संकटमा खगराजको सरकार, सांसदको ठट्टाः कुर्सी साटिने भयो !

A+ A A-

पछिल्लो राजनीतिक घटनाक्रमले खगराज अधिकारी नेतृत्वको गण्डकी प्रदेश सरकार संकटमा परेको छ । अधिकारी नेतृत्वको सरकार धरापमा पर्नुका दुई कारण छन् । पहिलो- राप्रपाले संघ र प्रदेशलाई दिएको समर्थन फिर्ता लिने निर्णय गर्नु । र, दोस्रो- राष्ट्रपति चुनावले गठबन्धनको समीकरण फेरिनु ।

गण्डकीमा गत २५ पुसमा एमाले नेता अधिकारीको नेतृत्वमा माओवादी केन्द्र र राप्रपा सम्मिलित सरकार बनेको थियो । ६० सदस्यीय प्रदेश सभामा नेपाली कांग्रेसका २७, नेकपा एमालेका २२, माओवादीका सभामुखसहित ८, राप्रपाका २ र एक जना स्वतन्त्र सांसद छन् । प्रदेशमा सरकार बनाउन ३१ सांसद चाहिन्छ ।

संविधानको धारा १६८ (२) मा भएको दुई वा दुईभन्दा बढी दल मिलेर सरकार बनाउन सक्ने व्यवस्थाअनुसार त्यतिबेला एमालेका २२, माओवादीका ८, राप्रपाका २ र एक जना स्वतन्त्र सांसदको समर्थन थियो । पछि स्वतन्त्र सांसद राजीव गुरुङले विश्वासको मत दिएनन् र प्रतिपक्षमा बसेका थिए ।

राप्रपाको कार्यसम्पादन समिति र संसदीय दलको संयुक्त बैठकले शनिबार केन्द्र र प्रदेश सरकारलाई दिएको समर्थन फिर्ता लिने र सरकारबाट बाहिरिने निर्णय गरेको थियो । केन्द्रमा माओवादी चुनावअघिकै कांग्रेससहितको गठबन्धनमा फर्किएको छ । अब राप्रपा वा माओवादीमध्ये जसले समर्थन फिर्ता लिए पनि मुख्यमन्त्री अधिकारीले ३० दिनभित्र संविधानको धारा १८८ को उपधारा २ अनुसार विश्वासको मत लिनुपर्छ । ‘मुख्यमन्त्रीले प्रतिनिधित्व गर्ने दल विभाजित भएमा वा प्रदेश सरकारमा सहभागी दलले आफ्नो समर्थन फिर्ता लिएमा तीस दिनभित्र मुख्यमन्त्रीले विश्वासको मतका लागि प्रदेश सभा समक्ष प्रस्ताव राख्नु पर्नेछ,’ उक्त उपधारामा भनिएको छ ।

राष्ट्रपति चुनावपछि गण्डकीमा माओवादीले समर्थन झिक्ने सम्भावना छ । राप्रपा तत्काल सरकारबाट फिर्ता हुने पक्षमा देखिएको छैन । राप्रपा दल नेता एवं स्वास्थ्यमन्त्री पञ्चराम गुरुङले शिलापत्रसँग कुरा गर्दै आफू प्रदेश तहका नेताहरूसँग छलफलमै रहेको बताए ।

राप्रपाभन्दा अगाडि माओवादीले समर्थन फिर्ता लिएमा पनि धारा १८८ (२) अनुसार मुख्यमन्त्रीले विश्वासको मत लिनुपर्छ । अनुकूल अंकगणित नदेखिएकाले त्यस्तो अवस्थामा १८८ (३)ले अधिकारी मुख्यमन्त्रीबाट पदमुक्त हुने छन् । अधिकारी नेतृत्वको सरकार ढल्दा संविधानको धारा १६८ (३)अनुसार कांग्रेस संसदीय दलका नेता सुरेन्द्रराज पाण्डे ठूलो दलको हैसियतले मुख्यमन्त्री नियुक्त हुने छन् ।

सांसदको ठट्टाः कुर्सी साटिने भयो !

प्रदेश सभाको प्रथम अधिवेशनको चौधौं बैठक आइतबार बसेको थियो । त्यो बैठकमा सहभागी हुन पुगेका सांसदहरूबीच पछिल्लो राजनीतिक घटनाक्रमबारे गाइँगुइँ चलिरहेको थियो ।

प्रदेश सभामा सभामुखको दायाँतर्फ सत्तापक्ष र बायाँतर्फ प्रतिपक्षी बस्छन् । सत्तापक्षको ‘रो’को अन्तिममा एमालेका सुधिरकुमार पौडेल, गणेशमान गुरुङ, यशोधा रिमाल, निर्मला थापालगायत सांसद बस्छन् । प्रतिपक्षी ‘रो’को अन्तिममा स्वतन्त्र सांसद राजीव गुरुङ (दीपक मनाङे), कांग्रेसका विकल शेरचन, नम्डु गुरुङलगायत बस्छन् ।

आइतबारको बैठक सुरू हुनुअघि एमालेका पौडेल, गुरुङ, स्वतन्त्र सांसद गुरुङ र केही कांग्रेस सांसद कुरा गर्दै थिए । त्यत्तिकैमा एमाले सांसद गणेशमान गुरुङले प्रतिपक्षी ‘रो’तिर बसेका सांसदलाई भने, ‘कुर्सी साटिने भयो !’ यसपछि सत्तापक्ष र प्रतिपक्षी बेन्चको अन्तिममा बस्ने सांसदबीच हाँसो गुञ्जियो ।

सांसद गुरुङले ‘कुर्सी साटिने भयो !’ भन्नुको अर्थ हालको सरकार धरापमा रहेकोतर्फ इंगित थियो । २०८० साल सुरू हुनुअघि गण्डकीमा कांग्रेस नेतृत्वमा सरकार बन्ने सम्भावना छ ।

प्रकाशित मिति: आइतबार, फागुन १४, २०७९ १६:४१