नेपालले नेदरल्यान्ड्स र स्कटल्यान्डसँग खेल्ने पक्का, दक्षिण अफ्रिकासँग पनि खेल्ने क्यानको प्रयास

नेपालले नेदरल्यान्ड्स र स्कटल्यान्डसँग खेल्ने पक्का, दक्षिण अफ्रिकासँग पनि खेल्ने क्यानको प्रयास

A+ A A-

आईसीसी विश्वकप क्रिकेट छनोटको लागि नेपालले दक्षिण अफ्रिकामा नेदरल्यान्ड्स र स्कटल्यान्डसँग अभ्यास खेल खेल्ने भएको छ ।

नेपाल क्रिकेट संघ (क्यान) का अनुसार नेपालले दक्षिण अफ्रिकामा गएर अभ्यास गर्ने भएको हो । क्यानका कार्यबाहक सचिव दुर्गाराज पाठकले दक्षिण अफ्रिकामा गएर अभ्यास खेल खेल्ने तयारी भइरहेको जानकारी दिए ।

‘नेदरल्यान्ड्स र स्कटल्यान्डसँग खेल खेल्ने पक्का भइसकेको हो,' पाठकले भने, 'दक्षिण अफ्रिकासँग पनि अभ्यास खेल खेल्न प्रयासरत छौँ । कुरा भइरहेको छ । तर, दक्षिण अफ्रिकासँगको खेल भने तय भइसकेको छैन ।'

दक्षिण अफ्रिका टेष्ट मान्यता प्राप्त राष्ट्र भएकाले सिनियर टिमले नेपालसँग खेल्ने सम्भावना न्यून रहेको छ । तर, दक्षिण अफ्रिकाको ए टिम अथवा बलियो टिमसँग खेल्ने सम्भावना भने रहेको कार्यबाहक सचिव पाठक बताउँछन् ।

‘हामीले सिनियर टिमसँग नै खेल्ने प्रस्ताव राखेका छौँ तर सिनियर टिमसँग खेल्ने अवस्था नरहे पनि 'ए' टिमसँग खेल्न मिल्ने वातावरण बनाउँदै छौँ,’ पाठक भन्छन् ।

नेपालले नेदरल्यान्ड्स र स्कटल्यान्डसँग खेल्ने खेलहरू अभ्यास मात्रै हुनेछ । यो खेलले एकदिवसीय अन्तर्राष्ट्रिय मान्यता भने पाउने छैन । नेपालले दक्षिण अफ्रिकामा खेल्ने अभ्यास खेलको मिति भने तय भइसकेको छैन ।

जिम्बाब्वेमा आउँदो असार ३ देखि २४ गतेसम्म विश्वकप छनोट प्रतियोगिता आयोजना हुँदैछ । विश्वकप छनोटमा आयोजक राष्ट्र जिम्बाब्वेसँगै नेपाल, दुई विश्वविजेता वेष्ट इन्डिज र श्रीलंका छन् । त्यस्तै, आयरल्यान्ड, नेदरल्यान्ड्स, यूएई, स्कटल्यान्ड, ओमान र अमेरिका छन् ।

अगामी असोज १८ देखि मंसिर ३ गतेसम्म भारतमा विश्वकप क्रिकेट आयोजना हुँदैछ । विश्वकप छनोटबाट विजेता र उपविजेताले विश्वकप छनोटमा स्थान बनाउने छन् ।

प्रकाशित मिति: बुधबार, जेठ ३, २०८० १९:३३