एमालेले टुंग्यायो राष्ट्रियसभामा उठाउने १९ जना उम्मेदवारको नाम (सूचीसहित)

A+ A A-

नेकपा एमालेले ११ माघमा राष्ट्रियसभा चुनावका लागि १९ जना उम्मेदवारको नाम टुंगो लगाएको छ । ११ माघमा हुने चुनावका लागि भोलि (सोमबार) उम्मेदवारी दर्ता हुँदै छ । राष्ट्रियसभामा आगामी फागुनमा रिक्त हुने २० सिटमध्ये १९ सिटका लागि चुनाव हुन लागेको हो ।

एमालेले आइतबार उम्मेदवारको नाम टुंगो लगाएको महासचिव शंकर पोखरेलले जानकारी दिए । एमालेले कोशीमा महिलाबाट सुनसरीकी रुक्मिणी काेइराला र अन्यबाट भोजपुरका पर्शुराम अधिकारीलाई उम्मेदवार बनाएको छ । यस्तै, मधेश प्रदेशमा महिलातर्फ पर्साकी उषादेवी थरुनी र अन्यबाट महोत्तरीका अर्जुनकुमार सिंहलाई एमालेले उम्मेदवार बनाएको छ ।

यसैगरी, बागमतीबाट महिलातर्फ दोलखाकी रोचकुमारी चौलागाईं, अन्यबाट चितवनका त्रिलोचन निर्मल पौडेल, अल्पसंख्यक/अपाङ्गता भएकाबाट काठमाडौंका विवेक देवकोटा र दलिततर्फ धादिङका ध्रुवराज विश्वकर्मा उम्मेदवार बनेका छन् ।

गण्डकी प्रदेशमा महिलातर्फ गोरखाकी सम्झना देवकोटा, अन्यतर्फ स्याङ्जाका चक्रबहादुर पराजुली र अल्पसंख्यक/अपाङ्गतातर्फबाट मुस्ताङका हेमचन्द्र शेरचनको नाम टुंगो लागेको छ । यस्तै, लुम्बिनीमा महिलातर्फ दाङकी तुलसाकुमारी केसी र अन्यतर्फ पाल्पाका झपेन्द्रबहादुर घर्तीलाई उम्मेदवार बनाइएको छ भने कर्णाली प्रदेशमा महिलातर्फ हुम्लाकी विमलाकुमारी शाही, अन्यतर्फ मुगुका डिल्लीप्रसाद भट्ट र दलिततर्फ दैलेखका हिक्मत विकलाई उम्मेदवार बनाएको छ ।

सुदूरपश्चिममा महिलातर्फ कैलालीकी सावित्रादेवी घिमिरे, अन्यतर्फ कञ्चनपुरका ईश्वरीप्रसाद खरेल र अल्पसंख्यक/अपाङ्गतातर्फ कैलालीका रामचन्द्र जोशीलाई एमालेले उम्मेदवार बनाउने भएको छ ।