ओलीसँग सहकार्य गर्न ‘शेखर ट्र्याक’ प्रयाेग गरिरहेका देउवा

फाइल तस्वीर

A+ A A-

२० फागुनमा थाहै नपाई सरकारबाट बर्खास्तगीमा परेको प्रतिनिधिसभाको ठूलो दल नेपाली कांग्रेस अहिले दोस्रो ठूलो दल एमालेसँग सहकार्य गर्ने बाटोको खोजीमा छ । माओवादी केन्द्रसहितको गठबन्धनमा रहँदा कांग्रेसको संस्थापनइतर समूहले एमालेसँग सहकार्य गर्नुपर्छ भनिरहेको थियो । समूहका नेता शेखर कोइरालाले एमालेको साथ लिएर कोशी प्रदेशमा सफलतापूर्ण विद्रोह गराएका थिए । र, केदार कार्की मुख्यमन्त्री बनेका थिए ।

अहिले सत्ता गठबन्धनबाट बाहिरिएपछि सभापति शेरबहादुर देउवा एमालेसँग सहकार्य गर्न इच्छुक देखिएका छन् । एमाले अध्यक्ष केपी शर्मा ओलीसँग सहकार्य गर्ने विषयमा शेखरसँग देउवाले पटकपटक छलफल गरेका छन् । उता ओलीसँग भने शेखरको सम्बन्ध कांग्रेस सरकारमा रहँदा र सरकार बाहिर रहँदा उस्तै छ । आवश्यक पर्दा भेटघाट हुने र विभिन्न माध्यमबाट निरन्तर शेखर र ओली संवादमा रहेको शेखरनिकट नेताहरू बताउँछन् ।

शेखर र ओलीको निकटतालाई सत्ता सहकार्यमा पुर्‍याउन लागिपरेका देउवाले सो विषयमा छलफल गर्नका निम्ति बूढानीलकण्ठमा शेखरलाई बोलाउने गरेका छन् । मध्यचैतमा देउवाले यही विषयमा छलफलका लागि शेखरलाई बोलाएका थिए । शेखरले गर्ने पार्टीका कुरा नसुने पनि एमालेसँगको सहकार्यमा भने देउवा सकारात्मक छन् ।

बिहीबार विराटनगरमा शेखरले देशमा स्थिरता दिन र विकास गर्न नेपाली कांग्रेस र नेकपा एमाले एक ठाउँमा उभिनुपर्ने बताएका थिए । विगतका अनुभव हेर्दा पनि नेपाली कांग्रेस र नेकपा एमाले मिलेपछि मात्रै संविधान बनेको भन्दै उनले देशकाे विकास गर्न एमाले र कांग्रेस मिल्नुको विकल्प नरहेको तर्क दिएका थिए ।

सरकार बनाउने र ढाल्ने प्रक्रियामा मात्र नेताहरू व्यस्त भएका बताउँदै शेखर स्थिर सरकार बनाउन एमाले र कांग्रेस मिलेर जानुपर्ने बताउँदै आएका छन् । समानुपातिक प्रणाली प्रतिनिधिसभामा हटाएर समानुपातिक समावेशिताको ग्यारेन्टी प्रत्यक्ष टिकट वितरण गर्दा वा राष्ट्रियसभाबाट गर्न सकिने धारणा उनी राख्दै आएका छन् ।

यसअघि माओवादीसँगको गठबन्धनलाई निरन्तरता दिनुपर्छ भनेर देउवाले एमाले अध्यक्ष ओलीसँगको भेटलाई समेत निषेध गरेका थिए । त्यो बेलामा समेत शेखरले एमालेसँग सहकार्य गर्नुपर्ने बताउने गरेकाे उनीनिकट नेताहरू बताउँछन् ।

‘प्रचण्डसँग सहकार्य गर्नुपर्छ, गठबन्धन कायम राख्नुपर्छ भनेर सभापतिज्यूले भनिरहँदा शेखर दाइले अहिले खतरनाक चीज निर्वाचन प्रणाली भयो । यसका लागि एमालेसँग मिलेर संविधान संशोधन गर्नुपर्छ भनिरहनुभएको थियो,' शेखरनिकट एक नेताले शिलापत्रसँग भने, ‘यसमा सभापति नरम भएको देखिन्छ । ओलीसँग विभिन्न माध्यमबाट कुरा भइरहेको छ । पहिला शेखर दाइको एजेन्डा मात्र थियो । अहिले कांग्रेसको मुद्दा हुन सक्ने देखिन्छ ।’

एमालेसँग सहकार्य गर्न विभिन्न सम्पर्क सूत्रको प्रयोग गरिरहेका देउवाले एउटा बलियो सूत्र शेखर हुने बुझेर उनलाई वातावरण सहज बनाउन आग्रह गर्दै आएका छन् ।

अहिले स्थिरताका लागि एमाले-कांग्रेस सहकार्यको आवश्यकता रहेको कांग्रेस संस्थापन पक्षका नेताहरू पनि बताउन थालेका छन् । ‘अहिले बन्न सक्ने र बन्न बाँकी कांग्रेस-एमालेको समीकरणको सरकार हो । यी दुई दलको सरकार बन्दा संविधान आयो । अब कार्यान्वयन गरेर स्थिरता दिनका लागि बाँकी रहेको समीकरण पनि बनाऊँ भन्ने हो,’ कांग्रेस प्रचार विभाग प्रमुख मीन विश्वकर्माले शिलापत्रसँग भने ।

शेखरनिकट नेताहरूले आन्तरिक छलफलमा पनि शेखरलाई एमालेसँग मिल्ने वातावरण बनाउन सुझाव दिँदै आएका छन् । ‘गठबन्धन नबनी सरकार नबन्ने भयो । दुई ठूला पार्टी मिल्ने माग भएको छ । हामीले पनि सुझाव दिने गरेका छौँ,’ कांग्रेस नेता सुरेन्द्रराज आचार्यले शिलापत्रसँग भने । चार महिनामा सरकार परिवर्तन हुँदा चुनावी घोषणापत्रअनुसार काम गर्न नपाएको र चुनावमा जनतासँग गरिएको वाचा पूरा गर्न त परको कुरा, सुरुवात गर्नसमेत गाह्रो भएको उनले बताए ।

उता, कांग्रेस-एमाले सहकार्यको ढोका जहिल्यै खुला रहेको एमाले अध्यक्ष ओलीले २५ फागुन २०७९ मा राष्ट्रपतिको चुनाव हुँदा भनेका थिए । उनले कांग्रेस र एमालेको सरकार बन्दैन भन्न नसकिने बताएका थिए । ‘राजनीतिमा जे पनि सम्भव छ, केही पनि असम्भव छैन भन्छन् नि, त्यही हो । कांग्रेस र एमाले एक ठाउँमा नआउने भनेर कसम खाएका छैनौँ,’ उनले एक वर्ष अगाडि भनेका थिए ।

अहिले सरकारको नेतृत्व गर्न पाउने स्थितिमा एमाले छ । कांग्रेस वर्तमान गठबन्धन भत्काउन सरकारको नेतृत्व दिन तयार रहेको एमालेको बुझाइ छ ।

प्रकाशित मिति: आइतबार, चैत २५, २०८० २०:३३