जसपा विभाजनसँगै वैकल्पिक गठबन्धनको च्याप्टर क्लोज, अब के गर्छ कांग्रेस ?

A+ A A-

प्रमुख प्रतिपक्षी दल नेपाली कांग्रेसले प्रधानमन्त्रीको ग्यारेन्टी गरिदिएपछि त्यसका लागि संसदीय माहौल बनाउन व्यस्त थिए, नेकपा एकीकृत समाजवादीका अध्यक्ष माधवकुमार नेपाल । सरकार बनाउन आवश्यक १३८ सांसदको समर्थन जुटाउन नेकपा एसका अध्यक्ष नेपाल लागिपरेका थिए ।

तर, आइतबार सत्तारुढ दल जसपा विभाजनका लागि वरिष्ठ नेता अशोक राईसहित ७ सांसदले निर्वाचन आयोगमा निवेदन दिएपछि तत्कालका लागि वैकल्पिक गठबन्धनको बलमा प्रधानमन्त्री बन्ने नेपालको योजनामा ब्रेक लागेको त छ नै, कांग्रेसको पनि सरकारमा फर्किने बाटो अहिलेलाई बन्द भएको छ ।

कांग्रेस माओवादी केन्द्र र एमालेलाई बाहिर राखेर सरकार बनाउने प्रयासमा छ । त्यसका लागि माधव नेपाललाई प्रधानमन्त्रीमा समर्थन गर्ने वचनसमेत दिएको थियो । ‘माधव नेपालजीले वैकल्पिक गठबन्धनको तयारी गर्दै हुनुहुन्थ्यो । त्यसलाई देखाएर सत्तारुढ दल फुट्ने देखिएको छ । कांग्रेस पर्ख र हेरको अवस्थामा छ,’ कांग्रेस प्रचार विभाग प्रमुख मीन विश्वकर्माले भने ।

यो पनि : कांग्रेस-एमाले मिल्न ‘पब्लिक प्रेसर’ रहेको भन्ने कांग्रेसलाई नयाँ गठबन्धन बनाउन के छ अप्ठ्यारो ?

कांग्रेसले प्रधानमन्त्री बन्ने भए माहौल बनाउन नेपाललाई भनेको र जसपा जुनसुकै बेला सरकारबाट बाहिरिन सक्ने भएकाले जसपालाई प्रधानमन्त्रीले फुटाएको दाबी उनको छ । ‘प्रधानमन्त्री हुने भए लाग्नुस् भनेर हामीले माधव नेपाललाई भनेका थियौँ । प्रधानमन्त्रीलाई उपेन्द्र यादव र माधव नेपाल जुनसुकै बेला निस्कन सक्छन् भन्ने लागेपछि निस्कने टोलीलाई फुटाइदिनुभयो । त्यसले केही असजिलो त हुन्छ,’ विश्वकर्माले भने । मतदाता र पार्टी सदस्यलाई निराश बनाउने कुरा दलहरूको फुट रहेको उनले बताए ।

अर्को चुनावमा एकीकृत समाजवादीलाई सीमित सिट दिएर गठबन्धन गर्ने वा कमजोर उम्मेदवार खडा गरेर चुनाव जिताउन सहज वातावरण बनाउन कांग्रेस तयार देखिएको थियो । कांग्रेस राप्रपा, जसपा, एकीकृत समाजवादी, लोसपा, जनमत, नागरिक उन्मुक्ति, राष्ट्रिय जनमोर्चासहित स्वतन्त्र सांसदलाई जोडेर बहुमत पुर्‍याउने प्रयासमा थियो ।

जसअनुसार कांग्रेसको ८८, राप्रपाको १४, जसपाको १२, एकीकृत समाजवादीको १०, लोसपा ४, जनमत ६, नागरिक उन्मुक्ति ४, जनमोर्चा १ गर्दा १३९ सांसद पुग्छन् । त्यसमा अमरेशकुमार सिंहको पनि समर्थन आफूसँग रहने बुझाइ कांग्रेसको छ । जसपाको १२ मध्ये ७ सांसदले नयाँ दल दर्ताका लागि निर्वाचन आयोगमा निवेदन दिएका छन् ।

यो पनि : एकीकृत समाजवादीले माग्याे प्रधानमन्त्रीकाे ग्यारेन्टी, गृहकार्यमा जुटे कांग्रेस नेताहरू

कांग्रेस उपसभापति धनराज गुरुङ जसपामा असन्तुष्टि पहिलेदेखि रहेको र अहिले दल विभाजनले पोखिएको बताउँछन् । ‘अहिलेको घटनाले मात्र यो अवस्थामा पुगेको होइन । बारम्बार कुरा हुँदा जसपाको नेतृत्वप्रति उहाँहरूको असन्तुष्टि थियो । अहिले बाहिर आयो,’ उनले शिलापत्रसँग भने ।

कांग्रेस सत्ता फेरबदलको दौडमा नरहेको उनले बताए । दलका नेताहरूबीचको भेटवार्ता स्वाभाविक रहेकाले त्यसलाई खेल हुने रूपमा बुझ्न नहुने उनको भनाइ छ । ‘अहिले कुनै पार्टीलाई लिएर बहुमत पुर्‍याउने कुरा नै वाहियात हो । हामी प्रमुख प्रतिपक्षमा रहेर जनताको आवाजलाई मुखरित गर्ने पक्षमा छौँ,’ उनले भने । कुनै दल फुट्दा र जुट्दा कांग्रेसलाई फरक नपर्ने उनले बताए ।

‘शेरबहादुर देउवासँग माधव नेपालले भेटे भनेर अनर्गल प्रचार गर्न खोजिएको छ,’ उनले भने, ‘हामी यो खेलमा छैनौँ । अहिलेको सरकारलाई खबरदारी गर्ने बाटोमा हामी छौँ ।’

वैकल्पिक गठबन्धनको प्रयास असफल भए पनि एमालेसँग मिलेर सरकार बनाउने विकल्प भने कांग्रेससँग अझै छ । कांग्रेस-एमाले मिलेर संविधान संशोधन गरेर निर्वाचन प्रणाली फेर्नुपर्ने मत कांग्रेसभित्र बलियो छ । इतर समूहका नेता डा. शेखर कोइरालाले यसको वकालत गर्दै आएका छन् । यसमा अन्य नेताहरूको पनि सहमति छ ।

जसपा विभाजनको भोलिपल्ट (सोमबार) कञ्चनपुर पुगेका कांग्रेसका प्रमुख सचेतक रमेश लेखकले एमाले र कांग्रेस मिल्नुपर्ने बताए । ‘नेपाली कांग्रेस र एमालेभित्र ठूला दल मिलेर सरकार बनाउनुपर्छ भन्ने मत बलियो छ । जनता पनि ठूला दल मिलेर मुलुकलाई सही दिशामा लैजानुपर्छ भन्नेमा छन्,' पत्रकार भेटघाटमा लेखकले भने । कांग्रेस र एमालेबीच सत्ता सहकार्यका लागि ठोस कुरा भने नभएको उनले बताए ।

यो पनि: ओलीसँग सहकार्य गर्न ‘शेखर ट्र्याक’ प्रयाेग गरिरहेका देउवा

प्रकाशित मिति: सोमबार, वैशाख २४, २०८१ १२:५८