पढ्न छाडेर चौकीमा झगडा हेर्न जान्छन् विद्यार्थी

A+ A A-

धनुषाको मुखियापट्टी मुसहरनियाँ गाउँपालिका–१ मा एउटै परिसरभित्र विद्यालय, वडा कार्यालय र प्रहरी चौकी छन् ।

एकातिर विद्यार्थीहरु पढिरहेका हुन्छन् भने अर्कोतर्फ विभिन्न बैठक चलिरहेको हुन्छ । विद्यालय परिसरमै प्रहरी चौकी रहेकाले कैदीहरू आउने जाने गरिरहन्छन् । चौकीमा थुनुवा कक्ष नभएकोले पक्राउ परेका अभियुक्तलाई खुला रूपमा चौकीकै झ्यालमा हतकडी बाँधेर राखिएको हुन्छ ।

सीमा क्षेत्रको मुखियापट्टिमा हुने विवादहरु चौकीमा जाँदा भीड लाग्ने गर्छ । सामान्य झैझगडामा पनि स्थानीय प्रहरी चौकी पुग्ने परम्परा रहेको छ । त्यस्ता घटनालाई मिलाउन दिनहुँ प्रहरी चौकीमा बैठक हुने गर्छ । विद्यालय परिसरमै रहेका कारण चौकीमा हुने त्यस्ता गतिविधिबाट कलिला विद्यार्थीलाई असर परिरहेको हुन्छ ।

कतिपय विवादले चौकीमै चर्काचर्कीको रुप लिन्छ । जसले कक्षा कोठामा पढिरहेका विद्यार्थीलाई एकाएक झैझगडाका विषयतिर ध्यान मोडिदिन्छ । यसले आफूहरुको पढाइमा असर पर्दै आएको कक्षा ६ मा अध्ययनरत छात्र मोहन महतोले बताए ।

प्रहरी चौकीमा विभिन्न आपराधिक प्रकृतिका मुद्दाहरू हुँदा पीडित र पीडक आएपछि पठनपाठन प्रभावित हुने गरेको विद्यालयका प्रधानाध्यपक सुरेन्द्र पाण्डे बताउँछन् ।

‘भीडभाड, होहल्ला हेर्ने सुन्ने विद्यार्थीहरूको स्वभाव नै हुन्छ । प्रहरी चौकीको होहल्लाले पढ्न छाडेर बालबालिका होहल्ला हेर्न जाने गर्छन्,’ उनले भने ।

प्रहरी चौकी र विद्यालयबीच कक्षा सञ्चालनको समयमा कुनै प्रकारका बैठक नगर्ने सम्झौता भएपनि अचानक हुने घटनाका कारण उत्पन्न परिस्थितिलाई आफूहरूले रोक्न नसक्ने उनले बताए ।

सो विद्यालयमा नियमित करिब साढे तीन सय बालबालिका पढ्न आउँछन् । कक्षा ७ सम्म सो विद्यालयमा पढाई हुने गर्छ ।

प्रहरी चौकी हटाउन विद्यालयका शिक्षकले पटकपटक गाउँपालिका अध्यक्ष लगायत विभिन्न संघसंस्था तथा नेतासमक्ष अनुरोध गरेपनि कुनै निकायबाट अहिलेसम्म पहल नभएको प्रधानाध्यापक पाण्डेले बताए । ‘आश्वासन दिन्छन् तर अहिलेसम्म कुनै पहल भएको छैन,’ उनले भने ।

२०६२/२०६३ सालको जनआन्दोलनका क्रममा तत्कालीन गाविस कार्यालय सुरक्षालाई मध्यनजर गर्दै प्रहरी चौकी स्थापना गरिएको थियो । प्रहरी चौकीका लागि अन्यत्र भवन नरहेकाले बाध्यतावस विद्यालय परिसरमै राख्नु परेको प्रहरी चौकी इन्चार्ज बहादुर यादवले बताए ।

विद्यालयमा प्रहरी चौकीले विद्यार्थी प्रभावित हुँदै आएको स्वीकार गर्दै असइ यादवले यसका लागि उचित विकल्प अवश्यक रहेको उल्लेख गरे ।

‘विद्यालयका बालबालिकालाई पठनपाठनमा समस्या नहोस् भनेर हामी सक्दो मितव्ययिता अपनाएका छौँ, तर कहिलेकाहीँ गम्भीर प्रकृतिका मुद्दाहरु आउँदा बालबालिकाको पढाइ प्रभावित हुन्छ,’ उनले भने ।

दुई वटा कोठामा ६ जना प्रहरी कोच्चिएर बसेका हुन्छन् । कार्यालय सञ्चालनका साथै बस्नमा प्रहरीलाई समेत समस्या छ । थुनुवा कक्ष नहुँदा आरोपीलाई पक्राउ गरी बाहिर गेटमै हतकडी लगाएर राख्नुपर्ने बाध्यता छ ।

विद्यालय परिसरमा प्रहरी चौकी मात्र होइन वडा नं. १ को कार्यालय समेत छ, जहाँ सेवाग्राहीको दिनहुँ भीड लाग्ने गर्छ । सँगै रहेको तीन कोठे भवनको एक कोठामा वडा कार्यालय रहेको छ । जसले पूरै विद्यालय क्षेत्र नै प्रभावित हुँदै आएको छ ।

भवनको अभावमा विद्यालयकै प्राङ्गढमा रहेको भवनमा वडा कार्यालय सञ्चालन गर्नुपरेको वडाध्यक्ष कौशल मुखियाले बताए । जग्गा नहुँदा प्रहरीचौकी विद्यालयमै राख्नुपर्ने बाध्यता रहेको गाउँपालिका अध्यक्ष मनोज यादव बताउँछन् ।

प्रहरी चौकी विद्यालय बाहिर राख्न पहल गर्दा स्थानीयहरुले भाडामा समेत भवन नदिएको उनले गुनासो पोखे । ‘प्रहरीलाई जग्गा वा घर दिएपछि सरकारी हुने भनेर स्थानीय कोहीले पनि घरजग्गा दिन मान्दैनन्,’ उनले भने ।

प्रहरी चौकीका कारण पठन पाठन प्रभावित भइरहेको स्वीकार गर्दै उनले चाँडै कुनै विकल्प खोज्नुपर्ने आवश्यकता औल्याए ।

प्रकाशित मिति: शुक्रबार, कात्तिक १५, २०७६ ११:५७