सरकारको पूर्णता र बजेट छलफलको टुंगो छैन, रिबन काट्न निस्किए मुख्यमन्त्री

A+ A A-

गण्डकी प्रदेशमा कांग्रेस नेतृत्वमा गठबन्धन सरकार बनेको २० दिन पुगिसक्यो । मन्त्रालयको विषयमा मन नमिल्दा सरकारले पूर्णता पाउन सकेको छैन । आगामी आर्थिक वर्षको बजेटमाथिको छलफल पनि सुरु भएको छैन ।

आगामी आर्थिक वर्ष २०७८/०७९ का लागि १ असारमा संसदमा प्रस्तुत बजेटमाथि छलफल गर्ने भनेर सरकारले अहिलेसम्म संसदलाई जानकारी गराएको छैन । सरकारलाई पूर्णता दिन र रेडबुकको टुंगो लाग्न नसक्दा बजेटमाथिको छलफल प्रारम्भ गर्न नसकेका मुख्यमन्त्री कृष्णचन्द्र नेपाली पोखरेल उद्घाटनमा निस्किएका छन् ।

कांग्रेस–माओवादीको ‘भौतिक मोह’मा अड्कियो गण्डकीको गठबन्धन

उनले शुक्रबार दिउँसो पोखरामा एउटा सहकारीको शाखा उद्घाटन गरे । पोखरा ८ सिर्जनाचोकमा खुलेको हब कोअपरेटिभ सर्भिस लिमिटेडको कास्की सेवा केन्द्रको मुख्यमन्त्री पोखरेलले शुक्रबार शुभारम्भ गरेका हुन् ।

मुख्यमन्त्री पोखरेलले सहकारीले प्रविधिलाई आत्मसात गर्दै उत्पादनशील क्षेत्रमा लगानी गर्न आग्रह गरे । ससाना लगानी संकलन गरी उत्पादनशील क्षेत्रमा लगानी गर्न समृद्धिका लागि सहायकसिद्ध हुने बताए ।

बखानसिंह गुरुङले नेपालमा सहकारी अभियान सुरु गरेको स्मरण गर्दै उनले प्रथम निर्वाचित प्रधानमन्त्री विपी कोइरालाले इजरायलसँग सम्बन्ध विस्तार गरेर सहकारीलाई थप उचाइमा पुर्‍याएको सुनाए ।

उनले गण्डकी प्रदेश सरकारले नीति तथा कार्यक्रम र बजेटमा युवा लक्षित कार्यक्रमलाई विशेष महत्व दिएको पनि उल्लेख गरे । उनले भने, ‘सीप, दक्षता र रोजगारीः युवा पलायन रोक्ने हाम्रो जिम्मेवारी कार्यक्रम सञ्चालन बजेटको व्यवस्था गरिएको छ ।’

सामूहिक रूपमा उद्यम गर्न चाहने युवाहरूलाई प्रोत्साहन गर्न प्रदेश सरकार र युवा उद्यमीहरूबीच लगानी साझेदारीमा ‘उद्यमी युवाः समृद्ध प्रदेश निर्माणमा टेवा’ कार्यक्रम सञ्चालन गरिनेसमेत उनले बताए ।

हब कोअपरेटिभको यो पहिलो शाखा हो । हब कोअपरेटिभले सहकारीहरूमा राष्ट्रिय एवम अन्तराष्ट्रिय विप्रेषण सेवा, रकमान्तर, भुक्तानी तथा फछर्यौट सेवा, क्लियरिङ, मोबाइल बैंकिङ, बैंक एवं सहकारीबिच रकमान्तरण र बिलहरू भुक्तानीका सेवाहरू उपलब्ध गराइरहेको छ ।

सेवा शुभारम्भको दिनमै पोखराका विभिन्न २० वटा सहकारी संस्थाहरू आबद्ध भई ५ करोड निक्षेप संकलन भएको संस्थाका अध्यक्ष तथा राष्ट्रिय सहकारी विकास बोर्डका सहअध्यक्ष दक्ष पौडेलले जानकारी दिए ।

सरकार गठनको लामो समय हुँदासम्म पूर्णता दिन नसकेको भन्दै गठबन्धनमै असन्तुष्टि छ । सरकारका प्रवक्ता कुमार खड्का भने सरकारको काम साउनबाट सुरु हुने भएकाले अहिले हतार नगरिएको बताउँछन् । ‘सबै कुरा टुङ्गिएको भए पनि मन्त्रिमण्डल हामीले बजेटको छलफलपछि गर्ने योजना थियो । समयको प्रेसर थिएन,’ खड्काले शिलापत्रसँग भनेका थिए ।

प्रकाशित मिति: शुक्रबार, असार १८, २०७८ २१:१७