एकीकृत समाजवादीले माग्याे प्रधानमन्त्रीकाे ग्यारेन्टी, गृहकार्यमा जुटे कांग्रेस नेताहरू

एकीकृत समाजवादीले माग्याे प्रधानमन्त्रीकाे ग्यारेन्टी, गृहकार्यमा जुटे कांग्रेस नेताहरू

A+ A A-

नेपाली कांग्रेसले सरकारमा फर्कन अनेक बाटो अख्तियार गर्ने रणनीति बनाइरहँदा सुदूरपश्चिम प्रदेश सरकार गठनमा एकीकृत समाजवादीको विद्रोह सहायक हुन सक्ने देखिएको छ । सत्ता गठबन्धनका प्रमुख घटक एमाले र माओवादी केन्द्रसँग रिसाएकाे एसले आफूसँग मिलेर नयाँ गठबन्धन बनाउन सहयाेग गर्नेमा कांग्रेसका नेताहरू आशावादी देखिन थालेका छन् ।

सुदूरपश्चिममा कांग्रेसबाट मुख्यमन्त्री बनेका कमलबहादुर शाहले २२ चैतमा राजीनामा दिएपछि प्रदेश प्रमुख नाजिर मियाँले संविधानको धारा १६८ को २ अनुसार दुई वा दुईभन्दा बढी दलको समर्थनमा मुख्यमन्त्रीमा दाबी पेस गर्न २ वैशाखसम्मको समय दिएका थिए ।

केन्द्रमा भागवण्डाकाे कुराे नमिलेपछि सुदूरपश्चिम प्रदेश सरकार निर्माणमा सत्तारुढ दल एकीकृत समाजवादीले कांग्रेससहितकाे गठबन्धनलाई समर्थन गरेकाे छ । नाउपाका रेशम चौधरी पक्षीय लक्ष्मणकिशोर चौधरीले कांग्रेस, एकीकृत समाजवादी र राप्रपाको समर्थन जुटाएर मुख्यमन्त्रीमा दाबी पेस गरेका छन् । नाउपा रञ्जिता श्रेष्ठ पक्षीय कैलाश चौधरीले पनि एमाले र माओवादी केन्द्रको समर्थन मुख्यमन्त्री दाबी पेस गरेका छन् ।

लक्ष्मणकिशोरलाई कांग्रेसका १८, एकीकृत समाजवादीका ४, नाउपाको ७ र राप्रपाका १ गरी ३० सांसदको समर्थन छ । त्यस्तै, नाउपाकै कैलाशलाई एमालेका १०, माओवादी केन्द्रका १० र स्वतन्त्र सांसद तारा जोशीको समर्थन छ । नाउपाका सात सांसदहरू अन्तिम समयसम्म कतातिर खुल्छन् भन्ने कुराले पनि अर्थ राख्न सक्नेछ ।

सुदूरपश्चिममा एकीकृत समाजवादीको राजनीतिक मूभलाई केन्द्रमा उपयोग गर्ने रणनीतिमा कांग्रेस छ । तर, समय रहुञ्जेल सत्ता गठबन्धनलाई घुर्क्याउने र माधवकुमार नेपाललाई प्रधानमन्त्री बनाउनेगरी आफूहरू लाग्ने एसका एक शीर्ष नेताले बताए । ‘हामीलाई जहिले पनि पद दिने भनेर लोभ देखाउने काम मात्र भयो । कार्यान्वयनमा कुनै प्रतिबद्धता आएनन् । समय रहुञ्जेल हामी हेर्छौं । कतै प्रधानमन्त्री दिने वातावरण पो बनिहाल्छ कि,’ एकीकृत समाजवादीका एक पदाधिकारीले शिलापत्रसँग भने ।

कांग्रेससहितको सत्ता गठबन्धन हुँदा पनि एकीकृत समाजवादीका अध्यक्ष माधव नेपाललाई प्रधानमन्त्री बनाउने सहमति भएकाे थियाे । अहिले गठबन्धन फेरिँदा पनि एसले प्रधानमन्त्री पाउनुपर्ने दाबी गरिरहेकाे छ । सो कुरा बुझेको कांग्रेसले आलाेपालाेमा माधवकुमार नेपाललाई पनि प्रधानमन्त्री दिन सकिने बारेमा छलफल अघि बढाएको छ । सभापति शेरबहादुर देउवानिकट नेताहरू यसको गृहकार्यमा जुटेका छन् ।

‘माधव नेपाललाई एक कार्यकाल प्रधानमन्त्रीको ग्यारेन्टी गरिदिने हो भने तत्काल अहिलेको सरकार एसले छाेडिदिन्छ । हामीले सभापति शेरबहादुर देउवालाई पनि यही ब्रिफिङ गरिरहेका छौँ,’ कांग्रेसको संसदीय फाँट हेर्ने एक सांसदले शिलापत्रसँग भने ।

कांग्रेस सरकारमा रहेका प्रमुख दलबिनाको सरकार बनाउन प्रयत्नशील रहेको सांसद प्रदीप पौडेल बताउँछन् । अंग गणितमा थोरै मात्र माथि रहेकाेले अहिलेकाे गठबन्धन भत्किन समय नलाग्ने उनकाे दाबी छ । सत्तारुढ दल नमिल्ने कुराको बीजारोपण सुदूरपश्चिममा भइसकेकाे पनि उनले बताए । ‘यो गठबन्धनका मुख्य शक्तिबाहेक अन्य साना शक्तिसँग मिलेर गठबन्धन गरेर अघि बढ्ने कुरामा कांग्रेस सकारात्मक छ । तर, त्यस्तो परिस्थिति अहिले बनिसकेको भने छैन,’ पौडेलले भने ।

कांग्रेसको यो अफरबारे आफूहरूले अध्ययन गरिरहेकाे एकीकृत समाजवादीका उपमहासचिव तथा प्रवक्ता जगन्नाथ खतिवडाले बताए । ‘राजनीतिक दलहरूले जता फाइदा हुन्छ र जनताको पक्षमा काम गर्न सकिन्छ, त्यतै लाग्ने हो नि,’ उनले शिलापत्रसँग भने ।

प्रकाशित मिति: सोमबार, वैशाख ३, २०८१ १६:२९