रविलाई संसदमा बोल्न दिन कांग्रेस तयार !

A+ A A-

नेपाली कांग्रेसको पदाधिकारी तथा पूर्वपदाधिकारीको बैठकमा उपप्रधानमन्त्री तथा गृहमन्त्री रवि लामिछानेलाई संसदमा बोल्न दिने विषयले चर्चा पाएको छ । अधिकांश नेताहरू सो कुरामा सकरात्मक रहेको बैठकमा सहभागी एक नेताले बताए ।

२८ वैशाखबाट सञ्चालन हुने सदनको बजेट अधिवेशनमा रास्वपा सभापति समेत रहेका लामिछानेलाई आफ्नो कुरा राख्न दिन कांग्रेस नेताहरू नरम देखिएका हुन् । बैठकमा सहभागी ती पदाधिकारीले दिएको जानकारीअनुसार कांग्रेस लोकतान्त्रिक दल भएकाले कसैको बोल्न पाउने अधिकार कुण्ठित नगर्ने विषयमा छलफल भएको हो । तर, गृहमन्त्री लामिछानेलाई बोल्न दिए पनि संसदीय छानबिन समिति नबनेसम्म संसद् बैठक भने चल्न नदिने अडान लिने कांग्रेसको तयारी छ ।

‘सदनमा बोल्न दिने कुरा भएको छ । तर, बोलेपछि पुनः सदन बैठक चल्न नदिने कांग्रेसको तयारी छ । बैठकमा यही विषयमा छलफल भएको छ,’ ती नेताले भने, ‘हामी सभामुखसँग गृहमन्त्रीलाई बोल्न दिने तर, संसदीय छानबिन समिति नबनेसम्म सदन चल्न नदिने स्पष्ट कुरा राखेर मात्र बोल्न दिन्छौँ ।’

कांग्रेसले सहकारीको बचत अपचलनमा गृहमन्त्री लामिछाने संलग्न रहेको आरोप लगाउँदै संसदीय छानबिन समिति गठन गर्नुपर्ने माग गरिरहेको छ । तर, सत्तापक्ष गृहमन्त्री लामिछानेलाई केन्द्रमा राखेर बन्ने समिति गठन गर्न तयार छैन ।

‘अधिवेशनको सुरुको दिनमा शीर्ष नेताले सम्बोधन गर्ने भएकाले उहाँ (रवि) पनि शीर्ष नेता भएकाले सम्बोधन गर्न दिने कुरा भएको छ । यसबारे प्रस्ट निर्णय संसदीय दलबाट आउँछ,’ बैठकमा सहभागी नेता अर्जुननरसिंह केसीले शिलापत्रसँग भने ।