लुम्बिनी : वर्तमान सरकार अल्पमतमा रहेको भन्दै प्रदेश प्रमुखलाई विपक्षी गठबन्धनले गरायो ध्यानाकर्षण

लुम्बिनी : वर्तमान सरकार अल्पमतमा रहेको भन्दै प्रदेश प्रमुखलाई विपक्षी गठबन्धनले गरायो ध्यानाकर्षण

A+ A A-

लुम्बिनी प्रदेशका विपक्षी गठबन्धनले नवनियुक्त प्रदेश प्रमुख अमिक शेरचनलाई भेटी वर्तमान सरकार अल्पमतमा र अवैध रहेको भन्दै ध्यानाकर्षण गराएको छ ।

नेपाली कांग्रेस, माओवादी केन्द्र, जनता समाजवादी र राष्ट्रिय जनमोर्चाका प्रदेश सभा सदस्यहरूले प्रदेश प्रमुखको कार्यालय पुगेर शंकर पोखरेल नेतृत्वको प्रदेश सरकार अल्पमत र असंवैधानिक रहेको भन्दै ध्यानाकर्षण गराएका हुन् ।

झण्डै ३८ जनाको संख्यामा सशरीर उपस्थित भएका विपक्षी गठबन्धनका सांसदहरूले सरकारले असंवैधानिक प्रणाली स्थापित गर्न खोजेको बताउँदै सरकारको गलत नियतबाट बच्न प्रदेश प्रमुखको ध्यानाकर्षणसमेत गराएका छन् ।

विपक्षी गठबन्धनले प्रदेश प्रमुखसमक्ष बुझाएको ध्यानाकर्षण पत्रमा प्रदेश प्रमुखबाट संवैधानिक र कानुनी मर्मअनुसार प्रक्रिया थाल्न आग्रह गर्दै ६ वैशाखमा अविश्वासको प्रस्ताव आएपछि मुख्यमन्त्री पोखरेलले विश्वासको मत लिनुको साटो सरकारबाट राजीनामा दिएको, २१ वैशाखमा गैरकानुनी नियुक्ति भइ सरकार चलाएको समेत उल्लेख गरिएको छ ।

यस्तै आफूलाई संविधानको धारा १६८ को १ अनुसार सरकार बनाउन विमला खत्री वली, दीर्घनारायण पाण्डे र अम्मरबहादुर डाँगीको किर्ते हस्ताक्षर बुझाएको, ३१ असारमा जबरजस्ती बजेट अधिवेशन अन्त्य गरी १ साउनमा अध्यादेशबाट बजेट ल्याएर एकपछि अर्को रूपमा संविधानलाई कमजोर बनाएको विपक्षीहरूले आरोप लगाएका छन् ।

प्रदेश प्रमुखलाई ध्यानाकर्षण पत्र बुझाउने क्रममा बोल्दै कांग्रेस संसदीय दलका नेता वीरेन्द्रकुमार कानोडियाले मुख्यमन्त्रीलाई पटक-पटक संविधानअनुसार हिँड्न र सरकारको वैधानिकता पुष्टि गर्न आग्रह गरे पनि मुख्यमन्त्रीले बलमिचाइपूर्ण तरिकाले बेवास्ता गरेको बताए ।

प्रकाशित मिति: शनिबार, साउन १६, २०७८ १९:२३