कोशीमा एमाले रणनीति- सांसद तान्नेदेखि मध्यावधिमा धकेल्नेसम्म, कांग्रेस माओवादी सांसद काठमाडौंमा

कोशीमा एमाले रणनीति- सांसद तान्नेदेखि मध्यावधिमा धकेल्नेसम्म, कांग्रेस माओवादी सांसद काठमाडौंमा

A+ A A-

कोशी प्रदेशको एमाले नेतृत्वको सरकारले १४ असारमा विश्वासको मत लिने निर्णयपछि कांग्रेस र माओवादी केन्द्रसहितको गठबन्धन सरकारको तयारीमा लागेको छन् । केही सातादेखि निरन्तर छलफलमा रहेका यो गठबन्धनका नेताहरू विराटनगरबाट काठमाडौंमा आएका छन् ।

शीर्ष नेताहरूसमेतको छलफलका लागि काठमाडौं आएका नेताहरू छलफलमा जुटेका छन् । माओवादी केन्द्र र कांग्रेसका नेताहरू छलफलमा सक्रिय छन् ।

गठबन्धनको अर्को घटक एकीकृत समाजवादीका नेता राजेन्द्र राई भने सहभागी छैनन् । उनी कोशी प्रदेशमै रहेका कारण ११ असारको काठमाडौंको छलफलमा सहभागी थिएनन् । ११ असार (आज सोमबार) गबठन्धनका नेताहरू बालुवाटारस्थित एक होटलमा बैठक बसेका हुन् । कांग्रेसका उद्धव थापा, केदार कार्की, भुपेन्द्र राई माओवादीका इन्द्र आङ्बोलगायतका नेताहरू बसेका थिए ।

छलफलमा सहभागी इन्द्र आङ्बोका अनुसार १४ असार मुख्यमन्त्री हिक्मत कार्कीलाई विश्वासको मतमा असफल बनाउने र गठबन्धनले सरकार बनाउने निर्णय भएको छ । शिलापत्रसँगको कुराकानीमा आङ्बोले एमालेले गठबन्धनभित्र खेल्न खोजेको रहस्य पनि खुलेको र त्यसलाई चिर्ने प्रयास पनि भएको छ ।

‘हामीले मुख्यमन्त्रीलाई विश्वासको मत पुग्न नदिने र गठबन्धनको सरकार बनाउने निर्णय भएको छ,’ आङ्बोले भने ।

मुख्यमन्त्री अझै मिलेको छैन

गठबन्धनका दुई दल कांग्रेस र माओवादीवीच पहिला कसले नेतृत्व गर्ने भन्ने विवाद टुंगो लागेको छैन । माओवादी नेता आङ्बो मुख्यमन्त्रीको दाबेदार छ । उनी एमालेसँगको गठबन्धनको बेलामा पनि मुख्यमन्त्रीको दाबीमा थिए । अहिले पनि दाबेदार छन् ।

कांग्रेसका उद्धव थापा प्रमुख दाबेदार हुन् । कांग्रेसभित्र केदार कार्की पनि दाबेदार छन् । शेखर कोइरालामार्फत कार्कीले लविङ बढाएका छन् । तर, तत्काल कार्कीको संभावना भने छैन । माओवादीसँग भने सहमति भइसकेको छैन ।

नेता आङ्बोले पनि माओवादी र कांग्रेस दुवैको दाबी रहेको स्वीकार गरे । तर, शीर्ष नेताहरूबीच हुने सहमतिलाई पालना गर्ने सहमति भएको पनि आङ्बोले बताए ।

मध्यावधिमा लैजाने एमाले खेल

अहिले एमालेले दुईवटा रणनीति लिएको छ । सकेसम्म विश्वासको मतमा बहुमत पुर्‍याउने । त्यसका लागि सत्ता गबठन्धनभित्रकै सांसदहरूलाई तान्ने रणनीति बनाएको छ । त्यसका लागि जसपा र नेकपा एसका सांसदलाई नजर लगाएको छ ।

अहिले नेकपा एसका सांसदलाई हात लिने प्रयास गरेको छ । तथापि, गठबन्धनभित्र विश्वासको वातावरण बनाउने प्रयास भने भइरहेको छ । एमालेले मधेश प्रदेशमा जसपालाई विश्वासको मत दिएर एमालेले सम्बन्ध विस्तार गर्न प्रयास गरेको छ । जसपाको एक सीट रहेको कोशीमा जसपाले साथ दिनासाथ एमालेको सरकार टिक्छ । अहिले एमालेले उक्त प्रयास पनि गरेको छ ।

यो रणनीति असफल भए मध्यवाधि निर्वाचनमा धकेल्ने प्रयास एमालेको छ । एमाले र राप्रपाका सांसद एउटा गठबन्धनमा छन् जसमा ४६ जना सांसद छन् । कांग्रेस, माओवादी, एस र जसपाको गठबन्धनमा पनि ४६ जना सांसद रहेका छन् । पहिला ४७ जना सांसद भए पनि माओवादी केन्द्रमा सांसद बाबुराम गौतम सभामुख भएका कारण सरकार बनाउन एक सांसद कम हुन पुगेको हो । सभामुख गौतमले सरकार बनाउन भोट हाल्न पाउँदैनन् । त्यसैले, अहिले एमाले दुवै पक्षको सरकार बन्न नदिने बरु मध्यावधिमा धकेल्ने रणनीति लिएको छ ।

प्रकाशित मिति: सोमबार, असार ११, २०८० १९:१३