जयगढ–रामारोशन सडक कालोपत्रेमा ढिलाइ

A+ A A-

अछामको जयगढ–रामरोशन सडकखण्ड कालोपत्रे योजनामा ढिलाइ भएको छ । सो सडकखण्डको बान्नीगढी–जयगढ गाउँपालिका जयगढ बजारदेखि दर्नासम्मको कालोपत्रे योजनामा ढिलाइ भएको हो ।

सडक कालोपत्रे योजनाको जिम्मा लिएको बज्रगुरु कन्ट्रक्सनले ढिलासुस्ती गर्दा योजनाको कामले गति लिन सकेको छैन । पूर्वाधार बिकास कार्यालय अछामले जयगढ–माझेठाना– गौता खोलासम्म (साढे १२ किलोमिटर) कालोपत्रे गर्न बज्रगरुसँग २०७६ कार्तिक १९ गते २४ करोड ७७ लाख ९० हजार ३६९ रुपैयाँमा ठेक्का सम्झौता गरेको थियो ।

सम्झौताअनुसार बज्रगुरुले सडक कालोपत्रे कार्य २०७९ असार १७ गतेसम्म सम्पन्न गरिसक्नु पर्नेछ । तर योजना सम्पन्न गर्न ८ महिना बाँकी रहँदा बज्रगुरुले सडक कालोपत्रे योजनाको ५० प्रतिशत पनि काम गर्न सकेको छैन् ।

योजना सम्पन्न गर्नका लागि ८ महिनामात्र बाँकी रहँदा नाली खन्ने र ग्रावेलको काम समेत सुरु भएको छैन् ।

निर्माण कम्पनीले सडक कालोपत्रे योजनामा ढिलाइ गरेको भन्दै स्थानीय आक्रोशित बनेका छन् । यो सडक सुदूरपश्चिम प्रदेशको मुख्य पर्यटकीय क्षेत्र रामारोशन जाने प्रवेश बिन्दु हो ।

सडक फराकिलो बनाउन नयाँ कटिंग गरिएका ठाउँ र सडकका बिभिन्न ठाउँमा खसेको पहिरो र हिलोसँगै धुलाम्य सडकका कारण हाल रामारोशन पर्यटकीय क्षेत्र अवलोकनका लागि पर्यटकलाई असहज हुने गरेको छ ।

सुदूरपश्चिम प्रदेशको मुख्य पर्यटकिय क्षेत्र रामारोशन क्षेत्र जोड्ने जयगढ–रामारोशन सडक कालोपत्रेको जिम्मालिएको बज्रगुरु कन्ट्रक्सनले काममा ढिलासुस्ती गर्दा पर्यटन क्षेत्र समेत प्रभावित बनेको स्थानीय लक्ष्मण साउदले बताए ।

सडक क्षेत्रभित्र पर्ने २५ घरटहरा भत्काउन बाँकी

कालोपत्रे योजनाअनुसार सडक निर्माण गर्दा जयगढदेखिमा झेठानासम्म २५ भन्दा धेरै घर तथा टहरा भत्काउनुपर्ने देखिएको छ । सडक क्षेत्रभित्र पर्ने घरटहरा धनीले भने निर्माण कम्पनीले आफूहरूसँग घरटहरा हटाउनेबारे कुनै पनि परामर्श समेत नगरेको बताएका छन् ।

कुनै पनि सल्लाह नगरी घरटहरा हटाउने सूची तयार गरिएको भन्दै स्थानीय तपेन्द्र साउदले आक्रोश पाखेका छन् । मापदण्डअनुसार सडक क्षेत्रभित्र घर टहरा परे पनि घरटहरा हटाउन तथा व्यवस्थापन गर्न सल्लाह गर्नुपर्ने भए पनि नगरिएको उनको भनाइ छ ।

सडक निर्माण कार्यमा ढिलाइ र्भरहेकोबारे साइट प्राविधिक उज्वल के.सी भने कोरोना संक्रमण फैलिएको अवस्थामा लामो समय निशेधाज्ञा कायम हुँदा समस्या भएको बताउँछन् ।