले धन्यवाद दिनैपर्छ, यस्ता सम्पदा पुनर्निर्माणमा स्थानीय जनताको सहभागिता मुख्य देन हो ।'

शहरी विकासमन्त्री श्रेष्ठले काष्ठमण्डप क्षतिग्रस्त भएको दिन १२ वैशाख १२ बजे नै उद्घाटन गर्ने गरी तयारी भइरहेको बताए । स्थानीयको समेत सहभागितामा काष्ठमण्डप पुननिर्माण समितिमार्फत पुनःनिर्माण गर्न सुरुदेखि नै पहल थालेका मन्त्री श्रेष्ठले हालसम्मको प्रगति देखेर खुसी व्यक्त गरे । उनले भने, 'हनुमानढोका दरबारक्षेत्रलगायत देशका महत्त्वपूर्ण सम्पदा पुनर्निर्माण गर्दा स्थानीयलाई सहभागिता गराउनु आवश्यक छ ।'

उनले काष्ठमण्डप पुनर्निर्माण समितिले गरेको कामको प्रशंसा गर्दै तोकिएकै समयमा सम्पन्न गर्नु मुख्य दायित्व रहेको बताए । 'हामीले मिति घोषणा गरिसकेका छौँ, सोही आधारमा तयार थाल्न आग्रह गर्छु,' उनले भने ।

काष्ठमण्डप पुनर्निर्माण समितिका संयोजक एवं वागमती प्रदेश सांसद राजेश शाक्यले केही प्राविधिक समस्या आए पनि तोकिएकै समयमा पुनर्निर्माण सम्पन्न गर्ने प्रतिबद्धता जनाए । 'हामीले एतिहासिक जिम्मेवारी पाएका छौँ, त्यसलाई पूरा गर्नेछौँ । यो हाम्रो मुख्य कर्तब्य हो,' उनले भने ।

उनका अनुसार काष्ठमण्डप पुननिर्माण सम्पन्न गर्न करिब १३ करोड रुपैयाँ लाग्नेछ । सरकारको तर्फबाट पुनर्निर्माण गर्दा करिब १९ करोड रुपैयाँ अनुमान गरिएको थियो । काठमाडौं महानगरपालिकाको पूर्ण आर्थिक सहयोगमा पुनर्निर्माण भइरहेको सो सम्पदाको लागि महानगरपालिकाले करिब साढे १० करोड रुपैयाँ उपलब्ध गराइसकेको छ ।

प्रकाशित मिति: शुक्रबार, कात्तिक २१, २०७७ २०:४६