क्यान्टिनमा बसेर तलब भत्ता बुझ्छन् सांसद

A+ A A-

प्रदेश–२ का नेताहरू संघीयताका लागि आफूहरूले सबैभन्दा बढी संघर्ष गरेको दाबी गर्छन् । तर तिनै नेताहरू प्रदेशसभाको बैठकमा अधिकांश समय अनुपस्थित देखिने गरेका छन् ।

एकातिर प्रदेश सांसदहरूलाई सुविधा बढाउने कार्य भइरहेको छ भने अर्कोतर्फ बैठकमा बढ्दो अनुपस्थिति चिन्ताको विषय बनेको छ । संघीयताको सबैभन्दा बढी आवाज उठाउने प्रदेश किन उदासीन छ भन्ने विषयमा प्रतिक्रिया दिन सांसदहरू तयार छैनन् ।

प्रदेशसभा पहिलो बैठक बसेको दुई वर्ष पूरा भएको छ । दुई वर्षसम्ममा बसेका प्रदेशसभाका ५२ वटा बैठकमा शीर्ष नेताको उपस्थिति कम देखिएको छ ।

कतिपय सांसदहरू भने बैठकमा हाजिर गरेर बाहिर निस्कन्छन् र चमेना गृहमा बसेर फर्किन्छन् ।

प्रदेशसभा सचिवालयका अनुसार समाजवादी पार्टीको तर्फबाट सरकारको नेतृत्व गरिरहेका मुख्यमन्त्री लालबाबु राउत ५२ मध्ये १४ बैठकमा मात्रै उपस्थित छन् ।

भूमि, व्यवस्था, कृषि तथा सहकारी मन्त्री शैलेन्द्रप्रसाद साह १३ दिन, आर्थिक मामिला तथा योजनामन्त्री विजयकुमार यादव २१ दिन उपस्थित भएका छन् ।

प्रदेश सरकारका मन्त्रीमध्ये सबैभन्दा बढी उपस्थिति प्रदेश सरकारका प्रवक्ता समेत रहेका आन्तरिक मामिला तथा कानुन मन्त्री ज्ञानेन्द्रकुमार यादवको रहेको छ । उनी ४१ दिन बैठकमा उपस्थित भएका छन् ।

राजपा नेपालको तर्फबाट सरकारमा नेतृत्व गरिरहेको भौतिक पूर्वाधार विकास मन्त्री जितेन्द्रप्रसाद सोनार २४ दिन उपस्थित भएका छन् । उनी राजपा संसदीय दलका नेता हुन् । राजपाका अर्का मन्त्री सामाजिक विकास मन्त्री नवलकिशोर साह सुडी १९ दिन मात्र उपस्थित भएका छन् ।

उद्योग, पर्यटन, वन तथा वातावरण मन्त्री रामनरेश राय २३ दिन उपस्थित भएका छन् । राजपाका तर्फबाट राज्यमन्त्रीहरू अभिराम शर्मा १० दिन, सुरेशकुमार मण्डल १६ दिन र डिम्पलकुमारी झा १८ दिन मात्र उपस्थित भएका छन् ।

समाजवादी पार्टीको तर्फबाट प्रदेश सरकारका राज्यमन्त्री उषाकुमारी यादव २ दिन, सरोजसिंह कुशवाहा १६ दिन र योगेन्द्रराय यादव २७ दिन उपस्थित रहेका छन् ।

प्रदेशसभामा सबैभन्दा ठूलो दल तथा प्रमुख प्रतिपक्षी दल नेकपाका संसदीय दलका नेता सत्यनारायण मण्डल ३२ दिन, प्रमुख सचेतक सुन्दर बहादुर विश्वकर्मा ३१ दिन उपस्थित भएका छन् । नेपाली कांग्रेस संसदीय दलका नेता रामसरोज यादव ३४ दिन, प्रमुख सचेतक उपेन्द्रप्रसाद कुशवाहा ३६ दिन उपस्थित भएका छन् ।

समाजवादी पार्टीका प्रमुख सचेतक शैलेन्द्रकुमार यादव ३८ दिन, राजपाका प्रमुख सचेतक परमेश्वर साह सुडी ४५ दिन उपस्थित भएका छन् ।

प्रदेश सभाको दोस्रो वर्षसम्ममा २०७५ फागुन महिनामा एउटा, चैत्रमा ३ वटा, २०७६ वैशाखमा ४ वटा, जेठमा १७ वटा, असारमा १० वटा, साउनमा ७ वटा, भदौमा ५ वटा, कात्तिकमा ३ वटा र पुसमा २ वटा गरी ५२ वटा बैठक बसेको छ ।

नेकपाका सांसद कुन्दनप्रसाद कुशवाहा सबैभन्दा कम उपस्थित भएका सांसद हुन् । उनी ५२ वटा बैठकमध्ये ९ वटा बैठकमा मात्र उपस्थित भएका छन् । राजपा नेपालका सांसद अभिराम शर्मा १० वटा बैठकमा उपस्थित भएका छन् ।

महोत्तरीबाट प्रत्यक्ष चुनाव जितेका शर्मा प्रदेश सरकारको सामाजिक विकास राज्यमन्त्रीसमेत हुन् ।

समाजवादी पार्टीका सांसद रामकिशोर प्रसाद यादव पनि ११ दिन मात्र उपस्थित भएका छन् । कम उपस्थित भएको सांसदको सूचीमा समाजवादी पार्टीका सांसद कौशलकुमार यादव पनि पर्छन् । उनी जम्मा १२ दिन संसदको बैठकमा उपस्थित भएका छन् ।

नेकपाका सांसद मोहम्मद समीर पनि १२ दिन मात्र उपस्थित भएका छन् । नेपाली कांग्रेसका धनलाल ठाकुर १४ दिन उपस्थित भएका छन् ।

सभामुख सरोजकुमार यादव ४६ दिन उपस्थित भएका छन् भने उपसभामुख उपमाकुमारी देव ४२ दिन उपस्थित भएका छन् । प्रायःजसो बैठकको सञ्चालन सभामुख यादव आफैँले गरेका छन् ।

सदन सञ्चालन गर्ने बेलामा सभामुख यादवले केही समय उपसभामुख देवलाई पनि बैठक सञ्चालन गर्ने मौका दिने गरेका छन् । सभामुख यादव अनुपस्थित भएको दिनमा भने उपसभामुख देवले नै बैठक सञ्चालन गर्ने गरेका छन् ।

राजनीतिक विश्लेषक डा. सुरेन्द्र लाभले सांसदको भूमिका सक्रियतापूर्वक नभएको प्रमाण यो तथ्यांकले देखाएको बताए । संसदमै सुत्ने, अनुपस्थिति हुने परिपाटीलाई अन्त्य गर्न पार्टीले नै सांसदहरू माथि दबाब बढाउनुपर्ने उनको सुझाव छ । पार्टीले गाइडलाइन बनाएर संसदले सक्रिय काम गरेन भने नराम्रो सन्देश जाने राजनीतिक विश्लेषक डा.लाभ बताए ।

प्रदेश सभामा १०७ जना सांसदहरू छन् । ८ जिल्ला समेटिएको प्रदेशमा ६४ जना प्रत्यक्ष र ४३ जना समानुपातिकतर्फ जितेर प्रतिनिधित्व गर्दै आएका छन् ।

प्रकाशित मिति: सोमबार, फागुन ५, २०७६ १२:३०