आज दिनभर : रविलाई प्रधानमन्त्री बनाउन नसकेपछि कांग्रेस रिसाएकाे प्रचण्डकाे आराेप (भिडियाे)

आज दिनभर : रविलाई प्रधानमन्त्री बनाउन नसकेपछि कांग्रेस रिसाएकाे प्रचण्डकाे आराेप (भिडियाे)

A+ A A-

प्रधानमन्त्री पुष्पकमल दाहाल प्रचण्डले रवि लामिछानेलाई प्रधानमन्त्री बनाउन नसकेपछि नेपाली कांग्रेसले सहकारीको विषय उठाएको आरोप लगाएका छन् । सहकारीको रकम हिनामिना प्रकरणमा मुछिएका लामिछानेमाथि अनुसन्धान गर्न संसदीय छानबिन समिति नबन्ने उनले बताए ।

चिकित्सा शिक्षासम्बन्धी जाँचबुझ आयोगको प्रतिवेदन ६ वर्षपछि सार्वजनिक गरेकोमा कांग्रेस महामन्त्री गगन थापाले शिक्षामन्त्री सुमना श्रेष्ठलाई धन्यवाद दिएका छन् । नेताहरूले राजनीतिलाई छोराछोरी पाल्ने पेसा बनाएको राप्रपा अध्यक्ष राजेन्द्र लिङ्देनले आराेप लगाएका छन् ।

सत्तारुढ दलहरूबीच भागवण्डा मिलाउन गण्डकी प्रदेशका मुख्यमन्त्री खगराज अधिकारीले दुईवटा मन्त्रालय फुटाएका छन् । सेवाग्राहीसँग घुस लिँदै गर्दा पोखरा महानगरपालिकाकी सब–इन्जिनियरसहित दुई जना पक्राउ परेका छन् ।

माथिल्लो अरुण र दूधकोशी जलविद्युत आयोजनाको वित्तीय व्यवस्थापन सकेर छिटो निर्माण सुरु गर्न विश्व बैंक र एसियाली विकास बैंक सहमत भएका छन् । अरुण र दूधकोशीजस्ता ठूला आयोजनाको निर्माणपछि नेपालको ऊर्जा क्षेत्रमा नयाँ अध्याय थपिने अर्थमन्त्री वर्षमान पुनको विश्वास छ ।

ठूलो वर्षाको सम्भावना नभएकाले हाल देखिएको वायु प्रदूषण हट्ने सम्भावना नरहेको माैसमविद्‌हरूले बताएका छन् । काठमाडौंमा हल्का वर्षा भए पनि वायु प्रदूषण भने उच्च जोखिमयुक्त नै छ । अचानक सुरु भएको हावाहुरीका कारण त्रिभुवन अन्तर्राष्ट्रिय विमानस्थलमा उडान अस्तव्यस्त बनेकाे छ ।

चालु आर्थिक वर्षमा नेपालको आर्थिक वृद्धिदर ३.६ प्रतिशत हुने एसियाली विकास बैंक (एडीबी) ले प्रक्षेपण गरेकाे छ ।

गाजामा इजरायलको आक्रमणमा हमास प्रमुख इस्माइल हानियाका तीन छोराको मृत्यु भएकाे छ । आफ्ना छोराको हत्या गरेर हमासलाई झुकाउन र आत्मसमर्पण गराउन सम्भव नरहेको हानिएले प्रतिक्रिया दिएका छन् ।

एसीसी प्रिमियर कप टी–२० प्रतियोगिता शुक्रबारदेखि ओमानमा सुरु हुँदै छ । आफ्नो पहिलो खेलमा नेपालले मलेसियाको सामना गर्दै छ ।