गाजाको ‘राफा’मा अर्को विध्वंसको संकेत, इजरायलले सुरु गर्‍यो आक्रमण

A+ A A-

गाजा क्षेत्रको दक्षिणी शहर राफामा इजरायलले हवाई आक्रमण सुरु गरेको छ । सीएनएनका अनुसार, मंगलबार बिहानै इजरायलले गरेको आक्रमणमा परी केही मानिस मारिएका प्यालेस्टाइनी नागरिक सुरक्षा (पीसीडी)ले जनाएको छ । अरु केही घाइते भएका छन् ।

पीसीडीको विज्ञप्तिमा भनिएको छ, ‘नागरिक सुरक्षा टिमले विभिन्न घरको अवशेषबाट शहीदहरूलाई निकाल्न र केही घाइतेलाई सकुशल उद्धार गर्नमा सफलता हासिल गरेको छ । उनीहरूमाथि आज राति दक्षिणी गाजा क्षेत्रस्थित राफा प्रान्तका विभिन्न स्थानमा इजरायली युद्धक विमानद्वारा बम आक्रमण गरिएको थियो ।’

विज्ञप्तिसहित सिभिल डिफेन्सले तस्वीरहरू पनि प्रकाशित गरेको छ, जसमा बडी ब्यागभित्र कम्तीमा दुई शव देखिएका सीएनएनको समाचारमा उल्लेख छ ।

प्यालेस्टाइनको आधिकारिक समाचार एजेन्सी वाफाका अनुसार, रफामा दुई आक्रमणमा आठ प्यालेस्टाइनी मारिएका छन् । मंगलबार उसको फेसबुक अकाउण्टमा गरिएको पोस्टअनुसार, राफाको कुवेत अस्पतालले ११ जना मृत पाइएको बताएको छ ।

युद्धबाट प्रभावित अन्य क्षेत्रबाट समेत प्यालेस्टाइनीहरू राफामा शरण लिएर बसेका छन् । यो शहरमा समेत इजरायलले आक्रमण थालेपछि करिब १० लाख मानिस प्रभावित हुने आशंका छन् ।

हमास नेता इस्माइल हानेयेहले कतार र इजिप्टले गरेको गाजा युद्धविराम प्रस्ताव स्वीकार गरेको बताएको अल जजीराले लेखेको छ । तर, इजरायली प्रधानमन्त्री बेन्जामिन नेतन्याहुले प्रस्ताव आफ्नो मागभन्दा धेरै पर रहेको बाएका छन् । यद्यपि, वार्ताका लागि इजरायली सरकारले एक प्रतिनिधिमण्डल कायरो पठाउने उनको प्रष्टोक्ति छ । इजरायलको युद्ध क्याबिनेटले राफामाथि सैन्य कारबाही जारी राख्ने निर्णय गरेको छ ।

प्रकाशित मिति: मंगलबार, वैशाख २५, २०८१ ०८:१७