‘इन्डिया आउट’को नारा लगाउने चीननिकट मुइज्जु माल्दिभ्सको राष्ट्रपति, भारतले दियो बधाई

‘इन्डिया आउट’को नारा लगाउने चीननिकट मुइज्जु माल्दिभ्सको राष्ट्रपति, भारतले दियो बधाई

A+ A A-

चीननिकट मोहम्मद मुइज्जु माल्दिभ्सको राष्ट्रपतिमा निर्वाचित भएका छन् । उनले निकटतम प्रतिद्वन्द्वी भारतनिकट बहालवाला राष्ट्रपति इब्राहिम मोहम्मद सोलिहलाई पराजित गरेका हुन् ।

राष्ट्रपति सोलिहले हार स्वीकार गरेर नयाँ राष्ट्रपतिमा निर्वाचित मोहम्मद मुइज्जुलाई बधाई दिइसकेका छन् । राष्ट्रपतिमा निर्वाचित मुइज्जुले ५४ प्रतिशत मत प्राप्त गरेको बीबीसीले जनाएको छ ।

राजधानी मालेका मेयर रहेका मुइज्जुले चुनावअगाडि ‘इन्डिया आउट’ अर्थात् भारतलाई माल्दिभ्सबाट बाहिर निकाल्नुपर्छ भन्ने नाराका साथ चुनावी अभियान सञ्चालन गरेका थिए ।

मुइज्जुले अब आगामी नोभेम्बर १७ मा राष्ट्रपतिको पदभार ग्रहण गर्नेछन् । त्यस बेलासम्म भने सोलिहले देशमा कार्यवाहक राष्ट्रपतिको रूपमा काम गर्नेछन् ।

भारतका प्रधानमन्त्री नरेन्द्र मोदीले राष्ट्रपतिमा मुइज्जु विजयी भएकोमा उनलाई बधाई दिएका छन् । 'माल्दिभ्सको राष्ट्रपतिमा मोहम्मद मुइज्जु निर्वाचित भएकोमा उहाँलाई बधाई एवं शुभकामना । भारत–माल्दिभ्स द्विपक्षीय सम्बन्धलाई बलियो बनाउन तथा हिन्द महासागर क्षेत्रमा समग्र सहयोग अभिवृद्धि गर्न भारत प्रतिबद्ध छ,' मोदीले सामाजिक सञ्जाल एक्समा लेखेका छन् ।

सन् २०१८ देखि माल्दिभियन डेमोक्र्याटिक पार्टीको तर्फबाट ६१ वर्षे सोलिह सत्तामा थिए । उनले आफ्नो कार्यकालमा भारतसँगको सम्बन्धलाई बलियो बनाए । उनले भारत–पहिले नीतिलाई जोड दिँदै उक्त देशसँग बलियो सांस्कृतिक र वित्तीय सम्बन्ध कायम गरे ।

माल्दिभ्स लामो समयदेखि भारतको प्रभावमा रहेको क्षेत्र हो । जसका कारण भारतसँग हिन्द महासागर क्षेत्रमा निगरानीको क्षमता थियो । तर ४५ वर्षीय मुइज्जु चीननिकट मानिन्छन्, जसले इन्डिया आउटको नारासहित राष्ट्रपतिको निर्वाचन जितेका छन् । यस्तोमा अब माल्दिभ्समा भारतीय प्रभाव कम हुनेछ भने चिनियाँ प्रभुत्व बढ्नेछ ।

व्यापक रूपमा नौसेना विस्तार गरिरहेको चीन माल्दिभ्सजस्तो रणनीतिक महत्त्वको स्थानमा पहुँच चाहन्छ भने उसको प्रतिस्पर्धी भारत त्यसलाई रोक्न चाहन्छ । चीन त्यस क्षेत्रहुँदै खाडी देशबाट आफ्नोमा हुने इन्धन आपूर्तिलाई समेत सुरक्षित गर्न चाहन्छ ।

पछिल्लो दशकमा दिल्लीले माल्दिभ्सलाई दुईवटा हेलिकोप्टर र एउटा सानो विमान दिएको थियो । माल्दिभ्सको सेनाले सन् २०२१ मा ७५ जना भारतीय सैन्य कर्मचारीहरू भारतीय विमानहरू सञ्चालन र मर्मत गर्नका लागि आफ्नो देशमा आएको बताएका थिए ।

त्यसलगत्तै माल्दिभ्समा विपक्षीहरूले ‘इन्डिया आउट’ अभियान सुरु गरे, जसले भारतीय सुरक्षाकर्मीहरूलाई माल्दिभ्स छोड्न माग गर्‍यो ।

सोलिहभन्दा पहिले प्रोग्रेसिभ पार्टीका अब्दुल्ला यामिन सन् २०१३ देखि २०१८ सम्म देशका राष्ट्रपति थिए । उनको कार्यकालमा माल्दिभ्स चीनको सहयोगी बन्यो र चीनको बीआरआई परियोजनामा सामेल भएको थियो ।

यामिन हाल भ्रष्टाचारको अभियोगमा ११ वर्षको जेल सजाय काटिरहेका छन्, उनलाई यो वर्षको निर्वाचनमा उम्मेदवार हुनबाट रोक लगाइएको थियो ।

सन् १९७८ मा जन्मेका नवनिर्वाचित राष्ट्रपति मुइज्जुले बेलायतको लिड्स विश्वविद्यालयबाट सिभिल इन्जिनियरिङमा पीएचडी गरेका छन् । सन् २०१२ मा राजनीतिमा प्रवेश गरेका उनले यसअघि देशको आवासमन्त्रीको भूमिका निर्वाह गरेका थिए । सन् २०२१ मा भने उनले राजधानी मालेमा मेयरको चुनाव जितेका थिए ।

प्रकाशित मिति: आइतबार, असोज १४, २०८० १५:२६