अदालतको फैसलापछि ९ महिनामै आईजीपीबाट हटेका प्रधान बने कानुनमन्त्री

A+ A A-

नेपाल प्रहरीका पूर्वप्रहरी महानिरीक्षक ध्रुवबहादुर प्रधान कानुनमन्त्री बन्ने भएका छन् । राप्रपाबाट नवलपरासी २ बाट प्रतिनिधिसभा सदस्यमा निर्वाचित भएका प्रधान पहिलो पटक मन्त्री बन्न लागेका हुन् ।

कांग्रेसका देवेन्द्रराज कँडेललाई पराजित गर्दै प्रधानले पहिलोपटक संसदको यात्रा तय गरेका थिए । प्रधान २०५३ चैतदेखि २०५४ मंसिरसम्म नेपाल प्रहरीको आईजीपी थिए । लोकेन्द्रबहादुर चन्द नेतृत्वको सरकारले आईजीपीमा अच्युत कृष्ण खरेल हुँदाहुँदै उनलाई हटाएर प्रधानलाई नियुक्त गरेको थियो । त्याेबेला गृहमन्त्री एमालेबाट वामदेव गाैतम थिए ।

सर्वोच्च अदालतले ९ महिनापछि सरकारको उक्त नियुक्ति बदर गरेपछि खरेल आईजीपमा फर्किएका थिए । त्यसपछि प्रधान आईजीपीको जिम्मेवारीबाट हट्नुपरेको थियो । प्रधानको राजनीतिक यात्रा आईजीपीबाट हटेपछि सुरु भएको हो । २०५६ सालदेखि नै चुनावी मैदानमा उत्रिएका प्रधान २०५६, २०६४, २०७० को चुनावमा पराजित भएका थिए ।

२०७४ को चुनावमा भने कांग्रेसका देवेन्द्रराज कँडेललाई सघाए । तर, उनी राजनीतिमा अविचलित रहे । ७४ वर्षीय प्रधान राप्रपाका उपाध्यक्षसमेत हुन् । प्रहरी सेवादेखि नै हक्की स्वभावका प्रधान नेपाल ओलम्पिक कमिटी पूर्व अध्यक्ष हुन् ।

आईजीपी पछि मन्त्री बन्ने पहिलो व्यक्ति हुन् । प्रधानबाहेक अधिकांश पूर्वप्रहरी अधिकारी राजनीतिमा होमिएका छन् । यसपटकको निर्वाचनमा पूर्वआईजीपी सर्वेन्द्र खनाल काठमाडौं ६ बाट उम्मेदवार बनेका थिए । तर, उनी पराजित भए ।

त्यस्तै, पूर्वडीआईजी नवराज सिलवाल ललितपुर १ र पूर्वडीआईजी रमेश खरेल काठमाडौं १ बाट उम्मेदवार बने पनि पराजित भए । राप्रपाले तीन मन्त्री र एक राज्यमन्त्री पाएको छ । नेताहरूका अनुसार अध्यक्ष राजेन्द्र लिङ्देन आफैँ उपप्रधान तथा ऊर्जामन्त्री हुनेछन् । उपाध्यक्ष विक्रम पाण्डेलाई शहरी विकास र दीपकबहादुर सिंह ऊर्जा राज्यमन्त्री बन्दैछन् ।

प्रकाशित मिति: मंगलबार, माघ ३, २०७९ १२:२६