रामनारायण बिडारीलाई प्रश्न – प्रतिगमन सच्चियो ? (भिडियाेसहित)

A+ A A-

दुईपटकको संसद् विघटनलाई लिएर नेकपा एमाले र उक्त दलका अध्यक्ष केपी शर्मा ओलीमाथि ‘प्रतिगामी’को ट्याग लाग्यो । संसद् विघटन गर्नुलाई ‘प्रतिगमन’ भन्दै ओली र उनका दललाई नेकपा (माओवादी केन्द्र)का अध्यक्षसमेत रहेका प्रधानमन्त्री पुष्पकमल दाहाल ‘प्रचण्ड’सहितले यसरी आरोपित गरेका थिए ।

आइतबार भने उनै प्रतिगामी भनेर आरोपित गरिएका ओली र उनको दलको मुख्य समर्थनमा प्रचण्ड संघीय लोकतान्त्रिक गणतन्त्र नेपालको ४४औँ प्रधानमन्त्री भए । यसपछि प्रश्न उठेको छ– के प्रतिगमन सच्चियो ? यही मूल प्रश्नमा आधारित रहेर थप केही प्रश्न नेकपा माओवादी केन्द्रका नेता रामनारायण बिडारीलाई शिलापत्रकर्मी जङ्ग तामाङले गरेका छन् ।

प्रतिगमन सच्चिएको हो ?

प्रतिगमन भनेको मान्छे हुँदैन । कुनै संस्था हुँदैन ।

के हुन्छ ?

काम हुन्छ । त्यो जुन कामको विरोध गरेर हामीले प्रतिगमन भनेका थियौँ । त्यो काम टुङ्गो लागिकन र अर्को चुनाव भइकन प्रतिनिधिसभा अर्को आइसक्यो । हामीले प्रतिगमन भनेको त त्यो बेलाको प्रतिनिधिसभा विघटन गर्ने कार्य हो ।

अब प्रतिगमनको खतरा छैन ?

छैन । अर्को निर्वाचन आइसकेर अदालतले पनि बोलीसक्यो । यो (संसद्) विघटन गर्न पाइँदैन भनेर भनिसक्यो । त्यसकारण त्यो कामको ‘च्याप्टर क्लोज’ भयो । अब नेकपा एमालेभित्र पनि कम्युनिस्ट छन् । माओवादीभित्र पनि कम्युनिस्ट छन् । कम्युनिस्ट कम्युनिस्ट भएका कारण सुन्नुभएन ? तल चाहिँ कार्यकर्ताले कम्युनिस्ट एकता जिन्दावाद (आइतबार ओली निवास बालकोटमा ओली–प्रचण्डले अभिवादन गरेको प्रसङ्गतर्फ लक्षित गर्दै) भनेर नारा लगाइदिए त । त्यो लगाउनु भनेर लगाएको होइन । स्वस्फूर्त लगाएका हुन् ।

यो गठबन्धनलाई वाम–राजतन्त्रात्मक गठबन्धन भन्न मिल्छ ?

हा.हा...यो संविधानअन्तर्गतका दलहरूले सरकार गठन गरेका हुन् । अहिलेको सरकारले राजतन्त्र पनि फर्काउँदैन । समाजवादमा पनि जान सक्दैन । यो संविधानअनुसार चल्छ । यो संविधानले राजतन्त्र पनि मान्दैन । यो संविधानले अहिले समाजवाद पनि मान्दैन ।

यसले यो संविधानले दायरा गरेका कुराहरू चाहिँ अगाडि बढाउँछ । संविधानले जे–जे दायरा तोकेको छ, राप्रपा पनि यही संविधानअनुसार चल्ने हो । माओवादी पनि यही संविधानअनुसार चल्ने हो । एमाले पनि यही संविधानअनुसार चल्ने हो र कांग्रेस पनि । संविधानभन्दा बाहिर गएर दायाँबायाँ गर्न कसैले पाँउदैन ।

भिडियाे हेर्नुहाेस्

प्रकाशित मिति: मंगलबार, पुस १२, २०७९ ११:०६