अन्तिमपटक भिड्दै छन् मेस्सी र रोनाल्डो, विश्वभरका फ्यान प्रतीक्षामा (भिडियो)

अन्तिमपटक भिड्दै छन् मेस्सी र रोनाल्डो, विश्वभरका फ्यान प्रतीक्षामा (भिडियो)

A+ A A-

विश्व फुटबलका दुई सुपरस्टार लियोनल मेस्सी र क्रिस्टियानो रोनाल्डो पुनः एकपटक फुटबल मैदानमा आमनेसामने हुने भएका छन् । मेस्सी आबद्ध क्लब इन्टर मायामी र रोनाल्डो आबद्ध अल नासरले रियाद सिजन कपमा एक अर्काविरुद्ध प्रतिस्पर्धा गर्ने भएका हुन् ।

अन्तर्राष्ट्रिय संचारमाध्यमहरूका अनुसार सन् २०२४ फेब्रुअरीको पहिलो हप्ताबाट सुरु हुने रियाद सिजन कपमा इन्टर मायामी, अल–नासरका साथै नेमार जुनियर आबद्ध साउदी क्लब अल हिलालले पनि प्रतिस्पर्धा गर्दै छन् । तर, घाइते भएका कारण नेमारले याे प्रतियोगिता खेल्ने छैनन् ।

यद्यपि मेस्सी र रोनाल्डोको भेट भने पक्का भएको छ । साउदीको रियाद सिजन कपका आयोजकले मेस्सी र रोनाल्डोको अन्तिम फुटबल प्रतिस्पर्धालाई ‘द लास्ट डान्स’ भनेका छन् ।

सन् २००८ मा पहिलोपटक मेस्सी र रोनाल्डो एकअर्काविरुद्ध मैदानमा उत्रिएका थिए । हालसम्म उनीहरूले ३६ खेलमा एक अर्काविरुद्ध प्रतिस्पर्धा गरिसकेका छन् । जसमध्ये मेस्सी आबद्ध टोलीले १६ खेल जितेकाे छ भने रोनाल्डो आबद्ध टोलीले ११ खेल जितेको छ ।

हाल युरोपको प्रतिस्पर्धात्मक लिगबाट यी दुवै खेलाडी बाहिरिसकेका छन् जसकारण उनीहरूबीच प्रतिस्पर्धा हुने सम्भावना निकै कम थियो । तर साउदीले रियाद सिजन कपको आयोजना गरेर मेस्सी र रोनाल्डोको भेट पक्का गरिदिएको हो ।

भिडियो

पछिल्लो समय साउदी अरबरले रोनाल्डो, नेमार, करिम बेन्जेमा, साडियो माने, एंगोलो कान्टेजस्ता विश्वचर्चित फुटबल खेलाडी साउदी प्रो लिगमा भित्र्याएको छ । साउदीले मेस्सीलाई पनि अनुबन्ध गर्न खोजेको थियो ।

मेस्सी र रोनाल्डो आमनेसामने हुने पक्का भएपछि यतिबेला विश्वभरका फुटबल समर्थक खुसी भएका छन् । विश्वकप विजेता मेस्सी कीर्तिमानी आठपटकका बालुन डि’ओर विजेता हुन् भने युरोकप विजेता रोनाल्डो पाँचपटकका बालुन डि’ओर विजेता हुन् ।

यी दुवै खेलाडीबीचको प्रतिद्वन्द्विता वर्षाैंसम्म मानिसहरूले खुबै रुचाएका थिए । यतिबेला उनीहरूबीचको सम्भावित अन्तिम खेललाई पनि मानिसहरूले व्यग्र प्रतीक्षा गरिरहेका छन् ।

प्रकाशित मिति: शुक्रबार, मंसिर ८, २०८० १२:०८