मुआब्जा विवादका कारण अवरुद्ध अरुण प्रवेश मार्ग खुल्यो

A+ A A-

संखुवासभामा निर्माणधीन ९ सय मेगावाटको अरुण तेस्रो जलविद्युत्त परियोजनाको अवरुद्ध सडक र सुरुङ निर्माणको काम सुचारु भएको छ ।

प्रवेशमार्गको छयाङकुटी—पुखुवा सडकखण्डका पीडितहरुले मुआब्जा नपाएको भन्र्दै अनिश्चितकालीन सडक बन्द गरेर आन्दोलनमा उत्रिएका थिए । स्थानीबासीले बन्द गरेको अरुण तेस्रो प्रवेश मार्ग तीन दिनपछि खुलेको हो ।

स्थानीय प्रशासन, राजनीतिक दल, गाउँपालिका र पीडितबीच चाँडै विवाद समाधान गर्ने सहमति पछि अवरुद्ध अरुण प्रवेश मार्ग खोलेको संघर्ष समितिका अध्यक्ष हर्कसिंह राईले बताए ।

लगानी बोर्डले सो सडक खण्डको मुआब्जाको विवादका विषयमा छलफल गर्न आइतबार काठमाडौंमा बैठकको आयोजना राखेको छ । सो बैठकले मुआब्जाका विषयमा नयाँ कुरा आउनेमा आशावादी भएको राईले बताए ।

काम सुरु भएको ३ वर्ष बितिसक्दा पनि मुआब्जा नपाएको उनीहरुको भनाइ छ । पहिले १५ मिटरको मुआब्जा दिएर आयोजनाले अहिले ३० मिटर जग्गा अधिग्रहण गरेको अध्यक्ष राईले बताए ।

अरुण तेस्रो परियोजनाको करिब ३० प्रतिशत काम भइसक्दा पनि मुआब्जा नपाएपछि स्थानीयले शुक्रबारबाट प्रवेश मार्गको सडक बन्द गरेर आन्दोलनमा उत्रिएका थिए । प्रवेशमार्गका स्थानीयले बिहीबारबाट भौतिक निर्माणका काम बन्द गरिदिएका थिए ।

स्थानीयले आयोजनाको दिदिङमा निर्माणाधीन पावरहाउसको सुरुङ मार्गको काम समेत ठप्प बनाएका थिए । छ्याङकुटीबाट पावरहाउस स्थल दिदिङसम्मको मुआब्जा विवाद केही वर्षदेखि कायम छ । यो खण्डमा सरकारी मूल्यअनुसार मुआब्जाको रकम नदिएपछि स्थानीयले सडक र काम ठप्प बनाएका थिए ।

यसक्षेत्रका २ सय परिवारले मुआब्जा नपाएको पीडितले गुनासो गरे । छ्याङकुटीबाट पावर हाउस सम्मको २४ किलोमिटर सडक खण्डमा मुआब्जा नपाएको संघर्ष समितीका अध्यक्ष राईले बताए ।

आयोजनाको पावर हाउस पुखुवामा भारतको पटेल इन्जिरेनिङ कन्सल्टेन्सी कम्पनीले काम गरिरहेको छ । छयाङकुटी—पुखुवा मुआब्जा संघर्ष समिति र अरुण तेस्रो सरोकार समितिले यसअघि नै पटक–पटक मुआब्जाका बिषयमा सरोकारवाला निकायहरुलाई ध्यानाकर्षण गराएपनि सुनुवाई नभएको उनीहरुले बताए ।

अरुण तेस्रोले विकास भन्दा पनि स्थानीयहरुको गाँस, बाँस खोसेर उठिबाँस लगाउन खोजेको स्थानीय नयन्द्र राईको आरोप छ । छयाङकुटी–पुखुवा सडकखण्ड २८.५ किलोमिटर रहेको छ । तर त्यसमध्ये २४.५ किलोमिटर सडकखण्डका २ सय घरपरिवारले मुआब्जा पाएका छैनन् ।

प्रकाशित मिति: आइतबार, पुस १३, २०७६ ११:४७