बालकोट वार्ता: प्रचण्डलाई बाहिर राखेर कांग्रेस-एमालेको सरकार बनाउने शेखरको प्रस्ताव, ओलीले गरे अस्वीकार

बालकोट वार्ता: प्रचण्डलाई बाहिर राखेर कांग्रेस-एमालेको सरकार बनाउने शेखरको प्रस्ताव, ओलीले गरे अस्वीकार

A+ A A-

नेकपा एमालेका अध्यक्ष केपी शर्मा ओली र कांग्रेस नेता डा. शेखर कोइरालाबीच भेटवार्ता भएको छ । एमाले अध्यक्ष ओलीलाई भेट्न कांग्रेस नेता कोइराला उनकै निवास बालकोट पुगेका हुन् । बालकोट स्रोतका अनुसार ओली र कोइरालाबीच बुधबार राति भेटवार्ता भएको हो ।

भेटमा उनीहरूबीच पछिल्लो राजनीतिक घटनाक्रमबारे छलफल भएको छ । नयाँ सत्ता गठबन्धन बनाउन कांग्रेसका नेताहरूले एमाले नेताहरूसँगको भेटघाटलाई बाक्लो बनाइरहेका कोइरालाले अध्यक्ष ओलीलाई भेटेका हुन् । भेटमा कोइरालाले कांग्रेस र एमाले मिलेर अघि बढ्ने प्रस्ताव राखेका थिए । स्रोतका अनुसार कोइरालाले अध्यक्ष ओलीलाई माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकार ढालेर कांग्रेस-एमालेको सरकार बनाउने प्रस्ताव गरेका हुन् ।

कोइरालाले अध्यक्ष ओलीलाई कांग्रेस-एमाले मिलेर सरकार बनाउँदा देशमा स्थायित्व हुने भएकाले मिल्नुपर्नेमा जोड दिएका थिए । तर, अध्यक्ष ओलीले भने उनको प्रस्तावलाई अस्वीकार गरेको बालकोट स्रोतको दाबी छ । 'कोइरालाले एमाले र कांग्रेस मिलेर जाऔँ र सरकार पनि मिलेर चलाऔँ भन्ने प्रस्ताव अध्यक्ष ओलीसँग राख्नुभयो,' बालकोट स्रोतले भन्यो, 'तर, अध्यक्ष कमरेडले त्यो प्रस्तावलाई अस्वीकार गर्नुभयो ।'

यो पनि: बुद्धनगरमा कांग्रेस–एमालेका चार नेताकाे वार्ता, बालकाेट पुग्दासम्म गगन थापा निराश

कोइरालालाई अध्यक्ष ओलीले कांग्रेस-एमाले मिलेर सरकार बनाउने समय घर्किसकेकाले तत्काल सहकार्यको कुनै सम्भावना नरहेको जवाफ दिएका थिए । 'हिजो तपाईं हामी (कांग्रेस-एमाले) मिलौँ भनेर एमालेले प्रयास गरेकै हो । तर, तपाईंहरू (कांग्रेस) ले मिलेर अघि बढ्ने प्रस्तावलाई स्वीकार्नु भएन । अहिले तपाईंहरूले मिलेर जाऔँ भनेर प्रस्ताव गरिराख्नुभएको छ,' ओलीले कोइरालालाई भने, 'अहिले गठबन्धन भत्काउने पक्षमा हामी छैनौँ । समय घर्किसक्यो ।'

नेता कोइरालाले अध्यक्ष ओलीलाई पहिलेका कुरा बिर्सिएर नयाँ शिराबाट अघि बढौँ भन्ने प्रस्ताव पनि गरेका थिए । स्रोतका अनुसार कोइरालाको उक्त प्रस्तावमा ओलीले अहिले पुनर्विचार गर्न नसकिने बताएका छन् । कांग्रेस र एमाले मिल्नुपर्छ भन्ने लाइनमा रहेका कांग्रेस नेता डा. शखेर कोइरालाले केही दिनअघि बुद्धनगरमा एमाले उपाध्यक्ष विष्णु पौडेल र उपमहासचिव प्रदीप ज्ञवालीसँग छलफल गरेका थिए ।

कांग्रेसभित्र एमालेसँग मिलेर अघि बढ्नुपर्छ भन्ने धारमा सुरुदेखि नै कोइराला छन् । कोशीमा केदार कार्कीलाई मुख्यमन्त्री बनाउन कोइराला समूहले विद्रोह गरेको थियो । कोइराला समूहको विद्रोहमा एमालेले साथ दिएपछि कार्की कोशीको मुख्यमन्त्री बनेका थिए । तर, विश्वासको मत लिएपछि कार्कीले माओवादीसहितका दललाई पनि सरकारमा ल्याएपछि एमालेले सरकार छोडेको थियो । त्यसपछि भने एमाले कोइराला समूहसँग चिढिएको छ ।

अध्यक्ष ओलीसँगको भेटमा कोशी सरकार जोगाउन कोइरालाले सहयोग मागेको पनि बालकोट स्रोतको दाबी छ । सत्ता गठबन्धनले मुख्यमन्त्री कार्कीले विश्वासको मत लिनुपर्ने भन्दै प्रदेशसभामा पेस गरेको संकल्प प्रस्ताव पास भएको छ । तर, मुख्यमन्त्री कार्कीले संकल्प प्रस्तावलाई अवैधानिक भन्दै पद संवैधानिक रूपमा रिक्त नभएसम्म कोशीमा अर्को व्यक्ति मुख्यमन्त्री बन्न नसक्ने जवाफ प्रदेश प्रमुख पर्शुराम खापुङलाई बुझाएका छन् ।

हिन्दु धर्मको एजेन्डामा पनि छलफल !

एमाले अध्यक्ष ओली र कांग्रेस नेता कोइरालाबीच हिन्दु धर्मको एजेन्डामा पनि छलफल भएको बालकोट स्रोतको भनाइ छ । स्रोतका अनुसार कोइरालाले हिन्दु राज्य बनाउन एमाले र कांग्रेस मिलेर पहल गर्नुपर्ने बताएका थिए ।

तर, ओली त्यसमा पनि सकारात्मक नदेखिएको स्रोतको भनाइ छ । 'हामी मिलेर हिन्दु राज्य बनाउन पहल गरौँ भनेर कोइरालाले भन्नुभयो । तर, ओलीले स्पष्ट जवाफ दिनुभएन,' स्रोतको दाबी छ । कांग्रेसभित्र नेपाललाई हिन्दु राज्य बनाउनुपर्ने आवाज धेरै लामो समयदेखि उठ्दै आएको छ ।

गत फागुनमा गोदावरीमा भएको कांग्रेसको महासमिति बैठकमा केन्द्रीय सदस्य शंकर भण्डारीको नेतृत्वमा हस्ताक्षर अभियान नै चलाइएको थियो । हिन्दु राज्यका लागि चलाइएको हस्ताक्षर अभियानमा एक हजारभन्दा बढी महासमिति सदस्यहरूले साथ दिएका थिए ।

यो पनि: सरकार ढाल्न कांग्रेसले दाेहाेराे संवाद थालेपछि प्रचण्डले तयार पारे तीन विकल्प

प्रकाशित मिति: बिहीबार, वैशाख २०, २०८१ १३:३७