महेन्द्र मोरङ क्याम्पसमा तोडफोड

A+ A A-

विराटनगरस्थित महेन्द्रमोरङ कलेजमा त्रिपक्षिय विवाद हुँदा तोडफोड भएको छ ।

कलेजमा कर्मचारी, विद्यार्थी र क्याम्पस प्रशासनबीच विवाद हुँदा तोडफोड भएको हो । सो कलेजका एमबिएस संकायका विद्यार्थीलाई शैक्षिक भ्रमणमा लैजान रकम निकासाको बिषयलाई लिएर विवाद भएको हो ।

कलेजका निमित्त प्रमुख ताराप्रसाद यादवले भ्रमणमा जाने एमबिएसका ५० जना विद्यार्थीका लागि मोवाइल बैंकिङ सिस्टमबाट ३ लाख ५० हजार रुपैयाँ रकम निकासा गरिदिएपछि विवाद सृजना भएको हो ।

शैक्षिक भ्रमणका लागि मोवाइल बैंकिङबाट रकम निकासा गरिएपछि दुई महिनादेखि तलब नपाएका क्याम्पसमा कार्यरत कर्मचारी आक्रोशित भएका थिए ।

निमित्त प्रमुखले क्याम्पस प्रमुख र लेखा प्रमुखलाई समेत जानकारी नदिई मोबाइल बैंकिङबाट रकम निकासा गरेको बिषयलाई आफुहरुले बिरोध गर्दा क्याम्पस प्रशासन पक्षले विद्यार्थीलाई उचालेर तोडफोड र आक्रमण गराइएको कलेजका कर्मचारी प्रमोद कामतले आरोप लगाए ।

निमित्त क्याम्पस प्रमुखको आदेशमा कलेजको खाताबाट कलेजमै कार्यरत कर्मचारी अनिल यादवको निजी खातामा मंगलबार दिउँसो ३ लाख ५० हजार ट्रान्सफर गरिएको थियो ।

तर कर्मचारीहरुले विरोध गरेपछि त्यो रकम फेरी कलेजकै खातामा ट्रान्सफर गरिएको छ ।

सो बिषय तथा कर्मचारीहरुलाई तत्काल तलब उपलब्ध गराउनुपर्ने माग सहित कर्मचारीहरुले मंगलबार दिउँसोबाट कलेजको प्रशासनिक कार्यालयहरुमा तालाबन्दी गरेका छन् ।

क्याम्पसका निमित्त प्रमुख यादवले क्याम्पस प्रमुख बाबुराम तिम्ल्सिना गएको पौष २ गतेबाट विदामा बसेकाले चेक काट्ने कोहि पनि नभएका कारण विद्यार्थीको शैक्षिक भ्रमणका निम्ति बैंक ट्रान्सफरको उपाय निकालिएको बताए ।

सो कलेजमा विभिन्न तहका २ सय ५० जना प्राध्यापक ५३ कर्मचारी र ६ हजार बिद्यार्थी विभिन्न संकायमा अध्ययनरत रहेका छन् ।

विद्यार्थीहरुले विभिन्न शैक्षिक सुधारका माग राखी ७ हप्ता अघिबाट नै क्याम्पस प्रमुख तथा लेखा शाखामा गरेको तालाबन्दीलाई निरन्तरता समेत दिंदै आएका छन् ।

प्रकाशित मिति: बिहीबार, पुस १०, २०७६ १२:२३