सुदूरपश्चिम प्रदेश सरकारले पायो पूर्णता

A+ A A-

सुदूरपश्चिम प्रदेशका मुख्यमन्त्री कमलबहादुर शाहले बुधबार तेस्रोपटक मन्त्रीमण्डल विस्तार गरेका छन् । सत्ता साझेदारी दलमा रहेको नागरिक उन्मुक्ति पार्टीका प्रदेशसभा सदस्यलाई मन्त्रालयको जिम्मेवारी दिँदै मन्त्रिमण्डललाई मुख्यमन्त्री शाहले पूर्णता दिएका हुन् ।

२०७९ माघ २६ गते मुख्यमन्त्रीमा नियुक्त भएका शाहले २७ गते मन्त्रीमण्डल गठन गरेका थिए । नेपाली कांग्रेसका प्रदेशसभा सदस्य प्रकाश देउवालाई भौतिक पूर्वाधार र नेकपा एकीकृत समाजवादी पार्टीका नरेशकुमार शाहीलाई आर्थिक मामिलामन्त्रीमा नियुक्त गर्दै मन्त्रीमण्डल गठन गरेका थिए ।

मुख्यमन्त्री नियुक्त भएपछि झण्डै चार महिना प्रदेशका चारवटा मन्त्रालयको जिम्मेवारी स्वयम शाहले सम्हालेका थिए । जेठ ६ गते मुख्यमन्त्री शाहले दोस्रोपटक मन्त्रीमण्डल पुनर्गठन गरे । तर, नागरिक उन्मुक्ति पार्टीको साथ नपाउँदा सो समयमा उनले मन्त्रीमण्डललाई पूर्णता दिन सकेनन् । भूमि व्यवस्था, कृषि तथा सहकारी मन्त्रालयको जिम्मेवारी स्वयम सम्हाल्दै अन्य मन्त्रालयमा मन्त्री नियुक्त गरे ।

दोस्रोपटक मन्त्री नियुक्त गर्दा नेकपा माओवादी केन्द्रलाई प्रदेश सरकारमा समावेश भएको थियो । उनको नेतृत्वको सरकारमा नेकपा माओवादी केन्द्रका प्रदेशसभा सदस्य रमेश धामीलाई उद्योग, पर्यटन, वन तथा वातावरण, झपटबहादुर साउदलाई सामाजिक विकास मन्त्री र नेपाली कांग्रेसका पृथ्वीबहादुर सिंहलाई आन्तरिक मामिला तथा कानुन तथा गिता देवी माललाई उद्योग, पर्यटन, वन तथा वातावरण राज्यमन्त्री बनाइएको थियो ।

आन्तरिक मामिला तथा कानुनमन्त्री सिंहको डडेल्धुरादेखि बझाङ जाने क्रममा सवारी दुर्घटनामा मृत्यु भएपछि सो मन्त्रालय रिक्त रहेको थियो । मुख्यमन्त्री शाहले बजेट पारित भएलगत्तै मन्त्रीमण्डललाई पूर्णता दिन छलफल भेटघाट तीव्र बनाए पनि उन्मुक्तिको असहयोगका कारण पटक–पटक असफल बने ।

उन्मुक्ति पार्टी सहमतिमा आएपछि मुख्यमन्त्री शाहले बुधबार मात्र दुई मन्त्री र एक राज्यमन्त्री नियुक्त गरे । उन्मुक्तिका प्रदेशसभा सदस्य रामेश्वर चौधरीलाई भूमि व्यवस्था तथा सहकारी मन्त्री र घनश्यामलाई राज्यमन्त्री तथा आन्तरिक मामिला तथा कानुनमन्त्रीमा नेपाली कांग्रेसका प्रदेशसभा सदस्य शिवराज भट्टलाई नियुक्त गर्दै मन्त्रीमण्डलले पूर्णता पाएका छ ।

नवनियुक्त मन्त्रीहरूले बुधबार नै पद तथा गोपनीयताको शपथ लिएका छन् । भूमि व्यवस्था, कृषि तथा सहकारीमन्त्रीमा रामेश्वर र आन्तरिक मामिला तथा कानुन मन्त्रीमा शिवराजलाई प्रदेश प्रमुख देवराज जोशीले सपथ खुवाएका थिए भने भूमि व्यवस्था, कृषि तथा सहकारी राज्यमन्त्री घनश्यामलाई मुख्यमन्त्री कमलबहादुर शाहले शपथ खुवाएका थिए ।

मुख्यमन्त्री शाहले मन्त्रीमण्डललाई पूर्णता दिए पनि अझै प्रदेशसभा सचिवालयको विषयगत समितिका सभापति चयन गर्न सकेका छैन् । प्रदेशसभा सदस्यहरूलाई विषयगत समितिमा राखिए पनि सो समितिहरूले सभापति पाउन सकेको छैन । सभापति चयन नभएपछि कुनै बैठक बसाउनुपरेमा उनीहरूले ज्येष्ठ सदस्यको अध्यक्षतामा बैठक गर्नुपर्ने अवस्था रहेको छ ।

प्रकाशित मिति: बुधबार, साउन १७, २०८० २१:१६