पूर्वमन्त्री आलमलाई जेल चलान गर्न अदालतकाे आदेश

A+ A A-

जिल्ला अदालत रौतहटले पूर्वमन्त्री तथा निलम्बित सांसद मोहमद अफताव आलमलाई पुर्पक्षका लागि थुनामा राख्ने आदेश दिएको छ । जिल्ला न्यायाधीश दीपक ढकालको इजलासले मुलुकी फौजदारी संहिता २०७४ को दफा ६७ को उपदफा १ को ख बमोजिम मुद्दा सुनुवाइ नसकिएसम्मका लागि थुनामा राख्न आदेश दिएको हो ।

१२ वर्षअघि बम विस्फोटन गराएको आरोपमा परेकाे सो मुद्दामा यही २१ कात्तिकदेखि थुनछेक बहस सुरु भएको थियो । थुनछेक मुद्दामा सरकारी वकिलको तर्फबाट ५ जना वकिलले बहस गरेका थिए । बहसमा सरकारी वकिलको कार्यालय रौतहटका जिल्ला न्यायाधिवक्ता खडिन्द्र राज कटुवाल, उपन्यायधिवक्ता अर्जुनप्रसाद कोइराला र सहन्यायाधिवक्ता सूर्यप्रसाद दाहाल, सरकारी वकिलको कार्यालय पर्साका उपन्यायधिवक्ता रुद्रप्रसाद पन्थी र सरकारी वकिलको कार्यालय रौतहटका सहन्यायधिवक्ता रामप्रसाद पन्थीले बहस गरेको रौतहट जिल्ला अदालतका स्रेस्तेदार गुणराज पराजुलीले जानकारी दिए ।

त्यसैगरी, जाहेरवालाको तर्फबाट आठ जना वरिष्ठ कानुन व्यवसायीहरूले बहस गरेका छन् । पीडितको पक्षबाट पूर्वमहान्यायाधिवक्ता डा. युवराज संग्रौला, वरिष्ठ अधिवक्ता पुष्पराज पौडेल, आशिकराम कार्की, गोविन्द शर्मा बन्दी, ओमप्रकाश अर्याल, दिनेश त्रिपाठी, डा. कुमार शर्मा आचार्यलगायतले बहस गरेका थिए ।

आलमको तर्फबाट भने पूर्वमहान्याधिबक्ता रमण श्रेष्ठलगायत २८ जना कानुन व्यवसायीले बहस गरेका थिए । प्रतिवादी आलमको पक्षबाट पूर्वमहान्याधिवक्ता रमण श्रेष्ठ, नेपाल बार एसोसिएसनका पूर्वअध्यक्षद्वय प्रेमबहादुर खडका, शेरबहादुर केसी, वरिष्ठ कानुन व्यवसायीहरू योगेन्द्र अधिकारी, सुनील पोखरेल, कृष्ण घिमिरे (भूषण) लगायतले बहस गरे ।

२७ चैत २०६४ सालमा दर्जनभन्दा बढी व्यक्तिलाई इँटाभट्टाको चिम्नीमा हालेर जिउँदै जलाएर मारेको अभियोगमा आलमविरुद्ध जिल्ला सरकारी वकिलको कार्यालयले तीनवटा मुद्दा दर्ता गराएको थियो । आलमको मुद्दा जिल्ला न्यायाधीश दिपक ढकालको इजलासमा बहस भइरहेको छ । जिल्ला अदालत रौतहटमा चलिरहेको थुनछेक बहसको अन्त्यमा आलमले भने, ‘मैले पटाकासम्म पड्काएको छैन । बमको त कुरै आउँदैन ।’

राजपुरमा बम विस्फोटनको घटना नै नभएको उनको दाबी छ । तर, घटनामा मृत्यु भएका भनिएका त्रिलोकप्रताप सिंहका बुबा श्रीनारायण सिंहले त्यसको खण्डन गरे । ‘घटना भएको छैन भने ५ लाखदेखि २ करोडसम्म दिन्छु भनेर मलाई किन भन्छन् आलमका मानिसहरूले श्रीमान् ?,’ उनले भने ।

२०६४औं सालको संविधानसभाको निर्वाचनमा रौतहटको राजपुर फरदहवामा बम विस्फोट गराएको आरोपमा आलमलाई गत असोज २६ गते रौतहट प्रहरीले पक्राउ गरेको थियो ।

प्रकाशित मिति: शुक्रबार, कात्तिक २९, २०७६ १७:४७