सगरमाथामा क्षेत्रमा जलवायु परिवर्तनको अस्वाभाविक असर

A+ A A-

विश्वव्यापी तापक्रमको उच्च वृद्धिको चपेटामा सगरमाथासहितका हिमालहरू पर्दै गएका छन् । संयुक्त राष्ट्रसङ्घीय शैक्षिक, वैज्ञानिक तथा सांस्कृतिक सङ्गठन (युनेस्को) ले कोप–२७ अघि सार्वजनिक गरेको प्रतिवेदनअनुसार विश्वव्यापि तापक्रम वृद्धिको असरले हिमाली क्षेत्रको हिम गलनमा तीव्रता आएकाले ती क्षेत्रमा रहेका विश्वसम्पदा सूचीका प्राकृतिक सम्पदा लोप हुने अवस्थामा पुगेको देखाएको छ ।

तापक्रम वृद्धिको नयाँ गतिले दुई डिग्री सेल्सियस नाघ्ने जानकारहरूको प्रक्षेपण वास्तविकतामा परिणत भए उच्च हिमाली भेगका विश्वसम्पदा जोगाउन नसकिने युनेस्कोले चेतावनी दिएको छ ।

सगरमाथा क्षेत्रको खुम्बु हिमनदी छोटिँदै गएको छ । यस क्षेत्रबाट हरेक वर्ष बरफ बिलाउँदै गएको जनाइएको छ ।

सगरमाथा आधार शिविर क्रमशः गहिरिँदै गएको स्थानीय व्यवसायीहरू बताउँछन् । आरोहीले लगेका खानेकुरा तथा बन्दोबस्तीका सबै सामग्रीहरू आधार शिविरमै छोडेर फर्किने गरेका छन् । जसका कारण आधार शिविरमा फोहोरको मात्रा बढ्दै गएकोले पनि यहाँको तापमानमा असर गरेको छ ।

करिब १५ वर्षदेखि सगरमाथा क्षेत्रमा पर्यटन व्यवसाय गर्दै आएका साङ्गे शेर्पा पछिल्लो एक दशकमा सगरमाथा आधार शिविर भासिँदै गएको बताउँछन् । यसका कारण आधार शिविर क्रसर उद्योगजस्तो देखिन थालेको उनको भनाइ छ ।

'सगरमाथासहितका यस क्षेत्रका हिमालहरू कालो बन्दै गएको, हिमालमा जति हिउँ हुनुपर्ने हो त्यस्तो छैन । बेस क्याम्प नै पनि धेरै परिवर्तन भएको छ, बेस क्याम्प वर्षैपिच्छे खाल्डोमा परिणत हुँदै गएको छ, यो त राम्रो हैन नि,' शेर्पा भन्छन् ।

आधार शिविरमा पहिरो जाने क्रम बढ्दै गएको स्थानीय जानकारहरू बताउँछन् । विगतमा सम्म रहेको आधार शिविरमा अहिले जताततै पहिरोका कारण खाल्डो देखिएको आधार शिविरमा भेटिएका अर्का व्यवासायी पेमारिन्जी शेर्पाले बताए । 'मलाई नै थाहा हुँदा पनि बेस क्याम्प सम्म परेको थियो अहिले पूरै खाल्डोजस्तो भएको छ, पहिरोले गरेर यहाँको ग्लासियरहरू पनि घटदै गएको छ,' उनी भन्छन् ।

जलवायु परिवर्तनको असरले खुम्बु क्षेत्रको हिमालमा मात्रै नभएर बालीनाली र जनजीवनमा समेत प्रभाव परेको स्थानीय बताउँछन् । विगतमा गहुँ, फापर, जौजस्ता बालीहरू प्रशस्त उत्पादन हुने खुम्जुङ, थामेलगायत ठाउँहरूमा पछिल्लो समय उब्जाउन नै नहुने गरेको खुम्जुङकी पासाङल्हामु शेर्पाले बताइन् । उब्जाउ शक्ति घटेसँगै खेती गर्ने कृषक नहुँदा अधिकांश बारी बाँझो हुने क्रम बढेको उनको भनाइ छ ।

'यो खुम्जुङ क्षेत्रमा पहिला कति धेरै उवा, जौ, फापर खेती हुन्थ्यो तर अहिले त रोपे पनि खासै फल्दैन त्यसैले होला अहिले त खेती गर्नै छोड्यो, सबै बारी बाँझै छ अब त,' उनले भनिन् ।

केही वर्षयता हिमाली भेगका महिलामा प्रजननसम्बन्धी समस्या पनि बढ्दै गएको स्थानीय बताउँछन् । महिनावारीको अवधि लम्बिने तथा बाँझोपनाको समस्या समेत बढी देखिने गरेको स्थानीय स्वास्थ्यकर्मी ङिमडोमा शेर्पाले बताइन् । कतिपय महिलाहरू स्वास्थ्य समस्या पालेरै बस्ने गर्दछन् भने स्वास्थ्य संस्था पुग्ने महिलामा प्रजनन समस्या देखिएको उनको भनाइ छ ।

हिमालमा बेमौसमी हिमपात र तापक्रम अस्वाभाविक रूपमा बढ्दै गएको स्थानीयको अनुभव छ । मङ्सिर, पुस, माघमा हिउँ नपरेर चैत, वैशाखमा हिउँ पर्ने गरेको लबुचेका सङ्गम राईले बताए ।

'यस वर्ष पनि चैत, वैशाखमा धेरै हिमपात भयो, जबकि त्यो हिमपात पुस, माघमा हुनुपर्थ्यो, समय त कति फेरियो फेरियो भनेर साध्यै छैन,' राई भन्छन् ।

शक्ति राष्ट्रहरूले चलाएका उद्योगहरूको असर हिमाली क्षेत्रमा परेको वातावरणविज्ञ डा. राजन थापाको भनाइ छ । यही तवरबाट निरन्तर अघि बढ्ने हो भन्ने नेपालका हिमालहरू केही दशकमै सङ्कटमा पर्न सक्ने उनको चिन्ता छ । जलवायु परिवर्तनका असर न्यूनीकरण गर्न विश्व समुदाय नै अग्रसर हुनुको विकल्प नरहेको उनको भनाइ छ ।

प्रकाशित मिति: मंगलबार, वैशाख २५, २०८१ ०६:४७