माैसमविद् भन्छन्– काठमाडाैंमा पानी परे पनि वायु प्रदूषण हट्‌ने सम्भावना छैन

माैसमविद् भन्छन्– काठमाडाैंमा पानी परे पनि वायु प्रदूषण हट्‌ने सम्भावना छैन

A+ A A-

काठमाडाैं उपत्यकालगायत कोशी, बागमती, गण्डकी, कर्णाली र सुदूरपश्चिम प्रदेशको पहाडी भूभागमा हल्का वर्षा भएकाे छ । जल तथा मौसम विज्ञान विभागअन्तर्गत मौसम पूर्वानुमान माहाशाखाले कोशी, बागमती, गण्डकी, कर्णाली र सुदूरपश्चिम प्रदेशको पहाडी क्षेत्रमा हल्का वर्षा भएको र उपत्यकामा साँझ पनि हल्का वर्षाको सम्भावना रहेको जनाएको छ ।

रासससँगकाे कुराकानीमा महाशाखाका मौसमविद् सरोज पुडासैनीले कोशी, बागमती, गण्डकी, कर्णाली र सुदूरपश्चिम प्रदेशको पहाडी भूभागको थोरै स्थान साथै बाँकी पहाडी भूभागको एक–दुई स्थानमा मेघगर्जनचट्याङसहित हल्का वर्षाको सम्भावना रहेको जानकारी दिए ।

'यो समय प्रि–मनसुनको समय रहेकाले लामो समयसम्म वर्षा रहिरहने भन्ने हुँदैन । मलुकका केही स्थानमा वर्षा हुन्छ', उनले भने, 'ठूलो वर्षाको सम्भावना नभएकाले हाल देखिएको वायु प्रदूषण न्यूनीकरणमा भने टेवा पुग्ने देखिँदैन ।' उनका अनुसार लुम्बिनी प्रदेशलगायत कोशी, बागमती, गण्डकी, कर्णाली र सुदुरपश्चिम प्रदेशको पहाडी भू–भागका केही स्थानमा हावाहुरीको सम्भावना रहेको छ ।

काठमाडाैंमा हल्का वर्षा भए पनि वायु प्रदूषण भने उच्चजाेखिमयुक्त नै छ । एयर क्वालिटी इन्डेक्सका अनुसार बिहीबार दिउँसाे चार बजे काठमाडाैं विश्वकै प्रदूषित वायु भएकाे शहरकाे एक नम्बरमा रहेकाे छ । काठमाडाैंपछि चीनकाे बेइजिङ र त्यपछि भारतकाे काेलकाता रहेकाे छ ।

हाल नेपालमा पश्चिमी वायु र स्थानीय वायुको आंशिक प्रभाव रहेको उनको भनाइ छ । कोशी प्रदेशलगायत देशको पहाडी भूभागमा आंशिकदेखि साधारणतया बदली तथा बाँकी भूभागमा आंशिक बदलीदेखि मौसम मुख्यतया सफा रहने छ ।

कोशी, बागमती, गण्डकी, कर्णाली र सुदूरपश्चिम प्रदेशको पहाडी भू–भागको थोरै स्थान साथै बाँकी पहाडी भूभागको एक–दुई स्थानमा मेघगर्जन/चट्याङसहित हल्का वर्षाको सम्भावना रहेको महाशाखाले बताएको छ । माहाशाखाका अनुसार देशको उच्च पहाडी तथा हिमाली भूभागका थोरै स्थानमा हल्का हिमपातको पनि सम्भावना छ । आज राति भने कोशी, गण्डकी, लुम्बिनी, कर्णाली र सुदूरपश्चिम प्रदेशलगायत देशको पहाडी भूभागमा आंशिकदेखि साधारणतया बदली रही बाँकी भूभागमा मौसम मुख्यतया सफा रहने महाशाखाद्वारा जारी बुलेटिनमा उल्लेख गरिएको छ ।

प्रकाशित मिति: बिहीबार, चैत २९, २०८० १५:५५