प्रधानमन्त्रीसहित शीर्ष नेतासँग छलफल गर्दै सभामुख घिमिरे

A+ A A-

प्रतिनिधिसभाका सभामुख देवराज घिमिरेले प्रधानमन्त्री पुष्पकमल दाहाल 'प्रचण्ड' सहितका शीर्ष नेताहरूसँग छलफल गर्ने भएका छन् ।

घिमिरेले प्रधानमन्त्री प्रचण्डसहित नेपाली कांग्रेसका सभापति शेरबहादुर देउवा, एमाले अध्यक्ष केपी शर्मा ओली, राष्ट्रिय स्वतन्त्र पार्टीका सभापति रवि लामिछाने र राष्ट्रिय प्रजातन्त्र पार्टीका अध्यक्ष राजेन्द्र लिङ्देनसँग छलफल गर्न लागेको उनको सचिवालयले जानकारी दिएको छ ।

त्यसका लागि घिमिरेले आज बिहान साढे ११ बजे सिंहदरबारस्थित उनको कार्यालयमा बस्ने गरी बैठक बोलाएका छन् । यही २८ वैशाखदेखि संसदको अधिवेशन सुरु हुँदै छ । सोही सन्दर्भमा छलफलका लागि सभामुखले बैठक बोलाएका हुन् ।

उता सहकारीको रकम अपचलन भएको प्रकरणमा उपप्रधानमन्त्री तथा गृहमन्त्री रवि लामिछाने माथि पनि अनुसन्धान हुनुपर्ने माग नेपाली कांग्रेसले गर्दै आएको छ । त्यसका लागि संसदीय समिति बनाइनुपर्ने मागसहित कांग्रेसले सदन अवरोध गर्दै आएको छ ।

संसदको आगामी अधिवेशनमा पनि उक्त माग उठाउने कांग्रेसको तयारी छ । कांग्रेसको यस्तो तयारीका बीच बजेट अधिवेशन सुरु हुन लागेको हो । सोही सन्दर्भमा सदन सुचारु रूपमा चलाउनका लागि सभामुखले शीर्ष नेताहरूसँग छलफल गर्न लागेका हुन् ।

यसअघि पनि घिमिरेले सदनको अवरोध खुलाउन शीर्ष नेताहरूसँग छलफल गरेका थिए । तर, उक्त बैठकमा सहमति हुन सकेको थिएन । घिमिरेले सदन खुलाउनका लागि प्रमुख सचेतक, सचेतक तथा कार्यव्यवस्था परामर्श समितिमा पनि छलफल गर्दै आएका छन् ।

प्रकाशित मिति: मंगलबार, वैशाख २५, २०८१ ०८:२३