सरकारी वनको जग्गामा निजीक्षेत्रको रजाइँ

A+ A A-

दैलेखको चामुण्डा बिन्द्रासैनी नगरपालिकामा रहेको राष्ट्रिय रानीवन क्षेत्रको जग्गामा निजीक्षेत्रको रजाइँ चलेको छ । वनको जग्गामा व्यक्तिले धमाधम घर टहरा बनाइरहेका छन् भने केहीले दिन प्रतिदिन जग्गा अतिक्रमण गरिरहेका छन् । २०६५ सालमा मध्यपहाडी राजमार्गको विकास भएसँगै सुरू भएको अतिक्रमण दिन प्रतिदिन बढ्दो क्रममा छ ।

नगरपालिकाको कार्यालय जम्बुकाँधदेखि डौँसुरसम्म पर्ने वडा नम्बर ९, ८, ७, ६, ५ को विभिन्न क्षेत्रमा पर्ने करिब ६ किलोमिटर क्षेत्रफलमा फैलिएको सरकारी वनको जग्गा अतिक्रमण भएर बजार नै बनिसके पनि सम्बन्धित निकायको ध्यान जान सकेको छैन ।

डाँडामा फैलिएको सरकारी वनको जग्गा जम्बुकाँधदेखि वडा नम्बर ५, ७, ८ हुँदै ९ नम्बर वडासम्म फैलिएको छ । राष्ट्रिय रानीवन संरक्षण उपभोक्ता समितिका अध्यक्ष बलीराम रेग्मीले सरकारको नियम कानुनअनुसार वनको जग्गा हडपेर बस्न नपाइने भए पनि सडकको विकास भएसँगै हडपेर बसेको पाइएको बताए ।

२ वर्षपहिले आफू समितिको अध्यक्ष भएयता वनको जग्गा हडप्न केही कमी आएको भन्दै उनले बनिसकेका घरका लागि नेपाल सरकारको निर्णय पर्खेर बसेको बताए ।

यता नगरपालिकाको वडा नम्बर ८ का वडा अध्यक्ष वीरबहादुर शाहीले आफू आएदेखि जग्गा हडप्ने कामका केही कमी आएको बताए । ‘हाल बस्ती बसेको ठाउँको केही जग्गा नापी भएर पुर्जासमेत पाइसकेका छन्,’ उनले भने, ‘सडकको छेउछाउमा बनेका घरहरूमध्ये २० मिटरभित्र पर्ने घरहरू त सडक बिस्तार हुँदा सडकले नै भत्काउँछ भने बाँकी जग्गामा नेपाल सरकारको निर्णयअनुसार वन कार्यालयले आवश्यक निर्णय लिनेछ ।’

सरकारी जग्गा दिन प्रतिदिन हडप्ने काम भए पनि सरकारी क्षेत्रबाट कुनै पनि पहल नभएको वडा नम्बर ५ का वडा अध्यक्ष नारायणप्रसाद रेग्मीले जानकारी दिए ।

‘दिन प्रतिदिन जग्गा हडप्ने काम भएको छ,’ उनले भने, ‘कसैलाई रोकतोक छैन । वडा कार्यालयले केही गर्न सक्दैन । नगरपालिकाले वास्ता नै गरेको छैन ।’ वन कार्यालयको सव डिभिजनको कार्यालय नगरपालिकामै भए पनि अतिक्रमण रोकथामका लागि कुनै पनि पहल नभएको उनको भनाइ छ ।

जिल्ला वन सव डिभिजन कार्यालय जम्बुकाँधकाले कार्यालय स्थापना भएसँगै तीव्र गतिमा भइरहेको अति ग्रहण रोक्दै गएको बताएको छ । वनरक्षक बमबहादुर रावतले गएको असारमा १ सय ३२ वटा वनक्षेत्र अतिक्रमण गरेर बनाएका घरहरूको संख्या जिल्लामा पठाएको र सरकारको निर्णय पर्खेर बसेको बताए ।

दिनदिनै घर बनाइरहेका छन् । उनले भने, ‘अहिले त घरहरू बढेर २ सयभन्दा बढी पुगेको हाम्रो अनुमान छ । दिन प्रतिदिन बन्दै छन् । जति प्रयास गरे पनि रोक्न सकिएको छैन ।’

उनले थपे, ‘गैरकानुनी रूपमा घरहरू बनिरहेका छन् । अब ती घरहरूका लागि राज्यले जे निर्णय गर्छ, हामी सोहीअनुसार अघि बढ्छौँ ।’

यता नगरपालिकाले उक्त विषयमा कुनै पनि निर्णय गरेको छैन । नगरपालिका निमित्त प्रमुख प्रशासकीय अधिकृत तिलक विकले यस विषयमा नगरपालिकाले केही निर्माण नगरेको बताए ।

प्रकाशित मिति: सोमबार, फागुन ५, २०७६ १६:४१