एमाले मधेश अधिवेशन : महासेठलाई उछिनेर यादव हावी हुँदै

A+ A A-

नेकपा एमाले मधेश प्रदेशको अधिवेशन आउँदो २४ र २५ गते हुँदै छ । पहिलो प्रदेश अधिवेशन भएकाले त्यसलाई भव्य बनाउने तयारी भइरहेको मधेश प्रदेशका इन्चार्ज योगेश भट्टराईले जानकारी दिए । जनकपुरधामको महेन्द्रनारायण निधि मिथिला सांस्कृति केन्द्रमा हुने अधिवेशनको उद्घाटन पार्टी अध्यक्ष केपी शर्मा ओलीले गर्ने इन्चार्ज भट्टराईले केही दिनअघि पत्रकार सम्मेलन गरेर जानकारी गराएका थिए ।

अधिवेशनका लागि प्रतिनिधि छनोटको कार्य अन्तिम चरणमा छ । सप्तरीबाहेक सबै जिल्लामा प्रतिनिधि छनोट भइसकेको नेकपा एमालेका मधेश प्रदेश उपाध्यक्ष रेवती पन्तले जानकारी दिए । तीन सय पार्टी सदस्यमा तीन जना प्रतिनिधि छनोट गर्नुपर्ने प्रावधान छ । तीन जना प्रतिनिधिमध्ये एक युवा, एक महिला र एक खुल्लाबाट छनोट गर्ने प्रावधान छ ।

त्यसैगरी, ३ सयदेखि ५ सय पार्टी सदस्य रहेमा ४ जना र ५ सयदेखि ७ सय रहेमा ५ जनालाई प्रतिनिधि बनाउने प्रवधान छ । त्यसबाहेक पालिका, जनवर्गीय संगठनबाट प्रतिनिधि छनोट भएका छन् ।

प्रतिनिधिका लागि पुरुषको हकमा ७ वर्ष र महिला, दलित, अपांगता भएकाहरूको हकमा ५ वर्ष संगठनमा अनिवार्य रूपले काम गरेको हुनुपर्नेछ । यसरी प्रदेशका आठवटै जिल्लाबाट करिब १ हजारको हाराहारीमा अधिवेशन प्रतिनिधि छनोट हुने उपाध्यक्ष पन्तले बताए । उनले अधिवेशनलाई व्यवस्थित बनाउन ५ सय स्वयंसेवक परिचालन हुने जानकारी दिए ।

एमालेकाे मधेश प्रदेश अध्यक्षमा आधा दर्जन आकांक्षी देखिएका छन् । तर, अधिवेशन प्रतिनिधि अहिलेसम्म पूर्ण रूपमा छनोट नहुँदा अध्यक्षका आकांक्षीहरूले घोषणा गर्न सकेका छैनन् । प्रदेश अध्यक्षको हैसियत पार्टीको पोलिटब्युरो सदस्यजस्तो भएकाले नेताहरू अध्यक्ष बन्ने दौडमा लागेका छन् ।

एमालेका पोलिटब्युरो सदस्यद्वय सुमन प्याकुरेल र पुरुषोत्तम पौडेल, रेवती पन्त, राजकिशोर यादव र प्रदेश सदस्य रामसिंह यादव प्रदेश अध्यक्षका आकांक्षी देखिएका छन् । प्रदेश अध्यक्षमा झण्डै आधा दर्जन उम्मेदवार देखिए पनि मुख्यत: दुईवटा समूह बलियो देखिएका छन् ।

मधेश प्रदेशमा अहिले प्रमुख दुई गुट देखिएका छन् । एक समूहकाे नेतृत्व एमाले सचिव तथा कोशी प्रदेश इन्चार्ज रघुवीर महासेठ र अर्को समूहको नेतृत्व मधेश प्रदेश संसदीय दलका नेता सरोज यादवले गरिरहेका छन् । महासेठ आफैँ कोशी प्रदेशका इन्चार्ज भएकाले सो गुटको नेतृत्व पोलिटब्युरो सदस्य तथा सांसद जुली महासेठले गरिरहेकी छिन् । पार्टी नेताहरूका अनुसार मुख्यत: दुई जनाबीच प्रतिस्पर्धा हुने देखिएको छ । महासेठ समूहलाई केन्द्रबाट पार्टीका उपाध्यक्ष विष्णु पौडेलको सहयोग रहेको बताइन्छ भने अर्काे समूहलाई महासचिव शंकर पोखरेलसहितकाे सहयोग छ ।

सुमन प्याकुरेलनिकट एक नेताका अनुसार अध्यक्ष केपी ओली महासेठबाट सन्तुष्ट छैनन् । तत्कालीन नेकपा विभाजित हुँदा महासेठले पनि ओलीलाई कारबाही गर्नुपर्ने पत्रमा हस्ताक्षर गरेका थिए । त्यतिबेला महासेठ प्रचण्ड–माधव नेपालको टिममा सहभागी थिए । तर, उनीहरूले जुली महतोलाई मन्त्री बनाउने कन्फर्म नभएपछि उनी फेरि ओलीतर्फ लागेका थिए । सोही समयदेखि ओली र महासेठको सम्बन्ध चिसिएको बताइन्छ ।

पार्टीको मधेश प्रदेशको संसदीय दलको नेता छनोटमा पनि महासेठले दीपेन्द्र ठाकुरको पक्षमा कडा अडान लिएका थिए । तर, अन्तिममा अध्यक्ष ओलीले सरोज यादवलाई दलको नेता चयन गरेका थिए । ती नेताका अनुसार महासेठका कारण पार्टीका धेरै नेताहरूले पार्टी छोडेर भागेको र पार्टी कमजोर हुने भएकाले उनलाई मधेश प्रदेशको इन्चार्ज नबनाई कोशी प्रदेशको इन्चार्ज बनाएको चर्चा पनि छ ।

त्यस कारण अध्यक्ष ओलीले प्याकुरेललाई सहयोग गर्न सक्ने नेकपाका एमालेका एक मधेश प्रदेश सांसदले बताए । यता, पन्त भने अहिलेसम्म पार्टीका केन्द्रीय नेताहरूको लाइनको पर्खाइमा छन् ।

प्रकाशित मिति: बुधबार, असोज १७, २०८० ०६:४९