प्रदेश २ सरकारका मन्त्रीबीच विवाद, राजपाका मन्त्रीलाई फिर्ता बोलाइँदै

A+ A A-

प्रदेश २ मा नेकपा र राजपाको सरकार बन्ने चर्चाका बीच सरकारकै मन्त्रीहरूमा विवाद देख्न थालिएको छ । प्रदेश २ का एक जना प्रभावशाली मन्त्रीले काम नगर्ने राजपाका मन्त्रीलाई फिर्ता बोलाइने बताएका छन् ।

समाजवादी पार्टीका अध्यक्ष उपेन्द्र यादवका नजिक मानिने प्रदेश २ का कृषि तथा सहकारीमन्त्री शैलेन्द्रप्रसाद साहले अहिले मुख्यमन्त्री लालबाबु राउत काठमाडौं गएकाले फर्किनेबित्तिकै मन्त्री फिर्ता बोलाउन राजपासँग छलफल हुने बताए । आगामी हप्तादेखि यो प्रक्रियाको थालनी गरिनेसमेत उनले जानकारी दिए ।

मन्त्री साहले आजै सामाजिक सञ्जालमा लामो स्टाटस लेख्दै आज सत्ता सञ्चालन भइरहँदा विभिन्न किसिमका समस्या देखिएको बताए ।

मन्त्री साहले स्टाटसमा अगाडि लेखेका छन्, ‘तीमध्ये एउटा महत्त्वपूर्ण कारण सरकारमा सहभागी व्यक्तिहरूका कार्य, व्यवहार र आत्मपरक शैली पनि हो । यसले मौजुदा गठबन्धनकै साखमा असर परिरहेको छ । यसबारे गम्भीर मूल्यांकन हुनुपर्ने मेरो बुझाइ छ । यसका लागि सत्ता साझेदार दल राजपाको तत्परता अपेक्षित छ ।’

मन्त्री साहले आफ्नो लामो स्टाटसमा लेखेका छन्, ‘रह्यो प्रश्न सरकारमा सहभागिताको, त्यस विषयमा दुवै दलभित्र संयन्त्र छन् । अब ती संयन्त्रले मूल्यांकन गर्न विधि र प्रक्रियाको थालनी गर्नुपर्छ । र, निश्चित समयावधिभित्र एउटा ठोस निष्कर्षमा पुग्नुपर्छ । जनताको मतादेशलाई सम्मान गर्न सरकार पुनर्गठन गर्नैपरे पनि यसका लागि क्रियाशीलता देखाउनुपर्छ ।’

मन्त्रीको विचारपछि रोशनकुमार यादवले ब्यंग्यात्मक प्रतिक्रिया जनाएका छन्, ‘सरकार आफैं छोडने विचारमा हुनुहुन्छ कि राजपा पोइल गए एमालेसँग ।’

एकातिर राजपाका नेताहरूले नेकपासँग गठबन्धन गर्दा प्रदेश चलाउन सजिलो हुने बताइरहेको बेला समाजवादी पार्टीका मन्त्रीको यो प्रतिक्रियाले गठबन्धन तोडिने हल्लासँगै आगोमा घ्यू थपिएको छ । समाजवादी पार्टी स्रोतका अनुसार समाजवादी पार्टीले भौतिक योजना निर्माणमन्त्री जितेन्द्र सोनल, सामाजिक विकासमन्त्री नवलकिशोर साह र उद्योग, वन, पर्यटन तथा वातावरणमन्त्री रामनरेश रायलाई हटाउने पक्षमा समाजवादी पार्टी रहेको छ ।

विकासका प्रमुख मन्त्रालय राजपासँग रहे पनि विकास कार्यप्रति उदासीन रहेको आरोप समाजवादी पार्टीका नेताहरूले लगाएका छन् । राजपाका मन्त्रीहरूका कारण सरकार नै बदनाम भएको समाजवादी पार्टीका मन्त्रीहरूको तर्क छ ।

गत आर्थिक वर्षमा राजपाका मन्त्रीहरूले बाँडेका योजनाको भुक्तानी हुन नसकेको सन्दर्भमा प्रदेश सरकार अत्यधिक बदनाम भएको उनीहरूको दाबी छ । ‘अन्धाधुन्ध तरिकाले योजना बाँड्नुभयो,’ समाजवादी पार्टीका एक नेता भन्छन्, ‘अहिले सबैले विरोधको सामना गर्नुपरेको छ ।’

गत आर्थिक वर्षमा बाँडिएको ८ सय ४२ वटा योजनाको ९१ करोड भुक्तानी हुन बाँकी छ । गत वर्षको योजनाको यो वर्ष भुक्तानी दिन नमिल्ने कर्मचारीको तर्क छ । सभामुख सरोजकुमार यादव नेतृत्वको उच्चस्तरीय संसदीय समिति बनाएर छानविन गर्दै काम गरेबापतको भुक्तानी दिन निर्देशन दिए पनि अहिलेसम्म उपभोक्ता समितिहरूले रकम पाएका छैनन् । यसै कारण प्रदेशसभा अनिश्चितकालका लागि स्थगित भएको छ ।

जानकारहरूका अनुसार कामकाजको हिसाबले समाजवादी पार्टीका नेताहरूको पनि उस्तै अवस्था छ । आफना नातेदार तथा नजिकका व्यक्तिलाई योजना दिनुबाहेक केही गरेका छैनन् । कृषिमन्त्रीले भैंसी बाँड्दा एक जना पूर्वमन्त्रीलाई सिरहामा दिएपछि निकै आलोचना भएको थियो । समाजवादी पार्टीकै एक जना मन्त्रीले सचिव कुटेपछि सरकारको छवि खराब भएको आरोप राजपाका नेताहरूले लगाइरहेका छन् ।

एकातिर समाजवादी पार्टी र राजपामा खटपट चलिरहेको छ भने अर्कोतर्फ नेकपाका प्रदेश २ का सचिव सुमनराज प्याकुरेलले राष्ट्रियसभाको चुनावपछि लालबाबु राउत नेतृत्वको सरकार अल्पमतमा पुगेको बताएका छन् ।

प्रदेश २ मा संघीय समाजवादी पार्टीको २९ सिट, राजपा नेपालको २५ सिट, नेकपाकोे ३१ सिट नेपाली कांग्रेसको १९ सिट र नेपाल संघीय समाजवादी पार्टीको एक सिट रहेको छ ।

प्रकाशित मिति: आइतबार, माघ १२, २०७६ १९:३४