फैसलाको स्वागत गर्दै राजनीतिक दलहरूले भने- मुलुकमा संविधानवाद स्थापित भयो

A+ A A-

सर्वोच्चको संसद्‍ पुनर्स्थापनाको फैसलाले मुलुकमा संविधानवाद स्थापित भएको बताएका छन् ।

नेपाली कांग्रेस, नेकपा प्रचण्ड-माधव समूह र जसपाका नेताहरूले प्रतिनिधिसभा पुनर्स्थापनाको फैसलाले संविधान र त्यसका उपलब्धिको रक्षा भएको बताएका हुन् ।

कांग्रेसका वरिष्ठ नेता रामचन्द्र पौडेलले संसद्‍ पुनर्स्थापनाको फैसलाले जनताको सार्वभौमसत्ता स्थापित भएको बताए । सर्वोच्चको यो फैसला ऐतिहासिक भएको उनले बताएका छन्। ‘अदालतको फैसला ऐतिहासिक छ । यसले जनताको सार्वभौमिकताको रक्षा गरेको छ’, पौडेलले शिलापत्रसँग भने ।

यस्तै, नेकपाको प्रचण्ड-माधव समूहका सचिवालय सदस्य नारायणकाजी श्रेष्ठले सर्वोच्च अदालतको फैसलाले संविधान र लोकतन्त्रको रक्षा गरेको बताए । शिलापत्रसँगको कुराकानीमा श्रेष्ठले अदाललते जनताको सार्वभौमसत्ताप्रति जिम्मेवारी बोध गर्दै ऐतिहासिक फैसला गरेको दाबी गरे । श्रेष्ठले भने, ‘अदालतको फैसलालले नेपालको राजनीति अँध्यारो सुरुङमा जानबाट बचाएको छ ।’

यस्तै, जनता समाजवादी पार्टीका अध्यक्ष उपेन्द्र यादवले प्रतिनिधिसभा विघटन बदर गर्ने सर्वोच्चको फैसलाले संविधानवादको रक्षा भएको बताए । ‘सर्वोच्च अदालतले प्रधानमन्त्रीको गलत कदमलाई दण्डित गर्दै संविधानवादको रक्षा गरेको छ,’ उनले भने ।

अब बस्ने संसद्‍ले मुलुकको आगामी राजनीतिक बाटो तय गर्ने यादवको भनाइ छ । सर्वोच्चले १३ दिनभित्र संसद्‍ अधिवेशन बोलाउन परमादेश जारी गरेको छ । प्रधानमन्त्री केपी शर्मा ओलीले ५ पुसमा प्रतिनिधि सभा विघटन गरेका थिए ।

प्रधानन्यायाधीश चोलेन्द्र शमशेर जबरासहित विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसीको इजलासले फैसला सुनाएको हो ।

अदालतको फैसलाबाट प्रधानमन्त्री ओली संकटमा परेका छन् । संसदीय प्रणाली भएका मुलुकमा प्रधानमन्त्रीलाई विघटनको अधिकार अन्तर्निहित हुने भन्दै ओलीले आफ्नो कदमको बचाउ गरेका थिए ।

प्रकाशित मिति: मंगलबार, फागुन ११, २०७७ १८:५४