उपेन्द्रको पार्टी फुट्दा माधवलाई झड्का, सीके उत्साहित

A+ A A-

उपेन्द्र यादव नेतृत्वको जनता समाजवादी पार्टी (जसपा) नेपाल विभाजनले दुईवटा साना दल प्रत्यक्ष प्रभावित भएका छन् । सत्ता गठबन्धनमा प्रमुख घटक एमाले र माओवादी केन्द्रलाई सत्ता लम्ब्याउनलाई प्रत्यक्ष फाइदा भए पनि जनमत पार्टी र एकीकृत समाजवादी खासमा प्रभावित भएका छन् ।

जसपाको विभाजनले एकीकृत समाजवादीमा विभाजनको भय बढेको छ भने जनमत पार्टीलाई उत्साहित बनाएको छ । त्यसको संकेत एकीकृत समाजवादीको २४ वैशाखको संसदीय दलको बैठकमा देखिइसकेको छ ।

संसदीय दलको बैठकमा अध्यक्ष माधव नेपालले अहिलेको समीकरणलाई निरन्तरता दिने मात्रै भनेनन्, सत्ता समीकरण फेर्न नलागेको समेत प्रष्टीकरण दिए ।

जसपाको विभाजनसँगै एकीकृत समाजवादी पनि विभाजनको संघारमा रहेको चर्चा भइरहेको थियो । एसका १० मध्ये ६ जना सांसद विभाजनको तयारीमा रहेको त्यसमा अझ थपिन सक्ने विश्लेषण भइरहेको थियो । कतिसम्म भने एसका अध्यक्ष माधव नेपाल, राजेन्द्र पाण्डे र मेटमणि चौधरीबाहेक सबै सांसद विकल्पको खोजीमा रहेको टिप्पणी भइरहेको थियो ।

हुन पनि, जसपाको विभाजन अघिसम्म सत्ता गठबन्धनको विपक्षमा सबैभन्दा चर्को अभिव्यक्ति दिने पनि यीनै तीन जना थिए । एसका अध्यक्ष नेपालले प्रधानमन्त्री पुष्पकमल दाहाल प्रचण्डकै सामुन्नेमा गठबन्धनमा असहज भएको मात्र भनेका थिएनन्, पार्टीको भातृ संगठन अखिल नेपाल महिला संघको एक कार्यक्रममा आफू प्रधानमन्त्री हुन लागेकोले केहीको पेट पोलेको भन्दै केपी ओलीलक्षित चर्को टिप्पणी गरेका थिए ।

त्यतिले नपुगेर उपाध्यक्षसमेत रहेका पाण्डेले बीबीसी नेपाली सेवासहित अन्य विभिन्न सञ्चारमाध्याममा प्रधानमन्त्री प्रचण्ड भरपर्दो नेता नभएको भन्दै कडा आलोचना गर्दै आएका थिए । नेकपा एस सत्ता गठबन्धनको विपक्षमा सक्रिय रहेको स्वतः सन्देश जाने गरी भेटघाट र अभिव्यक्ति सार्वजनिक भइरहेका थिए ।

त्यही बीचमा जसपा विभाजन भएपछि नेपालको प्रधानमन्त्री हुने लालसासहितको सक्रियतामा ब्रेक मात्र लागेको छैन, विभाजनको आंशका बढाएको छ । जसले गर्दा, नेपालले आफ्नो पद प्राप्तिको लडाइँ भन्दा पनि पार्टी जोगाउने प्रयासमा खट्नुपर्ने भएको छ । त्यसैले, २४ वैशाखको संसदीय दलको बैठकमा नेपालले निष्कर्ष सुनाएका थिए- गठबन्धनप्रति आंशका रहेको छ, असन्तुष्टि पनि छ तर अहिलेलाई निरन्तरता दिइनेछ ।

बैठकमा अधिकांश सांसद गठबन्धनको पक्षमा उभिएका थिए । त्यसले गर्दा पनि माधव नेपालमाथि गठबन्धनको निरन्तरताको पक्षमा उभिन बाध्य भएको देखिन्छ ।

नेकपा एसमा विभाजनको डर कतिसम्म छ भने असारमा हुने भनिएको महाधिवेशन सार्ने सुरसार हुँदै छ । महाधिवेशन गर्दा पार्टीभित्र असन्तुष्टि थप बढ्ने आंशका भइरहेको छ । त्यसबाहेक विभाजनको वैधानिक बाटो पनि खुल्ने माधव नेपालको डर छ । त्यसैले, जसपाको विभाजनले उपेन्द्र यादवलाई परेको चोटको मार माधव नेपाललाई पनि परेको देखिन्छ ।

जसपाका कारण माधव नेपालका लागि जति ठूलो झड्का लागेको छ त्यो भन्दा बढ्ता सुविधा भने जनमत पार्टीका सीके राउतलाई भएको छ । २०७९ को चुनावबाटै जसपा र जनमत पार्टीबीच मधेशमा वर्चश्व स्थापित गर्ने लर्डाइ थियो । त्यसको निरन्तरताकै कारण जसपा र जनमतबीच मधेश प्रदेशदेखि संघीय सरकारका गठबन्धनमा रहने वा नरहेनजस्ता मुद्दामा लडाइँ भइरहेको छ ।

जनमत मधेशमा जसपाको विकल्प बन्ने प्रयासमा छ । अहिलेसम्म मधेशमा बलियो पार्टीको रूपमा जसपा नै देखिएको थियो । त्यसलाई काउन्टर गरेर जनमत बढाउने रणनीतिमा सीके राउत छन् । मधेश प्रदेश सरकारमा जसपाको मुख्यमन्त्री फालेर जनमतले मुख्यमन्त्रीको दाबी गरेको छ । केन्द्रमा पनि जसपा गठबन्धनमा सहभागी भएकै कारण जनमतले संघीय गठबन्धन मात्र छोडेन, प्रदेशको गठबन्धनबाट पनि बाहिरियो ।

हुन पनि, जसपाले पनि आफ्नो प्रतिस्पर्धीको रूपमा जनमतलाई लिएको देखिन्छ । त्यसैले, सीके राउत र उपेन्द्र यादवको अघोषित दुश्मनीजस्तो सम्बन्ध देखिन्छ । त्यसको संकेत मधेश प्रदेश सरकारमा देखिएको थियो ।

जनमतबाट प्रदेश सरकारमा सहभागी मन्त्रीहरूले उपेन्द्र यादव सहभागी कार्यक्रमको चर्को विरोध मात्र गरेनन्, संसद अवरुद्ध नै गरे । जनमतबाट मन्त्री भएकाहरूलाई मन्त्रालय सार्ने, मन्त्रालय विभाजन गराइदिने जस्तो काम पनि भएको थियो । त्यसैले, जसपा जति कमजोर हुन्छ, जनमतले उति नै आफ्नो प्रभाव विस्तारको मौका पाउँछ । अहिले त्यही अवस्था आएको देखिन्छ । जसपा विभाजन भएर कमजोर बन्दा जनमतका लागि सहज बन्न थालेको टिप्पणी भइरहेको छ ।

प्रकाशित मिति: मंगलबार, वैशाख २५, २०८१ ०८:०७