मधेश सरकारबाट बाहिरियाे लाेसपा, वनमन्त्रीले दिए राजीनामा

A+ A A-

लोकतान्त्रिक समाजवादी पार्टी लाेसपा मधेश सरकारबाट बाहिरिएकाे छ । पार्टीले सरकार छोड्ने निर्णय गरेसँगै मधेश प्रदेशमा वन तथा वातावरणमन्त्री रहेका रमेशप्रसाद कुर्मीले मंगलबार नै राजीनामा दिएका छन् ।

पार्टी अध्यक्ष महन्थ ठाकुरको विशेष उपस्थितिमा लोसपा संसदीय दलको मंगलबार बसेको बैठकले मुख्यमन्त्री सराेजकुमारलाई विश्वासको मत नदिने तथा सरकार छोड्ने निर्णय गरेको हाे । पार्टीको निर्णयपश्चात् वनमन्त्री कुर्मीले मुख्यमन्त्री यादवलाई राजीनामा बुझाएका हुन् ।

मधेशमा लोसपाका ९ सांसद छन् । मुख्यमन्त्री यादवले दुईवटा मन्त्रालय दिने भनेर आश्वासन दिँदै आए पनि अहिलेसम्म नदिएको तथा मुख्यमन्त्री यादव नेतृत्वको सरकारको चौतर्फी आलोचना हुने गरेकाले पनि पार्टीले विश्वासको मत नदिने निर्णय गरेको लोसपाका एक प्रदेश सांसदले बताए ।

आज मुख्यमन्त्री यादवले सभाबाट विश्वासको मत लिने तालिका थियाे । तर, सभाको बैठक सुरु भएलगतै जनमत पार्टीले राजविराजस्थित कृषि विश्वविद्यालयको भवन शिलान्यास कार्यक्रममा आफ्नो पार्टीका नेतामाथि कुटपिट भएकाे घटनामा मुख्यमन्त्रीले माफी माग्नुपर्ने भन्दै प्रदेशसभाको बैठक अवरुद्ध गरेको छ ।

जनमतको विरोध कार्यक्रममा कांग्रेसले पनि सहयोग गरेको छ । सभामै मुख्यमन्त्रीविरुद्ध नाराबाजी भएपछि सभामुख रामचन्द्र मण्डलले बैठक स्थगित गरेका थिए । बैठक फेरि बस्न सकेकाे छैन

सभामुखले दुवै पक्षलाई बोलाएर छलफल गरे पनि दुवै पक्ष आफ्नो अडानबाट पछि हटेको छैनन् । यस्तो अवस्थामा आजको मुख्यमन्त्रीले विश्वासको मत लिने सम्भावना कम रहेको एक सांसदले बताए । ९ चैतमा कांग्रेसले आफ्नो समर्थन फिर्ता लिएपछि मुख्यमन्त्री यादवले चौथोपटक विश्वासको मत लिन लागेको हो । लाेसपा सरकारबाट बाहिरिए पनि सत्ता गठबन्धनमा रहेका अरु दल एक ठाउँमा उभिए विश्वासकाे मत जित्न कठिन छैन ।

प्रकाशित मिति: मंगलबार, वैशाख ४, २०८१ १८:५७