‘साम्राज्यवादी अमेरिका मूर्दावाद’ भन्दै उत्तर कोरियामा यसरी निकालियो विरोध र्‍याली (भिडियो)

‘साम्राज्यवादी अमेरिका मूर्दावाद’ भन्दै उत्तर कोरियामा यसरी निकालियो विरोध र्‍याली (भिडियो)

A+ A A-

कोरियामा सन् १९५० देखि १९५३ सम्म तीन वर्ष गृहयुद्ध चल्यो । जून २५ सन् १९५० मा सुरु भएको गृहयुद्ध सन् १९५३ को जुलाई २७ मा टुंगियो । त्यसलगत्तै उत्तर कोरिया र दक्षिण कोरिया दुई राष्ट्रमा विभाजित भए ।

कोरियाली गृहयुद्ध सुरु भएको दिनको सम्झनामा हिजो जून २५ अर्थात् आइतबार उत्तर कोरियामा ७३औँ युद्ध वार्षिकोत्सव आयोजना भयो । बृहत् कार्यक्रम आयोजना हुँदा हिजो उत्तर कोरियाका १ लाख २० हजार युवाले वर्कर्स पार्टीको र्‍यालीमा भाग लिए, जहाँ अमेरिकाको विरोध कडा रूपमा गरियो ।

प्योङयाङको समाचार संस्था केसीएनएका अनुसार कार्यक्रममा ‘साम्राज्यवादी अमेरिका मूर्दावाद’ भन्ने नारा लगाइएको थियो । कार्यक्रममा वर्कर्स पार्टीका शीर्ष अधिकारीहरू सहभागी थिए । कार्यक्रममा सर्वोच्च नेता किम जोङ उन सहभागी थिए कि थिएनन् भनेर केही खुलाइएको छैन ।

(भिडियो)

अमेरिकाको विरोध प्रदर्शनमा उत्रिएका युवाहरूले ‘अमेरिकाविरुद्ध बदलाको युद्ध गर्छौं, पूरै अमेरिका उत्तर कोरियाको बन्दुकको निशानामा छ र साम्राज्यवादी अमेरिका शान्ति भंगकर्ता’ लेखिएको प्लेकार्ड बोकेका थिए ।

उत्तर कोरियाली जनसेनाले दक्षिण कोरियालाई आफ्नो अधीनमा ल्याउन खोजेपछि सन् १९५० मा युद्ध सुरु भएको थियो । तीन वर्षसम्म युद्ध चल्दा तत्कालीन सोभियत संघ र चीन उत्तर कोरियाको समर्थनमा लागे भने अमेरिकी नेतृत्वको संयुक्त राष्ट्रसंघका सेनाहरू दक्षिण कोरियाको समर्थनमा लागे । यस युद्धमा अनुमानित २० लाख मानिसहरू मारिए ।

उनीहरूबीचको युद्ध शान्ति सन्धिको सट्टा युद्धविराममा समाप्त भएको थियो । जसका कारण अहिले पनि यी दुई राष्ट्रबीच तनाव उत्पन्न भइरहन्छ । उत्तर कोरियाको धारणा सार्वजनिक गर्दै केसीएनएले सोमबार भनेको छ, ‘उत्तर कोरियासँग अब अमेरिकी साम्राज्यवादीहरूलाई दण्ड दिने सबैभन्दा बलियो निरपेक्ष हतियार छ र यस भूमिमा शत्रुसँग बदला लिने अदम्य इच्छाशक्ति भएका मानिसहरू छन् ।’

यस वर्ष उत्तर कोरियाले आफ्नो पहिलो ठोस इन्धन अन्तरमहादेशीय ब्यालिस्टिक क्षेप्यास्त्र परीक्षण गर्नेसमेत घोषणा गरेको छ । सर्वोच्च नेता किम सेना आधुनिकीकरण र अझ शक्तिशाली हतियारको विकास गर्ने योजनाका साथ अगाडि बढिरहेको पनि केसीएनएले जनाएको छ ।

दक्षिण कोरिया र उत्तर कोरियाले संयुक्त युद्ध अभ्यासहरू गरिरहँदा उत्तर कोरियाले आफ्नो रक्षा क्षमतालाई थप मजबुत बनाएको समाचारमा जनाइएको छ । यस्तै, उत्तरको विदेश मन्त्रालयको रिपोर्टले अमेरिकाले आणविक युद्ध छेड्न हतास प्रयास गरिरहेको दाबी गरेको छ । वासिङ्गटनले यस क्षेत्रमा रणनीतिक हतियारहरू पठाएको उत्तरको आरोप छ । अल जजिराको सहयोगमा

प्रकाशित मिति: सोमबार, असार ११, २०८० १३:५३