संस्कृत विश्वविद्यालयमा सञ्चारमन्त्री शर्मालाई शिक्षाविद्को कोटा, एमाले र माओवादीबीच भागवण्डा

संस्कृत विश्वविद्यालयमा सञ्चारमन्त्री शर्मालाई शिक्षाविद्को कोटा, एमाले र माओवादीबीच भागवण्डा

A+ A A-

नेपाल संस्कृत विश्वविद्यालयको शिक्षाविद्को कोटामा सञ्चारमन्त्री रेखा शर्मा नियुक्त भएकी छन् ।

१८ वैशाखमा सिनेट बस्नुअघि १३ वैशाखमै मन्त्री शर्मालाई शिक्षाविद्को कोटामा सिनेट सदस्यको रूपमा नियुक्त गरिएको देखिएको छ । मन्त्री शर्मालाई नियुक्त गरिएको पत्रमा भनिएको छ, ‘सम्माननीय प्रधानमन्त्री एवं नेपाल संस्कृत विश्वविद्यालयका कुलपतिज्यूबाट यहाँलाई नेपाल संस्कृत विश्वविद्यालय ऐन, २०४३ को दफा ४ को उपदफा (१) को खण्ड (ध) को रिक्त विश्वविद्यालय सभाको सदस्य पदमा सोही ऐनको दफा ४ को उपदफा (३) बमोजिम पदावधि कायम हुने गरी मिति २०८१।०१।१३ मा मनोनयन गर्ने निर्णय भएको व्यहोरा जानकारी गराउँछु ।’

पत्रमा भनिएको उपदफा (१) को खण्ड (ध) मा ‘शिक्षाविद्हरूमध्येबाट एक जना’ उल्लेख छ । यसको मतलब हाल सञ्चारमन्त्री शर्मा शिक्षाविद्को रूपमा नियुक्त भएकी हुन्, जसलाई लिएर कांग्रेसनिकट प्रजातान्त्रिक प्राध्यापक संघले असन्तुष्टिसमेत जनाएको छ ।

यसरी रिक्त रहेका पाँच सिनेट सदस्यमा भागवण्डाका आधारमा नियुक्त गरिएको विश्वविद्यालय स्रोतले जनाएको छ । विश्वविद्यालयका उपकुलपति प्राडा यादवप्रकाश लामिछानेले कांग्रेसनिकटलाई बाइपास गरी एमाले माओवादीनिकटका व्यक्तिहरूलाई नियुक्त गरेका हुन् ।

यसरी माओवादीबाट दुई जना र एमालेबाट तीन जना गरेर पाँच जना सिनेट सदस्य नियुक्त गरिएको हो । नियुक्ति खानेमा माओवादीको तर्फबाट रेखा शर्मा र निर्मल आचार्य रहेका छन् । निर्मल आचार्य माओवादी केन्द्र दाङका जिल्ला इन्चार्जसमेत हुन् । उनलाई उपदफा १(झ) मा टेकेर ‘प्रतिष्ठित समाजसेवी’को रूपमा नियुक्त गरिएको हो ।

त्यसैगरी, नेकपा एमालेका तर्फबाट ३ जनाले नियुक्ति पाएका छन् । उपदफ १(ब) बमोजिम ‘चन्दादाताको कोटा’मा ईश्वर पोखरेलले रहेका छन् भने लेखनाथ आचार्य ‘संस्कृतको प्रतिष्ठित विद्वान् कोटा’मा नियुक्ति पाएका छन् । आचार्य सेवा आयोगको अध्यक्षसमेत भइसकेका व्यक्ति हुन् ।

त्यस्तै, एमालेबाट प्रा. शिवहरि मरहट्ठा उपदफा १ (ट) अनुसार ‘पूर्वउपकुलपति’को रुपमा नियुक्त भएका छन् । यसरी १८ वैशाखमा बस्ने सिनेटका लागि १३ वैशाखमै सिनेट सदस्यमा भागवण्डाका आधारमा नियुक्त गरिएको देखिएको छ ।

प्रकाशित मिति: आइतबार, वैशाख २३, २०८१ १४:०५