अंकविहीन हुँदै नेपालले टुंग्यायो यू–१७ एसियन कप छनोट

A+ A A-

नेपालले एएफसी यू–१७ एसियन कप छनोट फुटबलमा अंकविहीन हुँदै आफ्नो यात्रालाई टुंग्याएको छ । समूह ‘एफ’ मा रहेको नेपाल आफ्नो अन्तिम खेलमा आइतबार (आज) चाइनिज ताइपेईसँग ४–२ गोलले पराजित हुँदै अंकविहीन बनेको हो ।

यसअघि नेपालले आफ्नो पहिलो खेलमा थाइल्यान्डसँग ३–० गोलको हार ब्यहोरेको थियो । दोस्रो खेलमा आयोजक भियतनामसँग ५–० को फराकिलो हार ब्यहोर्दै एक खेलअघि नै नेपाल समूह चरणबाटै बाहिरिसकेको थियो ।

आफ्नो अन्तिम खेलका कमजोर मानिएको चाइनिज ताईपेइविरुद्ध जित निकाल्ने नेपाललाई राम्रो अवसर थियो । तर चाइनिज ताइपेईविरुद्ध पनि पराजित भएसँगै नेपालले तीनै खेलमा हार ब्यहोरेको हो ।

खेलको तेस्रो मिनेटमा नै नेपालले गोल खान पुगेको थियो । चाइनिज ताइपेईका लिङ हाङ चिङले गोल गरेपछि नेपाल १–० ले पछि परेको थियो । तर खेलको १०औँ मिनेटमा कप्तान प्रशान्त लक्षमले गोल गर्दै नेपाललाई १–१ गोलको बराबरी दिलाए । खेलको २८औँ मिनेटमा नेपाल फेरि २–१ गोलले पछि पर्‍याे । चाइनिज ताइपेईका यान याओले गोल गर्दै पहिलो हाफसम्म २–१ को अग्रता दिलाए ।

खेलको ६१ औँ मिनेटमा धनसिंह विकले गोल गर्दै नेपाललाई २–२ गोलको स्थितिमा फर्काएका थिए । लगत्तै खेलको ६४ औँ मिनेटमा कप्तान प्रशान्तले करिब ३० यार्ड टाढाबाट प्रहार गरेको बल बारमा लागेर फर्किएको थियो । त्यसपछि रिबाउन्ड भएर आएको बललाई सिजल राईले गोल गर्ने राम्रो अवसर खेर फाले ।

खेलको ७९औँ मिनेटमा दीपक थापा मगर दोहोरो पहेलो कार्ड खाँदै मैदान छाडेपछि नेपाल १० खेलाडीमा समेटिएको थियो । त्यो फोउलमा चाइनिज ताइपेईले फ्रिकिक पाएको थियो । यई टिङले फ्रिकिकबाट उत्कृष्ट गोल गर्दै चाइनिज ताईपेईलाई ३–२ गोलको अग्रता दिलाए । खेलको ८९ औँ मिनेटमा लिङ हाङ चिङले गोल गर्दै चाइनिज ताइपेईलाई ४–२ गोलको जित दिलाए । चाइनिज ताईपेईको यो पहिलो जित हो । यसअघि आयोजक भेयतनाम र थाल्यान्डसँग हारेको थियो ।

एसियाका ४४ राष्ट्रलाई १० समूहमा विभाजन गरिएर छनोट प्रतियोगिता गराइएको छ । जसबाट समूह विजेता छनोटको फाइनल राउण्डमा प्रवेश गर्नेछन् । त्यस्तै, सबै समूहका उत्कृष्ट ६ उपविजेता टिमले पनि फाइनल राउण्डमा प्रवेश गर्नेछन् ।

प्रकाशित मिति: आइतबार, असोज २३, २०७९ १७:२१