सुदूरपश्चिममा उलटफेर : एसले मुख्यमन्त्री पाउने निश्चित, रञ्जिताकाे पनि समर्थन

सुदूरपश्चिममा उलटफेर : एसले मुख्यमन्त्री पाउने निश्चित, रञ्जिताकाे पनि समर्थन

A+ A A-

सुदूरपश्चिम प्रदेशकाे मुख्यमन्त्री नेकपा एकीकृत समाजवादीले पाउने लगभग पक्का भएकाे छ । एसलाई मुख्यमन्त्री दिएर सत्ता गठबन्धनकाे संकट टार्न नागरिक उन्मुक्ति पार्टी नाउपासमेत सकारात्मक भएकाे छ ।

नाउपा अध्यक्ष रञ्जिता श्रेष्ठले एसलाई मुख्यमन्त्री दिएर पनि भए सत्ता गठबन्धनकाे संकट टार्न सकारात्मक रहेकाे संकेत गरिन् । शिलापत्रसँग कुरा गर्दै उनले भनिन्, 'एउटा प्रदेशकाे विवादकाे विषयलाई लिएर सबैतिर संकट आउनुभन्दा समझदारीमा जानुपर्छ भन्ने मान्यता हामीले राख्छाैँ ।'

उनले सुदूरपश्चिमकाे मुख्यमन्त्री एसलाई दिनेबारे छलफल चलिरहे पनि अन्तिम टुंगाे भने लागिनसकेकाे बताइन् ।

सुदूरपश्चिमकाे मुख्यमन्त्रीका लागि नाउपाका कैलाश चाैधरी र लक्ष्मणकिशाेर चाैधरीले दाबी पेस गरेका छन् । अब एसका नेता दीर्घ साेडारीलाई मुख्यमन्त्री बनाउन कानुनी छिद्रकाे खाेजी भइरहेकाे छ ।

एसलाई मुख्यमन्त्री दिन नाउपाकाे रञ्जिता पक्ष सहमत नभए रेशम पक्षका लक्ष्मणकिशाेर मुख्यमन्त्री हुने लगभग पक्का थियाे । तर, आफूले मुख्यमन्त्री पाउने भएपछि एसले लक्ष्मणकिशाेरका लागि पेस गरेकाे दाबी फिर्ता लिने तयारी गरेकाे छ ।

एस संसदीय दलका नेता दृघ साेडारीले मुख्यमन्त्रीमा आफैँ दाबी पेस गर्ने गरी तयारी गरिरहेका छन् । एमाले, माओवादी केन्द्र, एस र नाउपाकाे रञ्जिता पक्ष मिलेमा मात्रै पनि सरकार गठनका लागि बहुमत पुग्छ ।

सुदूरपश्चिमकाे मुख्यमन्त्री पाउनुपर्ने अडान पूरा नहुने देखिएपछि एसले कांग्रेससँग मिलेर वैकल्पिक गठबन्धन बनाउने प्रयासस्वरुप नाउपा रेशम पक्षका लक्ष्मणकिशाेरलाई समर्थन गरेकाे थियाे । तर, दाबी पेस भएकाे तीन दिन हुँदा पनि प्रदेश प्रमुख नाजिर मियाँले कुनै निर्णय लिएका छैनन् ।

प्रकाशित मिति: मंगलबार, वैशाख ४, २०८१ १४:५५