गणतन्त्र, संघीयता र कांग्रेसमाथि खनिँदै राप्रपा प्रवेश गरेका रवीन्द्र मिश्र

गणतन्त्र, संघीयता र कांग्रेसमाथि खनिँदै राप्रपा प्रवेश गरेका रवीन्द्र मिश्र

A+ A A-

वैकल्पिक राजनीति गर्न भन्दै पत्रकारिता छाडेका रवीन्द्र मिश्र अन्ततः राष्ट्रिय प्रजातन्त्र पार्टी प्रवेश गरेका छन् । राप्रपा अध्यक्ष राजेन्द्र लिङ्देनले वरिष्ठ उपाध्यक्ष बनाएर पार्टीमा स्वागत गरे ।

वैकल्पिक राजनीतिक धार बनाउने भन्दै मिश्रले विवेकशील पार्टी स्थापना गरे । तर, चुनावमा उनको पार्टीले अपेक्षित नतिजा निकाल्न नसकेपछि मिश्रले विवेकशील पार्टीसँग एकता गरी विवेकशील साझा पार्टी बनाए ।

तर, मिश्रले नेतृत्व गरेको पार्टी सम्हालिन भने सकेन । टुटफुट, पुनः एकता अनि फेरि फुटबाट यो पार्टी गुज्रिनुपर्‍यो । असन्तुष्ट पक्षले मूल रूपमा पार्टीको टुटफुटको जिम्मेवारी मिश्रको हुने आरोप लगाए । मिश्रले अघि सारेको 'विचारभन्दा माथि देश' बारेमा पनि उनका सहयात्रीहरू सहमत हुन सकेनन् । उतारचढावका बीच मिश्र अन्ततः राप्रपा प्रवेश गरे ।

राप्रपा प्रवेश गर्दैगर्दा मिश्र मूलतः गणतन्त्र संघीयता र नेपाली कांग्रेसमाथि खनिए । उनले खुलेर राजसंस्थाको वकालत गरे ।

राजसंस्थाको वकालत गर्दै मिश्रले राष्ट्रपति संस्थाले इमान्दारितापूर्वक काम गर्न नसकेको आरोप लगाए । सोहीकारण आफूलाई राजसंस्था चाहिने रहेछ भन्ने लागेको भने उनले ।

'जहाँ राष्ट्रपति संस्था, जुन राजनीतिभन्दा माथि उठनुपर्ने हो । त्यो संस्थाले इमान्दारितापूर्वक काम गर्दैन । जहाँ प्रधानमन्त्रीको संस्थाले इमान्दारितापूर्वक काम गर्दैन,' राजसंस्थाको वकालत गर्दै मिश्रले भने, ‘देशको निम्ति राजनीति नहुँदा स्रोत, साधन सम्पन्न देशले दुःख पायो । समाज विकृत भयो । देशकै निम्ति राजनीति गर्ने हो भने राजसंस्था हुनुपर्ने रहेछ भन्ने मलाई लाग्यो ।’

मिश्र यत्तिमै रोकिएनन् । भूराजनीतिक रूपले संवेदनशील मुलुकमा प्रशासन, प्रहरीलगायत सबै स्वार्थकेन्द्रित भएको पनि टिप्पणी गरे । अनि, कुनै पनि संस्थाले काम गर्न नसक्ने अवस्थामा द्वन्द्व भए कसले सम्हाल्ने भन्दै चिन्ता प्रकट गरे ।

'जहाँ प्रशासन र प्रहरीले इमान्दारितापूर्वक काम गर्दैन,’ मिश्रले भने, ‘जहाँ सबै स्वार्थ केन्द्रित छन् । जुन देश भूराजनीतिक रूपले संवेदनशील छ । कुनै पनि संस्थाले राम्रो काम गर्न नसक्ने ठाउँमा यदि कुनै पनि किसिमको द्वन्द्व भयो भने त्यसलाई कसले सम्हाल्ने ?’

आफूहरू कमजोर र भ्रष्ट सरकार लिएर बसेको उनको टिप्पणी थियो । ‘हामी कमजोर र भ्रष्ट सरकार र समाज लिएर बसेका छौँ,' मिश्रले भने ।

मिश्रले आफूलाई संघीयताको विपक्षमा उभ्याए । मुलुकले संघीयता धान्नै नसक्ने उनको जिकिर थियो । राजनीतिक, आर्थिक, भौगोलिक कुनै पनि रूपमा मुलुकले संघीयता धान्नै नसक्ने तर्क गरे । धर्मको नाममा, जातको नाममा राजनीति हुन थालेपछि मुलुक झनै कमजोर हुँदै गएको उनको भनाइ थियो ।

‘संघीयता आर्थिक रूपमा मात्रै होइन, राजनीतिक रूपमा पनि धान्न सकिँदैन,' मिश्रले भने, 'भौगोलिक रूपमा त झन् संघीयता धान्नै नसकिने गम्भीर विषय हो ।’

राप्रपाको वरिष्ठ उपाध्यक्ष बनेका मिश्र नेपाली कांग्रेसमाथि पनि खनिए । राप्रपा प्रवेश गर्दा आफूलाई प्रतिगमनकारी भनेर टिप्पणी भइरहेको भन्दै उनी कांग्रेसमाथि खनिए ।

‘घरमा चार तारे झण्डा राखेबापत मार्नेहरूसँग तपाईंहरू सँगै हिँड्दा प्रतिगमन नहुने, मैले राजतन्त्र पुनःथापना गर्नुपर्छ भन्दा प्रतिगमनकारी भएँ ?’ कांग्रेसलाई मिश्रको प्रश्न थियो ।

मिश्रले संवोधनका क्रममा आफूलाई नरम दक्षिणपन्थी भने । तर, पश्चगामी भने नभएको बताए । दंक्षिणपन्थी उग्र भए मात्र पश्चगामी हुने उनको तर्क थियो ।

प्रकाशित मिति: बुधबार, असोज १२, २०७९ १६:४७