सिन्धुपाल्चाेककाे चौतारा बहुमुखी क्याम्पसमा ज्योति सूचना कक्ष स्थापना

A+ A A-

सिन्धुपाल्चाेक सदरमुकाममा अवस्थित चौतारा बहुमुखी क्याम्पसमा ज्योति सूचना कक्ष स्थापना भएको छ । सोमबार आयाेजित एक समाराेहमा क्याम्पसका संस्थापक अध्यक्ष कृष्णराज श्रेष्ठले ज्याेति सूचना कक्ष उद्घाटन गरेका हुन् ।

हाल अमेरिकामा बसोबास गर्दै आइरहेका समाजसेवी तथा राजनीतिज्ञ रामचन्द्र श्रेष्ठले स्वर्गीय श्रीमती ज्याेतिकुमारी श्रेष्ठको स्मृतिमा उक्त सूचना कक्षकाे स्थापना गरेका हुन् । श्रेष्ठले आफ्नो पुर्ख्याैली थलोमा रहेको क्याम्पसको शैक्षिक विकासमा थप टेवा पुगोस् भन्ने मनसायका साथ सहयोग गरेको बताए ।

ज्याेति सूचना कक्षमा स्मार्ट बोर्डसहित आधुनिक स्टुडियो बनाइएको छ । साथै साउण्ड सिस्टम र राउण्डिङ टेबलको व्यवस्था गरिएको छ । यसबाट अब क्याम्पसका शिक्षक तथा विद्यार्थीहरूलाई स्मार्ट बोर्डको प्रयोग गर्न, अन्तर्क्रियात्मक कार्यक्रम गर्न, र अडियो भिडियो रेकर्डिङ लगायतका सूचना प्रविधिसँग सम्बन्धित बहुक्रियाकलाप गर्न सहज हुने क्याम्पस प्रमुख नगेन्द्रप्रसाद दंगालले बताए ।

विद्यार्थीसँगै यो सूचना कक्षलाई आम समुदायले समेत प्रयोग गर्न सक्ने क्याम्पस प्रमुख दंगालको भनाइ छ । क्याम्पसले गुणस्तर सुनिश्चितता तथा प्रत्यायन (क्यूएए) प्रमाणपत्र प्राप्त गरेको दुई महिनामै सूचना केन्द्र स्थापना गर्न सफल भएको बताउँदै दंगालले सहयाेगका लागि श्रेष्ठलाई धन्यवाद दिए ।

समाराेहमा चौतारा साँगाचोकगढी नगरपालिका उपमेयर सिता थापाले सूचना कक्षको सही सदुपयोग हुनुपर्नेमा जोड दिँदै प्रविधिका कुराहरू आवश्यकता र माग अनुसार परिपूर्ति हुँदै जाने बताइन् । यसैगरी संस्थापक अध्यक्ष श्रेष्ठले परदेशमा बसोबास भए पनि जन्मभूमिलाई सम्झेर सूचना कक्षा स्थापना गर्न सहयोग गरेको भन्दै समाजसेवी रामचन्द्र श्रेष्ठप्रति आभार व्यक्त गरे । समाजसेवी श्रेष्ठ अमेरिकाका ब्राण्डफाेर्ड नगरमा नगर सदस्यको रूपमा निर्वाचित जनप्रतिनिधिसमेत हुन् ।

प्रकाशित मिति: मंगलबार, वैशाख ४, २०८१ १६:२८